ល្បីដល់ថ្នាក់នេះ ដឹងទេ Taylor Swift មានទ្រព្យសម្បត្តិប៉ុន្មាន?

2018-01-29 08:11:13
ចំនួនមតិ 0 | ចំនួនចែករំលែក 0

ចន្លោះមិនឃើញ

អាល់ប៊ុមចុងក្រោយរបស់ Taylor Swift “Reputation” លក់ដាច់ដល់ទៅ ១,២៦លានបន្ទះឯណោះ តែក្នុងសប្ដាហ៍ដំបូង និងក្លាយជាអាល់ប៊ុមចម្រៀងលក់ដាច់បំផុតនៅឆ្នាំ ២០១៧។ នាងគឺជាតារាចម្រៀងម្នាក់ មានលទ្ធភាពលក់ដាច់ ដល់ទៅ១លានបន្ទះចំពោះអាល់ប៊ុមបីជាប់ៗគ្នា តែនៅសហរដ្ឋអាមេរិកគឺ “Speak Now”, “Red”, និង “1989” ហើយ "Reputation” ក៏មិនខុសគ្នាដែរ។ ជាមួយនឹងភាពជោគជ័យនៃអាល់ប៊ុម ទូទាំងពិភពលោកដូចជា នៅអូស្ត្រាលីនិងចក្រភពអង់គ្លេស និង Canada ជាដើម Taylor បានលក់សំបុត្រសម្រាប់តន្ត្រីទេសចរណ៍ "Reputation World Tour 2018” រកចំណូលបានយ៉ាងច្រើន។ មកដល់ពេលនេះ តន្ត្រីទេសចរណ៍នេះលក់សំបុត្របានដល់ទៅ ១៨០លានដុល្លាររួចស្រេចទៅហើយ ជាហេតុធ្វើឲ្យទ្រព្យសម្បត្តិនាងឡើងដល់ទៅ ៣៨០លានដុល្លារឯណោះ។

អ្នកណាគេជា Taylor Swift?

Taylor Swift កើតនៅរដ្ឋ Pennsylvania សហរដ្ឋអាមេរិកនៅថ្ងៃទី ៣ខែវិច្ឆិកាឆ្នាំ ១៩៨៩។ នាងតែងតែធ្វើដំណើរទៅកាន់ទីក្រុង Nashville ជាញឹកញាប់តាំងពីវ័យ១១ឆ្នាំដើម្បីព្យាយាមចាប់យកអាជីពជាតារាចម្រៀងស្រុកស្រែ បន្ទាប់មកក៏ផ្លាស់ប្ដូរទៅកាន់ទីនោះជាផ្លូវការពេលនាងមានអាយុ ១៤ឆ្នាំ ដោយមានឪពុកលោក Scott មកជាមួយ។ Taylor បានធ្វើការជាមួយអ្នកនិពន្ធបទចម្រៀងមួយចំនួន ហើយអ្នកនិពន្ធដែលនាងសរសេរបទចម្រៀងជាមួយច្រើនជាងគេនោះគឺអ្នកនាង Liz Rose ដែលពួកគេនិពន្ធបទចម្រៀងរួមគ្នា បានដល់ទៅ២០បទ ដូចជាបទ "White Horse” និង "Teardrops on My Guitar” ជាដើម។ អាល់ប៊ុមទី១ ឈ្មោះ "Taylor Swift” ចំណាយពេលដល់ទៅ ១៥៧សប្ដាហ៍នៅលើតារាងអាល់ប៊ុម Billboard Hot 200 ជាអាល់ប៊ុមដែលចំណាយពេលនៅលើតារាងនេះច្រើនជាងគេបំផុតនៅអំឡុងទសវត្សឆ្នាំ ២០០០។ ដោយសារតែភាពជោគជ័យផ្នែកសិល្បៈ Taylor ល្បីឈ្មោះជាតារាដែលតែងតែផ្លាស់ប្ដូរដៃគូស្នេហាជាញឹកញាប់ តាំងពីតារាសម្ដែងល្បីៗ តារាចម្រៀងល្បីដូចជា Joe Jonas, Jake Gyllenhaal, John Meyer និង Harry Styles ជាដើម ហើយសង្សាររបស់នាងសព្វថ្ងៃគឺតារាសម្ដែង Joe Alwyn។

ទ្រព្យសម្បត្តិរបស់នាងមានអ្វីខ្លះ?

បើយោងទៅតាមវិបសាយ Celebrity Net Worth តារារូបនេះមានទ្រព្យសម្បត្តិដល់ទៅ ៣៨០លានដុល្លារក្នុងឆ្នាំ ២០១៧។ ប៉ុន្តែបើយោងទៅតាមវិបសាយ Forbes បានបញ្ជាក់ថានាងមានទ្រព្យសម្បត្តិ ២៨០លានដុល្លារ ប៉ុន្តែនេះមិនទាន់បូកបញ្ចូលនូវទឹកប្រាក់បានមកពីការលក់សំបុត្រតន្ត្រីទេសចរណ៍ ១៨០លានដុល្លារទៀតនោះទេ។

តើនាងរកចំណូលតាមរបៀបណាខ្លះ?

ចំណូលមួយផ្នែកធំរបស់ Taylor Swift គឺបានមកពីការលក់អាល់ប៊ុម និងបទចម្រៀងទាំងនៅទីផ្សារ និងនៅលើប្រព័ន្ធអ៊ីនធឺណិត។ ចំណែកឯប្រភពមួយផ្នែកធំទៀតនោះគឺបានមកពី ការលក់សំបុត្រតន្ត្រីទេសចរណ៍របស់នាង។ តន្ត្រីទេសចរណ៍ "1989” រកចំណូលបាន ១៨៤,៥លានដុល្លារ និង "Reputation” ត្រូវគេទស្សន៍ទាយថាអាចរកចំណូលបានចន្លោះពី ៣៩០លាន ទៅ ៥១០លានដុល្លារ យោងទៅតាមទស្សនាវដ្ដី Billboard។ មកត្រឹមតែប៉ុណ្ណោះនាងក៏ជាដៃគូផ្សព្វផ្សាយរបស់ Diet Coke និង Keds Shoes ព្រមទាំងដៃគូផ្សព្វផ្សាយរបស់ Apple Music ផងដែរ៕