វិធីសាស្រ្ត៥យ៉ាង កាត់បន្ថយហានិភ័យពីជំងឺកាចសាហាវ មុនឈានដល់អាយុជាង៤០ឆ្នាំ
- 2018-01-16 23:30:00
- ចំនួនមតិ 0 | ចំនួនចែករំលែក 0
វិធីសាស្រ្ត៥យ៉ាង កាត់បន្ថយហានិភ័យពីជំងឺកាចសាហាវ មុនឈានដល់អាយុជាង៤០ឆ្នាំ
ចន្លោះមិនឃើញ
មនុស្សម្នាក់ៗនៅពេលឈានចូលដល់វ័យជាង៤០ ឆ្នាំ ឬខ្ទង់លេខ៤ នោះប្រព័ន្ធការពារ រាងកាយ ចាប់ផ្តើមថយចុះ អាចងាយប្រឈមទៅនឹងជំងឺផ្សេងៗ ប្រសិនយើងមិនបាន យកចិត្តទុកដាក់ថែទាំ សុខភាពឱ្យបានត្រឹមត្រូវ។
លោកវេជ្ជបណ្ឌិត អ៊ាវ សុខុម ឯកទេសជំងឺមហារីក និងជាប្រធានផ្នែកជំងឺមហារីកនៃមន្ទីរពេទ្យកាល់ម៉ែត្របានណែនាំវិធីសាស្រ្ត៥ យ៉ាង ដើម្បីកាត់បន្ថយហានិភ័យពីជំងឺកាចសាហាវផ្សេងៗ មុនឈានចូលដល់អាយុជាង ៤០ឆ្នាំ។
-ចុចអាន៖ មុនចូលគេង អ្នកមិនគួរមានទម្លាប់៤នេះឡើយ ទើបសុខភាពរឹងមាំ
កុំជក់បារី
ការជក់បារីផ្ដល់គុណវិបត្តិច្រើនយ៉ាងដល់សុខភាព ដូចជា ជំងឺបេះដូង ជំរុញឱ្យសរសៃឈាមអាកទែទៅជារឹង និងត្បៀត ដែលជាហេតុបណ្ដាលឱ្យកើតជំងឺលើសឈាម ស្ត្រូក និងជំងឺគាំងបេះដូង ។ អ្នកជក់បារីកើតជំងឺទាំងនេះ ឆាប់រហ័សជាងអ្នកមិនជក់បារី ។ ប្រហែល៣០% នៃជំងឺគាំងបេះដូង បង្កឡើងដោយការជក់បារី ។
ផឹកគ្រឿងស្រវឹង
ការសេពគ្រឿងស្រវឹង គឺធ្វើឲ្យប្រឈមនឹងការកើតជំងឺជាច្រើនមុខ។ ក្នុងនោះ គឺអាចធ្វើឲ្យអ្នកសេពគ្រឿងស្រវឹង ខូចសរីរាង្គបន្តពូជ អាចធ្វើឲ្យអត់មានកូន, ជំងឺក្រិនថ្លើម មហារីកថ្លើម និងធ្វើឲ្យប៉ះពាល់ខួរក្បាលជាដើម។
ពិសាបន្លែឱ្យបានច្រើន
បន្លែ គឺជាអាហារធម្មជាតិ ដែលមានសារធាតុចិញ្ចឹមស្ទើរតែទាំងអស់ ដែលរាងកាយត្រូវការដើម្បីដំណើរការមុខងារឲ្យបានត្រឹមត្រូវ។ បន្លែ គឺជាប្រភពសារធាតុចិញ្ចឹមដ៏ច្រើន មានទាំងវីតាមីនរហូតដល់សារធាតុប្រឆាំងអុកស៊ីតកម្ម។ ជំហានដំបូងដើម្បីទទួលបានសុខភាពល្អ គឺជាអ្នកត្រូវបរិភោគបន្លែ ។ យ៉ាងណាមិញអ្នកត្រូវប្រាកដថា បន្លែដែលអ្នកបរិភោគ ជាបន្លែមានសុវត្ថិភាព និងមានតុល្យភាពចំពោះសុខភាព មានន័យថា ប្រសិនបើយើងបញ្ចេញកម្លាំងពលកម្មខ្លាំង និងប្រើប្រាស់ថាមពលច្រើន យើងអាចបរិភោគបាយ និងម្ហូប ។ ប៉ុន្តែបើសិនយើងមិនសូវប្រើប្រាស់ថាមពល ឬហាត់ប្រាណច្រើនទេ អាចហូបតិចៗបានហើយ។ ត្រូវជៀសវាងអាហារ ដែលមានជាតិអំបិល និងស្ករច្រើនពេក។ អាហារដែលមានជាតិស្ករច្រើនដូចជា បាយ នំប៉័ង និងដំឡូងជាដើម។ យើងត្រូវកាត់បន្ថយឱ្យស្ថិតនៅកម្រិតសមស្របមួយ។
