Lady Gaga ត្រូវបង្ខំចិត្តបញ្ឈប់តន្ត្រីទេសចរណ៍ដោយសារឈឺចាប់ខ្លាំងពេក

2018-02-06 00:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Lady Gaga មានជំងឺម្យ៉ាងដែលមានឈ្មោះថា "Fibromyalgia” ដែលបង្កឲ្យមានការឈឺចាប់ចំពោះសាច់ដុំនិងសន្លាក់ឆ្អឹង ព្រមទាំងមានរោគសញ្ញាដទៃទៀត មានដូចជាអាការៈឆាប់អស់កម្លាំង និងបញ្ហាជាមួយការចងចាំជាដើម។

ម្ចាស់បទ "Bad Romance” រូបនេះត្រូវបង្ខំចិត្ត លុបចោលការសម្ដែងដល់ទៅ ១០កន្លែងនៅទ្វីប អឺរ៉ុប ដែលជាផ្នែកមួយនៃការសម្ដែងតន្ត្រីទេសចរណ៍ "Joanne World Tour” របស់ខ្លួន។

តារាវ័យ ៣១ឆ្នាំរូបនេះ បានប្រកាសនៅក្នុងសេចក្ដីថ្លែងការថា៖ "ខ្ញុំពិតជាអស់កម្លាំងខ្លាំងណាស់ ហើយខ្ញុំមិនដឹងថាគួរតែបរិយាយបែបណានោះទេ។"

Lady Gaga បានបន្តបកស្រាយថា នាងពិតជាមិនចង់លុបចោលការសម្ដែងទាំងនោះទេ នាងបានប្រកាសប្រាប់អ្នកគាំទ្រនាងដែលនៅទីក្រុងទាំង ៩ (ទីក្រុង London, Manchester, Zurich, Koln, Stockholm, Copenhagen, Paris, Berlin និង Rio) ថានាងពិតជាស្រលាញ់ពួកគេខ្លាំង និងសុំទោសចំពោះការលុបចោលនេះ។

ចំពោះថ្លៃសំបុត្រដែលអ្នកគាំទ្រទិញត្រៀមទស្សនានោះ ពេលនេះនឹងត្រូវផ្ដល់ឲ្យវិញ។

នេះមិនមែនជាលើកទី១នោះទេ ដែលនាងត្រូវលុបចោលការសម្ដែង ដោយសារតែនាងមានជំងឺប្រចាំកាយ និងព្រមទាំងឆ្លងកាត់ការវះកាត់ថ្មីៗទៀតផង៕