ខឹងចិត្តរង់ចាំម្ហូបយូរពេក ភ្ញៀវចិនមួយក្រុមព្រួតគ្នាវាយអ្នករត់តុរងរបួស (មានវីដេអូ)

2018-03-04 03:55:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ហេតុការណ៍ដ៏រន្ធត់មួយ ត្រូវថតបានដោយកាមេរ៉ាសុវត្ថិភាពក្នុងហាង ខណៈអ្នករត់តុស្រីម្នាក់ត្រូវបានភ្ញៀវជនជាតិចិនមួយក្រុមព្រួតគ្នាវាយនៅភាគខាងត្បូងប្រទេស ចិន។

យោងតាមកាសែត Beijing ឲ្យដឹងថា ហេតុការណ៍នេះកើតលើងក្នុងភោជនីយដ្ឋាន Tianxiake ក្នុងខេត្ត Hunan កាលពីវេលាម៉ោង ៧:៤២នាទីល្ងាចថ្ងៃទី ២៥ ខែកុម្ភៈ។ អ្នកបរិភោគអាហារពេលល្ងាចមួយក្រុម មានគ្នាប្រមាណ ៦ ទៅ ៧ នាក់បានត្អូញត្អែរថា អ្នករត់តុលើកម្ហូបមកឲ្យពួកគេយឺតពេក ក្រោយមកក៏ព្រួតគ្នាវាយដំអ្នករត់តុស្រីអាយុ ៤៨ឆ្នាំតែម្ដង។

អ្នកស្រី Li ដែលជាអ្នកគ្រប់គ្រងភោជនីយដ្ឋាននោះពន្យល់ថា អ្នករត់តុរបស់ខ្លួនបានប្រាប់ភ្ញៀវទាំងនោះឲ្យមានការអត់ធ្មត់ដែរ ខណៈអាហារកំពុងត្រូវបានរៀបចំ ប៉ុន្តែពួកគេមិនស្ដាប់នោះទេ។ ផ្ទុយទៅវិញ ពួកគេខឹងសម្បារហើយត្អូញត្អែរថារង់ចាំយូរណាស់។ បុរសម្នាក់ បានប្រាប់ក្រុមអ្នកញុំាអាហារផ្សេងថា អាហារនៅទីនេះថ្លៃទៀតផង។

នៅក្នុងវីដេអូនេះ គេឃើញបុរសម្នាក់បានទះកំផ្លៀងអ្នករត់តុ ទោះបីជានាងខំពន្យល់យ៉ាងណាក៏ដោយ។ លើសពីនេះ ស្ត្រីម្នាក់ក៏បានបោចសក់ និងវាយក្បាលអ្នករត់តុ ហើយអ្នកផ្សេងបានយកពែង និងចានគប់នាងទៀតផង។

ទោះជាយ៉ាងណាក៏ដោយ អ្នករត់តុខាងលើត្រូវបានបញ្ជូនទៅកាន់មន្ទីរពេទ្យដើម្បីព្យាបាល ហើយអ្នកគ្រប់គ្រងភោជនីយដ្ឋានបានទាក់ទងប៉ូលិសដើម្បីស្រាវជ្រាវ និងចាប់ខ្លួនក្រុមភ្ញៀវទាំងនោះផងដែរ៕