ហេតុតែចង់ផ្តាច់បារី សុខចិត្តពាក់ទ្រុងជាប់ក្បាល រួចចាក់សោឲ្យប្រពន្ធកាន់ទៀត

2018-02-10 07:36:08
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សគ្រប់រូបបានយល់ដឹងអំពីគ្រោះថ្នាក់នៃការជក់បារី។ ថ្វីបើមានការព្រមានតាមរយៈការផ្សព្វផ្សាយពាណិជ្ជកម្មលើទូរទស្សន៍ និងសូម្បីតែលើប្រអប់ផ្ទាល់យ៉ាងណាក្តី ក៏មនុស្សមួយចំនួននៅតែបន្តជក់បារី ដោយសារតែមូលហេតុផ្សេងៗ។

ផ្ទុយទៅវិញ ដើម្បីផ្ដាច់បារីបុរសជនជាតិតួកគីម្នាក់ បានសម្រេចចិត្តពាក់ទ្រុងជាប់ក្បាល រួចចាក់សោឲ្យប្រពន្ធកាន់ទៀតផង។

ជាការពិតណាស់ ទ្រុងនេះអាចមិនឲ្យបុរសវ័យ ៤២ ឆ្នាំខាងលើជក់បារីបាន ប៉ុន្តែប្រពន្ធរបស់លោកនឹងដោះវាចេញ នៅពេលទទួលទានអាហារ ហើយក៏ពាក់ឲ្យលោកវិញក្រោយពេលទទួលទានរួច។

លោក Ibrahim Yucel ចង់រក្សាពាក្យសន្យារបស់ខ្លួនយ៉ាងខ្លាំង រហូតនឹកឃើញបង្កើតទ្រុងមុខនេះឡើង។ លោកគឺជាអ្នកញៀននឹងបារី ដោយក្នុងមួយថ្ងៃអាចជក់អស់ ២ កញ្ចប់ អស់រយៈពេលជាង ២០ ឆ្នាំមកហើយ។

ទោះជាយ៉ាងណា លោក Yucel បានសម្រេចចិត្តផ្ដាច់បារីវិញ ក្រោយពេលឪពុករបស់លោកបានស្លាប់ដោយសារតែមហារីកសួត។ គួរឲ្យដឹងថា លោកធ្លាប់បានព្យាយាមផ្ដាច់បារីជាច្រើនលើកច្រើនសារមកហើយ ប៉ុន្តែមិនទទួលបានជោគជ័យឡើយ។

ភរិយារបស់លោក Yucel បាននិយាយថា ដំបូងឡើយអ្នកស្រីខ្មាសអៀនណាស់ចំពោះការធ្វើបែបនេះ ប៉ុន្តែគាំទ្រប្ដីវិញដោយសារតែ លោក Yucel ចាត់ទុកការផ្ដាច់បារីលើកនេះសំខាន់ខ្លាំងបំផុត។

យ៉ាងណាមិញ បើទោះបីជាលោក Yucel ពាក់ទ្រុងនេះ ក៏លោកនៅតែអាចមើលឃើញ , ទទួលទាននំ និង បឺតទឹកបាន គ្រាន់តែមិនអាចប្រើដៃដើម្បីកាន់បារីជក់ប៉ុណ្ណោះ៕