ហេតុអ្វីអ្នកប្រើបណ្ដាញសង្គមជនជាតិកូរ៉េភាគច្រើនស្អប់តារាស្រីទាំងនេះខ្លាំងម្ល៉េះ?

2018-02-23 07:20:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាតារាដែលមានឈ្មោះល្បីតែងតែមានអ្នកស្រឡាញ់ និងអ្នកស្អប់ វាជារឿងធម្មតា។ តែទោះជាយ៉ាងណាតារាស្រីទាំងប៉ុន្មានរូបខាងក្រោមនេះត្រូវបានគេស្អប់ខ្លាំង និងក្លាយជាផ្ទាំងស៊ីបសម្រាប់អ្នកដែលស្អប់ពួកគេរិះរកកំហុសរិះគន់គ្រប់ពេល។

១. តារាចម្រៀង Park Bom (ក្រុម 2NE1)

ជាយូរណាស់មកហើយ អ្នកលេងតាមបណ្ដាញសង្គមជនជាតិកូរ៉េតែងតែប្រើប្រាស់ពាក្យពេចន៍មិនសមរម្យទៅលើទម្រង់មុខរបស់តារាចម្រៀងរូបនេះដូចជា "នាងមុខប្លាស្ទិក នាងវះកាត់មុខសុសសាច់ជាដើម"។ ប៉ុន្តែ Park Bom នាងបានព្យាយាមអត់ធ្មត់នឹងមតិរិះគន់ទាំងអស់នោះ។

ក្រោយមក នៅពេលដែលពាក្យចចាមអារ៉ាមពាក់ព័ន្ធនឹងគ្រឿងញៀនបានផ្ទុះឡើង អ្នករិះគន់ទាំងនោះរឹតតែមានលេសយកហេតុផលទាំងនេះដើម្បីមើលងាយនាងបន្ថែមទៀត ទោះបីជានាងបានសុំទោសជាច្រើនលើកច្រើនសារក៏ដោយ។

ដោយសារមានសម្ពាធធ្ងន់ធ្ងរបែបនេះ តារាចម្រៀង Park Bom បានសម្រេចចិត្តចាកចេញពីក្រុម 2NE1 ហើយផ្អាកពីការងារសិល្បៈនេះមួយរយៈ។

២. តារាចម្រៀង Jennie (ក្រុម BLACKPINK)

ចាប់តាំងពីចូលច្រៀងក្នុងផលិតកម្ម YG មក Jennie ទទួលបានការចាប់អារម្មណ៍ខ្លាំងពីសំណាក់អ្នកគាំទ្រជាច្រើន។ តែទោះជាយ៉ាងណា នាងមានពាក្យចចាមអារ៉ាមពាក់ព័ន្ធនឹងរឿងរើសអើងក្រោយពីពេលដែលនាងបានចូលវិស័យសិល្បៈចម្រៀងនេះ។

មានពាក្យចចាមអារ៉ាមជាច្រើនបានបង្ហោះលើបណ្ដាញសង្គម Instagram ថានាងជាមនុស្សកោងកាចចូលចិត្តសម្លុតធ្វើបាបគេនៅក្នុងសាលា។ ក្រោយមក មនុស្សដែលតាំងខ្លួនជាអ្នកដែលតារាចម្រៀងរូបនេះធ្លាប់ធ្វើបាបបានបង្ហោះរូបភាពបញ្ចប់ការសិក្សារបស់នាងដើម្បីបញ្ជាក់ពីការចោទប្រកាន់នេះ។

ក្រោយពីមានរឿងរ៉ាវបែបនេះកើតឡើង តារាចម្រៀងស្រីកំពុងទទួលបានភាពល្បីល្បាញរូបនេះ ត្រូវបានអ្នករិះគន់បន្តមតិអវិជ្ជមានរបស់ពួកគេទៅលើនាងដោយមិនមានមូលហេតុ។

៣. តារាចម្រៀង Yeri (ក្រុម Red Velvet)

