អាមេរិកដាក់ពង្រាយយន្តហោះទម្លាក់គ្រាប់បែក ៦គ្រឿង ទៅកោះ Guam ព្រោះតែកូរ៉េខាងជើង

2018-01-17 02:52:58
ចំនួនមតិ 0 | ចំនួនចែករំលែក 0

ចន្លោះមិនឃើញ

កងកម្លាំងអាកាសអាមេរិកបានដាក់ពង្រាយយន្តហោះទម្លាក់គ្រាប់បែក ប្រភេទ B-52 Stratofortress ដែលមានសមត្ថភាពអាចបាញ់នុយក្លេអ៊ែរ ចំនួន ៦ គ្រឿង ទៅកោះ Guam ដើម្បីបន្ថែមកម្លាំងបន្ថែមទៀតទៅកាន់តំបន់នោះ រយៈពេលប៉ុន្មានម៉ោងប៉ុណ្ណោះ ក្រោយពីប្រព័ន្ធផ្សព្វផ្សាយរបស់កូរ៉េខាងជើង បានចំអកឲ្យលោកប្រធានាធិបតីអាមេរិក ដូណាល់ ត្រាំ ដោយសំដៅលើទំហំប៊ូតុងនុយក្លេអ៊ែររបស់លោក។

យន្តហោះទម្លាក់គ្រាប់បែក B-52 Stratofortress

ការដាក់ពង្រាយជាផ្លូវការនេះ គឺជាផ្នែកមួយនៃកិច្ចខិតខំប្រឹងប្រែងរបស់យោធាអាមេរិក ដើម្បីរក្សាវត្តមានរបស់យន្តហោះទម្លាក់គ្រាប់បែកជាបន្តបន្ទាប់ នៅមហាសមុទ្រប៉ាស៊ីហ្វិក ប៉ុន្តែវាគាប់ជួនជាមួយនឹងការចរចារវាងកូរ៉េខាងជើង និងកូរ៉េខាងត្បូង មុនពេលព្រឹត្តិការណ៍អូឡាំពិករដូវរងាមកដល់។

គួរបញ្ជាក់ថា កិច្ចចរចានោះបានកត់សម្គាល់នូវភាពរលូនដ៏សំខាន់បំផុត នៅក្នុងទំនាក់ទំនងរវាងប្រទេសជិតខាងទាំង២ ហើយសហរដ្ឋអាមេរិកនៅតែមានសុទិដ្ឋិនិយមដោយប្រុងប្រយ័ត្នថា កិច្ចពិភាក្សានេះអាចផ្ដល់នូវអត្ថប្រយោជន៍សម្រាប់ការទូត។

ប្រធានាធិបតីអាមេរិក ដូណាល់ ត្រាំ

ទីក្រុងវ៉ាស៊ីនតោន និងទីក្រុងសេអ៊ូល បានសម្រេចពន្យារពេលធ្វើសមយុទ្ធយោធាប្រចាំឆ្នាំរបស់ពួកគេ រហូតដល់ព្រឹត្តិការណ៍កីឡាអូឡាំពិកបានបញ្ចប់ ប៉ុន្តែកងកម្លាំងអាកាសអាមេរិកបាននិយាយថា ខ្លួននឹងរក្សាកងកម្លាំងជាប្រចាំនៅក្នុងតំបន់ខាងលើ បើទោះបីជាកិច្ចពិភាក្សាកំពុងបន្តក៏ដោយ។

យ៉ាងណាមិញ ការពិភាក្សារវាងកូរ៉េខាងជើង និងកូរ៉េខាងត្បូង មិនបានរារាំងក្រុងព្យុងយ៉ាងពីការរិះគន់ដោយចំហ ចំពោះអាមេរិក និងលោកប្រធានាធិបតី ដូណាល់ ត្រាំ នៅក្នុងរយៈពេលប៉ុន្មានថ្ងៃថ្មីៗនេះទេ៕