អស្ចារ្យ! អង្គរវត្តដណ្ដើមចំណាត់ថ្នាក់លេខ១ផ្ទួនៗគ្នា ឈ្នះអស់ប្រាសាទល្បីៗលើលោក

2018-01-03 02:52:31
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេលចុងក្រោយនេះ ប្រាសាទអង្គរវត្តដ៏អច្ឆរិយរបស់កម្ពុជា បានដណ្ដើមចំណាត់ថ្នាក់លេខ១ផ្ទួនគ្នា ពីបណ្ដាគេហទំព័រល្បីៗលើលោក។ ថ្ងៃនេះ Sabay សូមសង្ខេបចំណាត់ថ្នាក់លេខ១សំខាន់ៗនៃប្រាសាទអង្គរវត្ត ដូចខាងក្រោមនេះ៖

១. ចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើលោក

ក្រោយការចូលរួមបោះឆ្នោតពីភ្ញៀវទេសចររាប់លាននាក់ជុំវិញពិភពលោក គេហទំព័រដ៏ល្បីល្បាញ TripAdvisor បានផ្តល់ចំណាត់ថ្នាក់លេខ១ដល់ប្រាសាទអង្គរវត្តរបស់កម្ពុជា ជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតរបស់ពិភពលោកសម្រាប់ឆ្នាំ២០១៧កន្លងទៅ។

នេះគឺជាឆ្នាំទី៤ហើយ ដែលអង្គរត្រូវបានភ្ញៀវទេសចរលើពិភពលោកបោះឆ្នោតគាំទ្រ ហើយទទួលបានចំណាត់លេខ១ជាប់ៗគ្នាតាមរយៈគេហទំព័រដ៏ល្បីល្បាញផ្សេងៗគ្នា គឺ កាលពីឆ្នាំ២០១៤ អង្គរបានជាប់ចំណាត់ថ្នាក់លេខ១ នៅលើគេហទំព័រមួយដែលតែងតែយកតំបន់បុរាណវិទ្យា និងប្រវត្តិសាស្ត្រទាំងអស់លើពិភពលោកមកប្រៀបធៀបគ្នា នោះគឺគេហទំព័រ ArchaeoMadness។

បន្ទាប់មកទៀត នៅដើមឆ្នាំ២០១៥ អង្គរវត្តទទួលបានចំណាត់ថ្នាក់លេខ១ម្តងទៀត នៅលើគេហទំព័រអន្តរជាតិមួយ ដែលជាគេហទំព័រផ្សព្វផ្សាយតំបន់ទេសចរណ៍ល្បីៗលើពិភពលោក នោះ គឺ គេហទំព័រ TripAdvisor។

នៅឆ្នាំ២០១៦ អង្គរបានបន្តជាប់លេខ១បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក មានទាំងព័ត៌មានតាមរយៈវែបសាយ ទស្សនាវដ្តី និងសៀវភៅ ជាដើម។

២. ជាប់ចំណាត់ថ្នាក់លេខ១ ក្នុងចំណោមប្រាសាទធំមហិមាទាំង១០លើលោក

គេហទំព័រទេសចរណ៍អន្តរជាតិ Touropia បានចាត់ថ្នាក់សំណង់ប្រាសាទថ្មីចាស់ មិនប្រកាន់សាសនា នៅជុំវិញពិភពលោក ដោយរកឃើញប្រាសាទចំនួន ១០មានទំហំធំជាងគេ ក្នុងនោះប្រាសាទអង្គរវត្ត របស់កម្ពុជា ទទួលបានចំណាត់ថ្នាក់លេខ១។

សំណង់ប្រាសាទទាំង ១០ មានដូចខាងក្រោម៖

#១. ប្រាសាទអង្គរវត្ត (កម្ពុជា)

ប្រាសាទអង្គរវត្តមានគោបុរៈចំនួនបី គោបុរៈក្រៅគេមានទំហំ ១៨៧ x ២១៥ម៉ែត្រ គោបុរៈទីពីរមានទំហំ ១០០ x ១១៥ម៉ែត្រ ខាងក្នុងគេទំហំ ៦០ x ៦០ម៉ែត្រ និងកំពូលកណ្ដាលកម្ពស់ ៦៥ម៉ែត្រ។

#២. ប្រាសាទ Karnak នៅអេហ្ស៊ីប

Kanak ជាប្រាសាទបុរាណមានបរិវេណធំជាងគេបំផុតក្នុងលោក មានសសរចំនួន ១៣៤ដើម ចំនួន ១៦ជួរសម្រាប់ទ្រដំបូល ដែលមានកម្ពស់ ២៤ម៉ែត្រ។

