ក្រោយឈ្លោះគ្នា១ថ្ងៃ ប្ដីប្រពន្ធគួរធ្វើ៦យ៉ាងនេះ ដឹងតែឆាប់ត្រូវគ្នា រឹតតែផ្អែមលើសដើម

2018-03-23 10:01:49
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្មានប្ដីប្រពន្ធណានៅលើលោកនេះដែលថា មិនដែលឈ្លោះគ្នាសោះនោះទេ គ្រាន់តែរឿងធំ ឬតូចប៉ុណ្ណោះ។ ករណីគ្រាន់អន់ចិត្ត ឬឈ្លោះគ្នាក្នុងកម្រិតមធ្យម មិនមែនដល់ថ្នាក់ក្បត់ផិតគ្នា ប្ដីប្រពន្ធគួរធ្វើរឿងរឿង៦យ៉ាងនេះ មិនយូរទេនឹងត្រូវគ្នាវិញ ហើយកាន់តែផ្អែមល្ហែមឡើង។

១. ប្រពន្ធនៅតែធ្វើម្ហូបឲ្យស្វាមីដូចដើម ចំណែកស្វាមីក៏ត្រូវមកញ៉ាំជាមួយគ្នា

ភរិយាខ្លះពេលឈ្លោះគ្នាជាមួយស្វាមីហើយ អាចឈប់ធ្វើម្ហូបឲ្យញ៉ាំ លែងបោកសំលៀកបំពាក់ឲ្យ ជាដើម។ ដូចនេះហើយ មិនងាយនឹងត្រូវគ្នាវិញទេ ភាពសោះកក្រោះអាចអូសបន្លាយកាន់តែយូរ។ ភរិយាវ័យឆ្លាត គេមិនធ្វើបែបនេះឡើយ ចំណែកស្វាមីក៏ដូចគ្នា បើឃើញថាប្រពន្ធនៅតែធ្វើម្ហូបឲ្យគួរតែទៅញ៉ាំតុរួមគ្នាទៅកុំប្រកាន់ថា មិនឭប្រពន្ធហៅ ព្រោះទើបតែឈ្លោះគ្នាហើយ មិនអាចនៅតែហៅបងៗ ពេញមាត់ទេ។

រូបតំណាង

**២. នៅតែគេងគ្រែរួមគ្នា ទោះបែរខ្នងដាក់គ្នាបន្តិចក៏មិនអី**

គេងបែកគ្រែគ្នា ឬចែកបន្ទប់គ្នា ជាទង្វើបង្ហាញពីចរិតនៅខ្ចីនៅឡើយសម្រាប់ប្ដីប្រពន្ធ។ បើហ៊ានគេងបែកគ្នា ប្រាកដណាស់មិនងាយត្រូវគ្នាឡើយព្រោះម្នាក់ៗ ចាំមើលបំណាំគ្នារៀងខ្លួន (គេមិនមកយើងមិនទៅ)។ បើនៅតែគេងជាមួយគ្នាយ៉ាងយូរបែរខ្នងដាក់គ្នាតែ២ ទៅថ្ងៃ ព្រោះពេលគេងលក់ម្នាក់ៗគេងរើរៀងខ្លួន ហើយប្រាកដជាឱបគ្នាមិនខាន។ ដល់ព្រឹកឡើងឃើញឱបគ្នាឡើងពេញដៃ រឿងអីមិនអៀនគ្នា កាលណាតែអៀនហើយនឹងសើចដាក់គ្នា ពេលសើចទៅ ចប់រឿងបាត់។

