ប្រើជិតមួយឆ្នាំ ទើបដឹងទូរសព្ទថ្មីកាន់រាល់ថ្ងៃ អ្នកលក់លួចស៊ីម៉ាស៊ីនតាំងពីថ្ងៃដំបូង

2018-02-07 04:58:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីដើមសប្ដាហ៍ Sabay បានធ្វើការចុះផ្សាយរួចមកហើយពីរបៀបមើលទូរសព្ទ iPhone ដែលផលិតមកថ្មីពីក្រុមហ៊ុន, ទូរសព្ទខូចដែល Apple យកមកជួសជុលឡើងវិញ និងទូរសព្ទដែលអតិថិជនបានប្រើហើយយកទៅប្ដូរថ្មីក្នុងលក្ខខណ្ឌនៅមានការធានា។ ឯអត្ថបទនេះ ចង់ចែករំលែកបទពិសោធន៍ពិតពីយុវជនម្នាក់ ដែលចាញ់បោកអ្នកលក់ ពេលទៅទិញទូរសព្ទថ្មីបែរជាបានទូរសព្ទប្តូរគ្រឿងទៅវិញ។

iPhone 7 Plus រូបតំណាង

លោក ឬទិ្ធ ជាបុគ្គលិកធ្វើការនៅក្រុមហ៊ុនឯកជនមួយបានប្រាប់មកកាន់ Sabay និយាយពីប្រវត្តិទិញទូរសព្ទ iPhone កាលពីមួយឆ្នាំមុនថា លោកបានទិញទូរសព្ទ iPhone 7Plus ទំហំ 32GB ក្នុងតម្លៃ **៧៧០ ដុល្លារ** នៅថ្ងៃចេញលក់ដំបូង នៅហាងធំមួយនៅក្នុងទីក្រុងភ្នំពេញ។ ពេលទិញនោះ អ្នកលក់បានបកពីក្នុងប្រអប់ថ្មីចេសបង្ហាញចំពោះមុខតែម្តង មិនគួរឲ្យសង្ស័យនោះទេ។

លោកថា កាលទិញនោះលោកពិនិត្យដិតដល់ដែរដូចជារូបរាងខាងក្រៅ គ្រឿងក្នុងនិងមុខងារប្រើប្រាស់មួយចំនួនទៀត។ ទើបពេលថ្មីៗនេះ លោកឆែកមើលទូរសព្ទដែលលោកទិញប្រើជិតមួយឆ្នាំនោះ ជាទូរសព្ទដែលអ្នកលក់លួចប្តូរម៉ាស៊ីនតាំងពីថ្ងៃទិញដំបូង។

ទោះបីជាទូរសព្ទដែលគេលួចប្តូរគ្រឿង តែប្រើមួយរយៈធំនេះលោកក៏មិនទាន់លេចឃើញមានបញ្ហាអីដែរ តែក៏មិនទាន់ច្បាស់ដែរនៅថ្ងៃខាងមុខអាចនឹងមានបញ្ហាអីកើតឡើង។

ក្រោយពេលចាញ់បោកដោយជឿជាក់អ្នកលក់ពេក លោកក៏ផ្តាំផ្ញើអ្នកដែលទៅរកទិញទូរសព្ទតាមហាង ត្រូវប្រយ័ត្នប្រយែង បើមិនច្បាស់ទេត្រូវនាំអ្នកជំនាញទៅជួយមើល ក្រែងលោប៉ះអ្នកលក់ចិត្តស្លុយយកទូរសព្ទប្តូរគ្រឿងបន្លំភ្នែក ខាតលុយ ខាតពេលហើយក្តៅចិត្តទៀត៕

ចុះប្រិយមិត្តវិញពេលទិញទូរសព្ទថ្មី ធ្លាប់ជួបរឿងនេះដែរទេ?

ដើម្បីដឹងច្បាស់ពីរបៀបឆែកមើលចុចនៅទីនេះ តែមួយក្បាច់អាចឆែកដឹង iPhone ថ្មីឬមួយទឹកមកពីស្រុកគេ