ចាប់តាំងពីក្រុមចម្រៀងនេះ ប្រកាសថែមសមាជិកថ្មីនោះ តារាចម្រៀង Yeri បានក្លាយជាគោលដៅនៃការរិះគន់របស់អ្នកលេងបណ្ដាញសង្គមជនជាតិកូរ៉េ។ ហេតុផលនោះថា អ្នកលេងបណ្ដាញសង្គមទាំងនេះគិតថា ក្រុមចម្រៀងដែលដំបូងមានសមាជិក៤នាក់នេះគឺគ្រប់គ្រាន់ និងស័ក្ដិបំផុតសម្រាប់ក្រុមទៅហើយ។ ក្រោយមក នៅពេលដែល Yeri កាន់តែខិតខំបំពេញការងាររបស់នាង ការស្អប់ពីមនុស្សទាំងនោះក៏មានកាន់តែច្រើនទៅលើនាងដែរ។

គ្រប់គ្នានិយាយថា នាងគ្មានអ្វីគួរឲ្យកោតសរសើរសោះរាប់តាំងពីរូបរាងនិងសមត្ថភាព ហើយពួកគេមិនយល់ថាហេតុអ្វីបានជានាងត្រូវបញ្ចូលក្នុងក្រុមនេះ។ ជាងនេះទៅទៀត នាងធ្លាប់ត្រូវបានចោទប្រកាន់ពីអត្តចរិតមិនសមរម្យនៅពេលដែលនាងរុញសមាជិកក្រុមម្នាក់របស់នាងចេញដើម្បីនាងបានថតរូប។

ដោយសារតែមូលហេតុនេះហើយ ទើបមនុស្សគ្រប់គ្នាមិនពេញចិត្តនាង។

៤. តារាចម្រៀង Nayeon (ក្រុម Twice)

Twice ជាក្រុមចម្រៀងមួយដែលកំពុងទទួលបានការចាប់អារម្មណ៍ខ្លាំងនៅពេលបច្ចុប្បន្ននេះ។ តារាចម្រៀង Nayeon ជាសមាជិកម្នាក់ក្នុងក្រុមចម្រៀងមួយនេះដែលសកម្មជាងគេ ហើយក៏ទទួលបានការរិះគន់ច្រើនជាងគេផងដែរ។

ពាក្យចចាមអារ៉ាមអាក្រក់ៗពីនាងកើតឡើងកាន់តែច្រើន ដូចជា Nayeon ជាមនុស្សមិនល្អ អត្តចរិតមិនល្អ ហើយតែងតែបង្ហាញអាកប្បកិរិយាមិនគួរសមដាក់សមាជិកណាដែលនាងមិនចូលចិត្ត។

ពាក្យចចាមអារ៉ាមផ្សេងទៀតបានលើកឡើងថា នាងមានទំនាក់ទំនងស្នេហាជាមួយតារា A ឬក៏ម្ញ៉ិកម្ញ៉ក់ជាមួយតារា B។ ក្រោយពីទទួលបានមតិអវិជ្ជមានជាច្រើន Nayeon កាន់តែប្រយ័ត្នប្រយែងខ្លាំងក្នុងការបញ្ចេញអារម្មណ៍របស់នាង។ ហើយថ្មីៗនេះដែរ នាងបានពួនក្រោយខ្នង Jung Yeon ហើយយំ ដែលធ្វើឲ្យអ្នកគាំទ្ររបស់នាងមានការអាណិតខ្លោចផ្សាជាខ្លាំង។

ជាការពិតណាស់ គ្មាននរណាម្នាក់អាចស្រឡាញ់ ឬក៏ទទួលបានការស្រឡាញ់ពីមនុស្សគ្រប់គ្នានោះទេ ប៉ុន្តែតារាស្រីទាំងប៉ុន្មាននេះ ពិតជាទទួលសម្ពាធធ្ងន់ធ្ងរខ្លាំងពីការរិះគន់ និងស្អប់ខ្ពើមពីមនុស្សមួយចំនួនដោយគ្មានហេតុផល។ សង្ឃឹមថា មនុស្សគ្រប់គ្នានឹងរិះគន់ទៅលើអ្វីដែលគួរតែរិះគន់ និងមិនមើលងាយនរណាម្នាក់ដោយគ្រាន់តែការស្អប់ពួកគេនោះ៕

ចុចអាន៖

ប្រភព៖ YouTube ប្រែសម្រួល៖ អន សុភក្ត្រា