តើក្រុមសង្គ្រោះនឹងធ្វើដូចម្ដេចទៀតក្រោយជួយក្មេងៗចេញមកបានហើយ?

2018-07-08 08:46:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈពេលដែលក្មេងៗក្រុមបាល់ទាត់ទាំង ១២នាក់និងគ្រូបង្វឹកម្នាក់ នឹងត្រូវបានយកចេញពីរូងភ្នំនៅថ្ងៃអាទិត្យនេះ ក្រុមអ្នកសង្គ្រោះដែលចាំនៅខាងក្រៅ មានគម្រោងការណ៍ ២ដើម្បីជួយពួកគេ។

យោងតាមកាសែត Khaosod ឲ្យដឹងថា ក្រុមអ្នកសង្គ្រោះបានត្រៀមឧទ្ធម្ភាគចក្រ និងឡានពេទ្យជាច្រើនគ្រឿង ក្រោយពេលដែលពួកគេចេញពីរូងភ្នំ។ ជាពិសេសឡានពេទ្យ ១៣គ្រឿង សម្រាប់ពួកគេម្នាក់ៗ បានត្រៀមរួចជាស្រេច។ ក្នុងនោះផងដែរ គម្រោងទាំងពីរ គឺអាស្រ័យទៅលើស្ថានភាពរបស់ពួកគេផ្ទាល់ និងកត្តាអាកាសធាតុ។

សម្រាប់គម្រោងទី ១ ប្រសិនបើក្មេងៗចេញមកមិនមានបញ្ហាធ្ងន់ធ្ងរ នោះឡានពេទ្យនឹងបញ្ជូនពួកគេទៅកាន់មន្ទីរពេទ្យ Chiang Rai Prachanukroh ដែលមានចម្ងាយ ៦០គីឡូម៉ែត្រ និងចំណាយពេលជិតមួយម៉ោង។ ប៉ុន្តែប្រសិនបើនរណាម្នាក់មានស្ថានភាពធ្ងន់ធ្ងរ នោះពួកគេនឹងប្រើប្រាស់គម្រោងទី ២ ដោយបញ្ចូលគេទៅកាន់ចំណតយន្តហោះដែលមានចម្ងាយ ៥គីឡូម៉ែត្រពីរូងភ្នំ និងហោះទៅកាន់ទីក្រុង ឈៀងរ៉ៃ រួចបញ្ជូនបន្តតាមឡានពេទ្យទៅកាន់មន្ទីរពេទ្យជិតនោះតែម្ដង។

ជាមួយគ្នាដែរ បុគ្គលិកមន្ទីរពេទ្យឲ្យដឹងថា ពួកគេបានត្រៀមខ្លួនរួចជាស្រេចដើម្បីជួយសង្គ្រោះក្មេងៗទាំងនោះ ហើយពួកគេនឹងត្រូវបានព្យាបាលដាច់ដោយឡែកពីគ្នា ក្នុងករណីមានជំងឺឆ្លងផ្សេងៗ៕