មុខងារបញ្ជាសំឡេងចាប់ផ្តើមបំពាក់លើរថយន្តបណ្តើរៗ យ៉ាងយូរត្រឹមឆ្នាំ ២០១៩

2018-01-17 01:44:57
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅ CES ២០១៨ ក្រុមហ៊ុនរថយន្តប្រកាសមុខងារថ្មី Voice assistant (បញ្ជាមុខងារណាមួយដោយប្រើសំឡេង)។ ក្រុមហ៊ុន Google និង Amazon មានការប្រកួតប្រជែងគ្នាដើម្បីបង្ហាញវត្តមាន Google Assistant និង Alexa សម្រាប់ម៉ូដែលរថយន្តជាច្រើននៅឆ្នាំនេះ។

ឆាប់ៗ អ្នកបើកបររថយន្តនឹងមិនត្រូវការចុចលើអេក្រង់ក្នុងការត្រួតពិនិត្យទិសដៅ ឬស្វែងរកព័ត៌មានក្នុងពលបើកបរទៀតឡើយ។

ក្រុមហ៊ុន Toyota ឬ Lexus

ក្រុមហ៊ុន Toyota កំពុងបញ្ចូលមុខងារប្រើសំឡេង Alexa របស់ Amazon ទៅកាន់ម៉ូដែលរថយន្តឆ្នាំ២០១៨ឬ ២០១៩ក្នុងការផ្តល់មុខងារសួរពីទិសដៅ, ត្រួតពិនិត្យព័ត៌មាន, អាចគ្រប់គ្រងភ្ជាប់ទៅកាន់ Smart home device ពីចម្ងាយ ដូចជាពិនិត្យរង្វាស់សីតុណ្ហភាព ឬបើកសោទ្វា សកម្មភាពទាំងអស់នេះនឹងអាចបញ្ជាដោយសំឡេង។

ក្រុមហ៊ុន Ford

ក្រុមហ៊ុន Ford ប្រហែលជាចង់ប្រើមុខងារ Alexa ក្នុងរថយន្ត តែក្រុមហ៊ុនចង់បង្កើតបច្ចេកវិទ្យាផ្ទាល់ខ្លួន។ ក្រុមហ៊ុនសម្លឹងការដំណើរការប្រព័ន្ធទំនាក់ទំនងរថយន្ត "Vehicle-to-everything" ជាមួយនឹងក្រុមហ៊ុន Qualcomm សម្រាប់ប្រព័ន្ធបើកបរដោយស្វ័យប្រវត្តិ។

ក្រុមហ៊ុន Ford ប្រមើលមើលបណ្ដាញរថយន្តជាជំនួយមួយ អាចនឹងបញ្ជូនទិន្នន័យចរាចរណ៍ទៅកាន់ស្មាតហ្វូនដោយផ្ទាល់។ ការប្រើទិន្នន័យនោះដើម្បីប្រាប់ដំណឹងដល់អ្នកបើកបរពីទីតាំងអាចចតរថយន្តបាន។

បច្ចុប្បន្ន Ford កំពុងចាប់ដៃគូជាមួយនឹង Waze ដើម្បីអនុវត្តមុខងារបញ្ជាជាសំឡេង។

Mercedes-Benz (MBUX)

ក្រុមហ៊ុន Nvidia និង Mercedes-Benz បានប្រកាសភាពជាដៃគូនៅទី ០៩ ខែមករាឆ្នាំនេះសម្រាប់ MBUX ដែលជា AI។ MBUX AI បើកដំណើរការដោយសំឡេង ជាមួយនឹងឃ្លាថា Hey Mercedes។

MBUX ជួយអ្នកជ្រើសរើសតន្ត្រី ឬទិសដៅដោយស្វ័យប្រវត្តិពេលបើកបរ។ វាអាចយល់ឃ្លាបាន ២៣ ភាសា ហើយ AI អាចតាមដានភ្នែក និងចលនាក្បាល ព្រមទាំងកាយវិការដៃរបស់អ្នក ដូច្នេះអាចប្រាប់អ្នកប្រសិនបើអ្នកមិនបានមើលផ្លូវ ឬអាចយល់ពីអ្នក ពេលបែរទៅកញ្ចក់ ហើយនិយាយថា Open it (បើក)។

Google Assistant ប្រើលើ Android Auto

Android Auto មានលើ Honda, Hyundai, រាល់ Brand GM និងបណ្តា Brand រថយន្តដទៃទៀត ផ្តល់ភាពងាយស្រួលបញ្ជាជាសំឡេងសម្រាប់ត្រួតពិនិត្យទិសដៅ ឬបើកកម្មវិធីជាច្រើន។

ក្រុម Android របស់ Google បានប្រកាសថា អ្នកអាចគ្រប់គ្រងលើ Smart home ពីចម្ងាយលើរថយន្ត ហើយអាចចាក់សោរថយន្តពីចម្ងាយ ឬត្រួតពិនិត្យកម្រិតប្រេងតាមរយៈកម្មវិធី ករណីក្រុមហ៊ុនរថយន្តអាចឲ្យ Google ចូលប្រើបាន។

Kia

ក្រុមហ៊ុន Kia បានប្រកាសចាប់ដៃគូជាមួយនឹង Google ដើម្បីបង្កើតជម្រើសរថយន្ត Kia ឆ្នាំ ២០១៨ អាចចូលប្រើមុខងារបានតាមកម្មវិធី Google Assistant។ ប្រព័ន្ធ UVO telematic អនុញ្ញាតឲ្យអ្នកបើកបរហៅទូរសព្ទចេញ ឬទាញយកទិសដៅដោយបញ្ជាជាសំឡេង។

ជាមួយនឹង Google អ្នកបើកបរអាចគ្រប់គ្រងម៉ាស៊ីន ចង្កៀងមុខ កាំប្លេ និងចាក់សោពីចម្ងាយ។

Google ក៏បានជួយ Hyundai ដើម្បីចេញមុខងារ Assistant ដូចគ្នាសម្រាប់រថយន្តផងដែរ។

Anker Roav Viva Bluetooth

ក្រុមហ៊ុន Anker បានប្រកាសនូវ Roav Viva Bluetooth Charging Kit នៅព្រឹត្តិការណ៍ CES។ Device នេះដោតភ្ជាប់ទៅកាន់ថាមពល ១២ វ៉ុល ក្នុងរថយន្ត ហើយអាចសាកថ្មទូរសព្ទ និងផ្គត់ផ្គង់បើកស្តាប់តន្ត្រី។ ម្យ៉ាងទៀត អាចប្រើពេញលេញនូវកញ្ចប់ Amazon Alexa ដូច្នេះអ្នកអាចគ្រប់គ្រង Smart home បាន៕