៣.មិនរត់ចោលផ្ទះមិនថា ទៅផឹកដាច់យប់ ឬគេងផ្ទះឪពុកម្ដាយ

ចំណុចនេះកាន់តែធ្ងន់កជាងខាងលើទៀត អាចមានភាគីចិត្តសឿងណាម្នាក់ ហ៊ានវេចបង្វេចទៅផ្ទះឪពុកម្ដាយ ឬដើរចោលផ្ទះគ្មានប្រាប់ដំណឹងគ្នាមួយម៉ាត់។ គេចពីបញ្ហាមិនមែនជាដំណោះស្រាយឡើយ ជម្រើសដ៏ត្រឹមត្រូវគួររៀនដោះស្រាយគ្នាក្នុងរង្វង់គ្រួសារខ្លួនឯង ហើយការគេចចេញពីផ្ទះប្រៀបដូចបន្ថែមសាំងលើភ្លើងឲ្យឆេះកាន់តែខ្លាំងឡើង។ បើម្នាក់ដើរចេញ ហើយម្នាក់ទៀតមិនទៅតាម រឿងរ៉ាវមិនងាយបញ្ចប់នោះទេ។

រូបតំណាង

៤. បើមានកូនគួរឲ្យកូនធ្វើជាមេអណ្ដើក

អាចជាវិធីសាស្ត្រមួយកម្រមានប្ដីប្រពន្ធណាដឹងណាស់។ ករណីប្ដីប្រពន្ធឈ្លោះគ្នា មិនហ៊ាននិយាយរកគ្នា គួរឲ្យកូនតូចជាអ្នកនាំពាក្យឲ្យគ្នាទៅវិញ ទៅមក ហើយកុំឲ្យកួនដឹងថាឈ្លោះគ្នា គ្រាន់តែប្រាប់ថា លេងស៊ើបការទៅបានហើយ។ វិធីសាស្ត្រនេះ អាចត្រូវគ្នាវិញឆាប់ ព្រោះចង់មិនចង់ម្នាក់ប្រាកដជាធ្វើបែបនេះមិនបានយូរឡើយ ម្យ៉ាងខ្លាចកូនហត់ផងក៏និយាយខ្លួនឯងបាត់។

៥. រក្សាទឹកមុខ កាយវិការដូចគ្មានរឿងអ្វីកុំបោកនេះ បោកនោះចោល ឬបិទទ្វាខ្លាំងៗ

ទង្វើបែបនេះ គឺអាចធ្វើឲ្យជម្លោះតភាគកាន់តែយូរ បើភាគីណាម្នាក់បញ្ចេញទង្វើធ្វើមុខក្រញូវ ហើយបើហ៊ានដល់ថ្នាក់យករបស់របរបោកចោល ឬបិទទ្វាឮគ្រិងគ្រាំងទៀត ប្រាកដជាធ្វើភាគីម្ខាងទៀតទ្រាំមិនបានឡើយ។ ដូច្នេះទង្វើនេះគួរជៀសវាងដាច់ខាត បើមិនចង់មើលមុខគ្នាមិនត្រង់រយៈពេលយូរ។

៦. ទទួលស្គាល់កំហុសរៀងខ្លួន ហើយអត់ឱនឲ្យគ្នា ដើម្បីបញ្ចប់រឿង

ពាក្យថាលើកលែងទោសឲ្យគ្នា អត់ឱនឲ្យគ្នា ត្រូវប្រកាន់ខ្ជាប់ជានិច្ចក្នុងជីវិតប្ដីប្រពន្ធ មិនថារឿងតូច រឿងធំប៉ុណ្ណាក៏ទៅជាអត់រឿងបានដែរ ឲ្យតែមានចិត្តសន្ដោស មេត្តាឲ្យគ្នា។ គ្មានប្ដីប្រពន្ធណាដែលថា មិនធ្លាប់ឈ្លោះគ្នា តែចុងក្រោយនៅតែផ្អែមល្ហែម ប្រសិនបើនៅតែមានក្ដីស្រលាញ់ ក្ដីអាណិតចំពោះគ្នាទៅវិញទៅមក៕

បញ្ជាក់៖ ទាំង៦យ៉ាងខាងលើនេះ Sabay បានសាកសួរប្ដីប្រពន្ធ៣គូ ដែលធ្លាប់មានរឿងល្អក់កករក្នុងគ្រួសារហើយតែងធ្វើបែបនេះពេលឈ្លោះគ្នាហើយ និងនៅតែស្រលាញ់គ្នាដូចដើម៕

ចុចអាន៖

អត្ថបទ៖ វឌ្ឍនៈ