ត្រូវហាត់ប្រាណឱ្យបានទៀងទាត់
គ្រប់ៗគ្នាសុទ្ធតែបានដឹងថា ការហាត់ប្រាណបានផ្តល់នូវសុខភាពល្អ និងជួយបង្កើនកម្រិតសមសួននៃរាងកាយរបស់យើង។ បើអាចក្នុងមួយសប្ដាហ៍យើងត្រូវដើរឱ្យបាន ២ម៉ឺនជំហាន ឬអាចឆ្លៀតដើរក្នុងមួយថ្ងៃឱ្យបាន ២០ នាទី ឬ៣០នាទីទុកជាការហាត់ប្រាណក៏ជាការគ្រប់គ្រាន់ដែរ។
ជីវិតរីករាយ (enjoy life)
ភាពរីករាយជាអ្វី ដែលមនុស្សគ្រប់គ្នាតែងចង់កើតមានគ្រប់ពេលវេលាក្នុងជីវិត។ ផ្ទុយមកវិញ បើយើងមានទុកព្រួយពេក អាចមានបញ្ហាតប់ប្រមល់ ឬបញ្ហាស្រ្តេសកើតឡើងធ្វើឱ្យមានសម្ពាធទាំងផ្លូវកាយ និងផ្លូវចិត្ត។ ការរងសម្ពាធដូចបានរៀបរាប់ខាងលើអាចជាមូលហេតុបណ្ដាលឱ្យគេងមិនសូវលក់ស្កប់ស្កល់ និងហូបមិនសូវបាន បណ្ដាលឱ្យសុខភាពចុះខ្សោយនឹងអាចប្រឈមទៅនឹងជំងឺផ្សេងៗ។ មែនទែនទៅមានការរកឃើញថា អ្នកដែលអាយុវែង ភាគច្រើនជាអ្នកដែលមានភាពសប្បាយរីករាយ និង មិនគិតអ្វីស្មុគស្មាញច្រើន និងមានគំនិតសុទិដ្ឋិនិយមច្រើន។ ភាពរីករាយធ្វើឱ្យយើងសប្បាយចិត្ត ខួរក្បាលយើងស្ងប់ អត់មានស្រ្តេស យើងអាចគេងលក់ស្កប់ ហូបបានសុខភាពល្អពេលនោះគ្មានជំងឺបៀតបៀន និងអាចរស់បានយូរហើយ។
លោកវេជ្ជបណ្ឌិត អ៊ាវ សុខុម បានបន្ថែមថា នៅពេលឈានចូលវ័យជាង ៤០ឆ្នាំ ជំងឺដែលតែងកើតមានឡើងច្រើនសម្រាប់ស្ត្រីគឺ មហារីកសុដន់ រោគស្ត្រី និងជំងឺស្រ្តេស ដោយសារអ័រម៉ូនភេទថយចុះ។ ចំណែកបុរសវិញភាគច្រើនកើតជំងឺ គាំងបេះដូង ដោយសារស្ទះសរសៃឈាមបេះដូង ផ្ដើមពិការ សេព គ្រឿងស្រវឹង ជក់បារី និងបរិភោគខ្លាញ់ច្រើនពេក។
លោកវេជ្ជបណ្ឌិតតបានសង្កត់ធ្ងន់ថា យោងតាម របាយការណ៍នៅលើពិភពលោកអ្នកមានអាយុ ៤០ ឆ្នាំឡើងសឹងតែ ១ ០០០នាក់ មានជំងឺគាំងបេះដូង ៣ នាក់ ទៅ ៤នាក់។ បើស្រ្តី ១ ០០០នាក់ មានជំងឺមហារីក ម្នាក់តែប៉ុណ្ណោះ។ យ៉ាងណាមិញលោក វេជ្ជបណ្ឌិតមានភាពរីករាយ ដែលអត្រារស់ជាមធ្យមរបស់ប្រជាពលរដ្ឋ ខ្មែរបានកើតឡើងរហូតដល់ ៧២,៥ឆ្នាំ ដែលកត្តានេះផ្ដើមចេញការយល់ដឹង និងការចេះថែទាំសុខភាពរបស់ពលរដ្ឋទូទៅ៕
-ចុចអាន៖ បើអស់ពីវេជ្ជបណ្ឌិត Beat Richner ពេទ្យគន្ធបុប្ផាព្យាបាលអត់យកលុយទៀតទេ?
-ចុចអាន៖ បើអស់ពីវេជ្ជបណ្ឌិត Beat Richner ពេទ្យគន្ធបុប្ផាព្យាបាលអត់យកលុយទៀតទេ?
-ចុចអាន៖ ផ្ទុះករណីជំងឺផ្ដាសាយបក្សី កើតមាននៅតំបន់មួយក្នុងរាជធានីភ្នំពេញ