បែកធ្លាយការពិត លោក ត្រាំ កុហកពីតម្លៃចិញ្ចៀនភ្ជាប់ពាក្យរបស់ជំទាវទី ១

2018-02-09 08:48:18
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីឆ្នាំ ២០០៥ លោក ដូណាល់ ត្រាំ បានប្រាប់កាសែត The New York Times ថា ហាងពេជ្រមួយបានបញ្ចុះតម្លៃចំនួន ១ លានដុល្លារ សម្រាប់ចិញ្ចៀនភ្ជាប់ពាក្យតម្លៃ ១,៥ លានដុល្លារ។ ប៉ុន្តែ កាលពីពេលថ្មីៗនេះ ទស្សនាវដ្ដីដ៏ល្បីល្បាញ Forbes រកឃើញថា ការលើកឡើងខាងលើ គឺជាការកុហកប៉ុណ្ណោះ។

ប្រធានហាងពេជ្រខាងលើ លោក Laurence Graff បានសរសេរនៅក្នុងអ៊ីមែលមួយ កាលពីថ្ងៃទី ២៦ ខែមករា ថា "ខ្ញុំមានអារម្មណ៍រីករាយណាស់ក្នុងការធ្វើជំនួញ ប៉ុន្តែលោក ត្រាំ មិនទទួលបានការបញ្ចុះតម្លៃសម្រាប់ចិញ្ចៀនពេជ្រ ទំហំជាង ១០ ការាត់នោះទេ"។

បន្ថែមពីនេះទៀត ប្រភពសុំមិនបញ្ចេញឈ្មោះមួយ ដែលដឹងរឿងរ៉ាវច្បាស់អំពីការទិញលក់នេះ និយាយថា "លោក ត្រាំ បានបង់លុយក្នុងតម្លៃពេញសម្រាប់ចិញ្ចៀននេះ និងបង់ភ្លាមៗតែម្ដង។"

គួរឲ្យដឹងថា លោក ដូណាល់ ត្រាំ ក៏បានទិញចិញ្ចៀនពេជ្រទី ២ ដែលមានតម្លៃជាង ៣លានដុល្លារ ពីហាងពេជ្រខាងលើ សម្រាប់ខួបអាពាហ៍ពិពាហ៍ ១០ឆ្នាំផងដែរ។

ទោះជាយ៉ាងណាក៏ដោយ មកទល់នឹងពេលនេះ ទស្សនាវដ្ដី Forbes មិនទាន់ទទួលបានការឆ្លើយតបណាមួយពី សេតវិមាន និងការិយាល័យជំទាវទី ១ ជុំវិញរឿងរ៉ាវនេះនៅឡើយទេ៕