#៣. ប្រាសាទ Borobudur ឥណ្ឌូណេស៊ី

ប្រាសាទបុរាណរាងជាន់ថ្នាក់ៗ នេះស្ថិតនៅកោះជ្វា ចម្ងាយ ៤០គីឡូម៉ែត្រភាគខាងពាយ័ព្យទីក្រុង Yogyakarta.។ Borobudur ត្រូវបានសង់ក្នុងសតវត្សទី៨ និងជាប្រាសាទសម្រាប់ព្រះពុទ្ធសាសនាធំជាងគេបំផុតក្នុងលោក។ ដុំថ្មប្រើសម្រាប់សង់មានចំនួន ២លានដុំ ក្នុងទំហំ ១២៣ x ១២៣ម៉ែត្រ កំពូលខ្ពស់ជាងគេកម្ពស់ ៣៥ម៉ែត្រ។

#៤. ប្រាសាទ Akshardham នៅឥណ្ឌា

ប្រាសាទនេះទើបសាងសង់បញ្ចប់ក្នុងឆ្នាំ ២០០៥ របស់អង្គការ BAPS ដោយកំពូលកណ្ដាលគេកម្ពស់ ៤៣ម៉ែត្រ ទទឹង ៩៦ម៉ែត្រ និងប្រវែង ១១០ម៉ែត្រ ជាមួយសួនច្បារខាងក្រោមយ៉ាងស្រស់បំព្រង។

#៥. ប្រាសាទ Sri Ranganathaswamy នៅឥណ្ឌា

ប្រាសាទនេះសង់ឡើងសម្រាប់ឧទ្ទិសដល់ព្រះវិស្ណុ សង់ក្នុងសតវត្សទី១៧ លើផ្ទៃ ១៥៦អា មានប៉មចំនួន ២១ និងកម្ពស់ ៧៣ម៉ែត្រ។

#៦. ចេតិយ Jetavanaramaya នៅស្រីលង្កា Jetavanaramaya ស្ថិតនៅទីក្រុង Anuradhapura ប្រទេសស្រីលង្កា ដែលជាចេតិយធំបំផុតលើលោក។ សំណង់នេះត្រូវបានកសាងដោយស្ដេច Mahasena ក្នុងសតវត្សទី៣ ចំណាយពេល ១៥ឆ្នាំ និងឥដ្ឋ ៩៣,៣លានដុំ និងមានកម្ពស់ ១២២ម៉ែត្រ។

#៧. ប្រាសាទ Tikal ឬប្រាសាទបួន នៅសាធារណរដ្ឋហ្គាតាម៉ាឡា Tikal ជាទីក្រុងMayan ធំបំផុត ក្នុងចន្លោះឆ្នាំ ២០០ ដល់ ៩០០នៃគ.ស ដែលកាលនោះមានប្រជាជនរស់នៅ ១០ទៅ ២០ម៉ឺននាក់។ ប្រាសាទនេះមានកម្ពស់ ៧២ម៉ែត្រ និងបញ្ចប់ការសាងសង់នៅឆ្នាំ ៧០២។

#៨. វិហារ Saint Sava នៅប្រទេសស៊ែប៊ី

វិហារនេះចាប់ផ្ដើមសាងសង់ក្នុងឆ្នាំ ១៩៨៥ និងបញ្ចប់ក្នុងឆ្នាំ ២០០៤ តែគ្រឿងតុបតែងមិនទាន់រួចរាល់។ វាមានប្រវែង ៩១ម៉ែត្រ ទទឹង ៨១ម៉ែត្រ កម្ពស់ ៧០ម៉ែត្រ និងនៅលើផ្ទៃដី ៣ ៥០០ម៉ែត្រការ៉េ។

#៩. វិហារគ្រិស្ត Christ the Saviour នៅរុស្ស៊ី

Christ the Saviour ជាវិហារសាសនាគ្រិស្តខ្ពស់បំផុតនៅក្នុងលោក កម្ពស់ ១០៣ម៉ែត្រ ដែលត្រូវបានកសាងក្នុងសតវត្សទី ១៩ និងរយៈពេល ៤០ឆ្នាំ។ ក្នុងឆ្នាំ១៩៣១ វិហារនេះត្រូវបានគេកម្ទេច ក្រោមបញ្ជារបស់មេដឹកនាំស្តាលីន ដើម្បីធ្វើជាវាំងរបស់សូវៀត។ រហូតដល់ឆ្នាំ ១៩៩០ វិហាររុស្ស៊ី Russian Orthodox ទទួលបានការអនុញ្ញាតឲ្យស្ថាបនាវិហារឡើងវិញ និងរួចជាស្ថាពរក្នុងឆ្នាំ ២០០០។

#១០. ប្រាសាទ Baalbek នៅប្រទេសលីបង់

ប្រាសាទ Baalbek ឬគេស្គាល់ថា Heliopolis ត្រូវបានសាងសង់ឡើងតាំងពីសតវត្សទី ១មុនគ.ស មានបណ្ដោយ ៦៩ម៉ែត្រ ទទឹង ៣៦ម៉ែត្រ កម្ពស់ ១៩ម៉ែត្រ និងសសរបញ្ឈរចំនួន ៤២ដើម។ ជនជាតិរ៉ូម៉ាំងបានសង់វាឡើងក្នុងរយៈពេលជាង ២សតវត្សទើបរួច។

៣. ជាប់ចំណាត់ថ្នាក់លេខ១ ជាគោលដៅទេសចរណ៍នៅលើវេបសាយយូណេស្កូ

ប្រាសាទអង្គរវត្ត បានជាប់ជាតំបន់រមណីយដ្ឋានទេសចរណ៍ប្រវត្តិសាស្ត្រ និងវប្បធម៌ លេខ១ របស់អាស៊ី នៅលើវេបសាយបេតិកភណ្ឌពិភពលោកនានារបស់អង្គការយូណេស្កូ ដែលជាគោលដៅទេសចរណ៍ធំបំផុតសម្រាប់ភ្ញៀវទេសចរមកពីបណ្ដាប្រទេសផ្សេងៗនៅលើពិភពលោក។ នេះបើយោងតាមប្រភពពីវេបសាយ Asian Correspondent ចុះផ្សាយនៅថ្ងៃទី២ ខែមករា ឆ្នាំ២០១៨។

ប្រភពដដែល បានចាត់ទុកប្រាសាទអង្គរវត្តជាទីតាំងប្រវត្តិសាស្ត្រដ៏មានសារៈសំខាន់នៅក្នុងតំបន់អាស៊ីអាគ្នេយ៍។ អង្គរវត្ត ក៏ជាប់ជាតំបន់ទេសចរណ៍បេតិកភណ្ឌវប្បធម៌ និងធម្មជាតិ ដែលជាគោលដៅរបស់ទេសចរ នៅលើវេបសាយ TripAdvisor ផងដែរ។

គោលដៅទេសចរណ៍ ដែលឈរនៅក្រោមប្រាសាទអង្គរវត្ត នៅលើវេបសាយបេតិកភណ្ឌពិភពលោករបស់យូណេស្កូ មាន ២- ចេតិយ Taj Mahal (ឥណ្ឌា) ៣- មហាកំផែង (ចិន) ៤- តំបន់ប្រវត្តិសាស្ត្រ Machu Picchu (ប៉េរូ) ៥- ឧទ្យាន Iguazu (ប្រេស៊ីល-អាហ្សង់ទីន) ៦- តំបន់ប្រវត្តិសាស្ត្រ Sassi di Matera (អ៊ីតាលី) ៧- ជំរំ Auschwitz Birkenau (ប៉ូឡូញ) ៨- ទីក្រុងចាស់ជេរូហ្សាឡឹម (អ៊ីស្រាអែល) ៩- តំបន់ប្រវត្តិសាស្ត្រនៃទីក្រុងអ៊ីស្តង់ប៊ុល (តួកគី) ១០- ទីក្រុងប្រវត្តិសាស្ត្រ Krakow (ប៉ូឡូញ)។

សូមជម្រាបជូនថា ក្នុងឆ្នាំ២០១៧ ចំនួនភ្ញៀវទេសចរបរទេស ដែលទិញសំបុត្រចូលទស្សនារមណីយដ្ឋានអង្គរ មានចំនួន ជាង ២,៤៥លាននាក់ កើនឡើង ១១,៨២ភាគរយ បើធៀបនឹងឆ្នាំ២០១៦។ ចំណែកឯប្រាក់ចំណូលសរុបបានពីការលក់ប័ណ្ណចូលទស្សនាវិញ គឺមានចំនួនជិត ១០៨លានដុល្លារអាមេរិក កើនឡើង ៧២,៥៤ភាគរយ។ នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ចេញផ្សាយថ្ងៃទី១ ខែមករា ឆ្នាំ២០១៨ នេះ៕

ចុចអានអត្ថបទពាក់ព័ន្ធ៖

អត្ថបទ៖ វឌ្ឍនៈ