ផលប៉ះពាល់ ៤យ៉ាង អ្នកញៀនទូរសព្ទដឹងហើយ តែឈប់មិនបាន

2018-07-30 08:13:34
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នទូរសព្ទ Smartphone មានការប្រើយ៉ាងច្រើនកុះករពីអ្នកប្រើប្រាស់នៅជុំវិញពិភពលោក ដោយសារតែវាបានផ្ដល់ផលប្រយោជន៍យ៉ាងច្រើនដល់ពួកគេ។ ប៉ុន្តែវាក៏បានបង្កផល់ប៉ះពាល់ដល់អ្នកប្រើប្រាស់ដែរ។ ខាងក្រោមនេះគឺជាការរកឃើញចុងក្រោយនៃផលប៉ះពាល់ទៅលើរាងកាយនៃការប្រើប្រាស់ Smartphone ៖

១. ប៉ះពាល់ដល់ឆ្អឹងកញ្ចឹងក

យោងតាមការសិក្សាថ្មីមួយពីក្រុមហ៊ុនSurgical Technology International បានឲ្យដឹងថាការឱនសម្លឹងមើលទៅកាន់អេក្រង់ Smartphoneយូរ នឹងបង្កនូវការប៉ះពាល់ច្រើនដល់ឆ្អឹងកញ្ចឹងក។ ពេលដែលអ្នកបានឱនក្បាលសម្លឹងទៅកាន់អេក្រង់Smartphone អ្នកនឹងបន្តដាក់ទម្ងន់នៅលើឆ្អឹងកញ្ចឹងករបស់អ្នក។ ការឱនក្បាលចុចទូរសព្ទជាទម្រង់ ១៥ដឺក្រេគឺមានទម្ងន់១២គីឡូក្រាម ហើយបើឱនក្នុងទម្រង់៦០ដឺក្រេគឺមានទម្ងន់ប្រហែលជា២៧គីឡូក្រាម។ លោក Kenneth Hansraj ដែលជាអ្នកស្រាវជ្រាវម្នាក់បានធ្វើការសន្និដ្ឋានទៅលើការសិក្សានេះថា បើសកម្មភាពនេះនៅតែបន្ត នោះផលប៉ះពាល់នេះនឹងបង្កគ្រោះថ្នាក់នៅថ្ងៃមុខដែលអាចឈានទៅដល់ការវះកាត់។

២. 3G networks បង្កគ្រោះថ្នាក់ដល់កុមារ

តាមការសិក្សាថ្មីមួយផ្សេងទៀតបានអោយដឹងថាការប្រើប្រាស់អ៊ីធើណិត ឬ 3G networks គឺបង្កនូវផលប៉ះពាល់ដល់កុមារ។ និស្សិតបញ្ចប់ផ្នែកសេដ្ឋកិច្ចនៅសកលវិទ្យាល័យ Yale University បានធ្វើការចេញផ្សាយនូវរបាយការណ៍ការសិក្សាមួយកាលពីខែមុនថា ទំនាក់ទំនងនៃការដាក់បញ្ចូល 3G networks នៅតាមទីក្រុងមួយចំនួន និង អត្រាកើនឡើងនៃកុមាររងរបួសនៅមន្ទីរពេទ្យគឺមានការកើនឡើងដូចគ្នា។ នៅក្នុងរបាយការណ៍ អះអាងថា មានកុមារក្រោមអាយុ៥ឆ្នាំបានកើនឡើង១០ភាគរយនៅក្នុងមន្ទីរពេទ្យ ក្រោយទីក្រុងបានដាក់អោយប្រើ 3G network ព្រោះតែឪពុកម្ដាយមានប្រព័ន្ធ 3G ប្រើប្រាស់ ខ្វះការយកចិត្តទុកដាក់មើលថែកុមារ ដែលបណ្ដាលឲ្យពួកគេរងរបួសជាយថាហេតុ។

៣. ការប្រើ Smartphone ខ្លាំងធ្វើឲ្យឈឺសន្លាក់កែងដៃ

យោងតាមសេចក្ដីរាយការណ៍មួយពី Good Housekeeping បានអោយដឹងថា Carpal tunnel (ឈឺសន្លាក់កែងដៃ) គឺបង្កឡើងដោយសារ ការងារការិយាល័យដូចជាការងារវាយអត្ថបទជាដើម ហើយផងដែរវាក៏បង្កមកពីការប្រើប្រាស់ Smartphone ដែរ។ ការលើកដៃចុះឡើងប្រើទូរសព្ទច្រើនហួសនឹងធ្វើឲ្យរលាក ឬ ហើមសន្លាក់ដៃ និងស្ពឹកស្រពន់ជាដើម។

៤. ផលប៉ះពាល់ភ្នែក

មនុស្សភាគច្រើនតែទម្លាប់មើល Smartphone ដូចជាលេង ហ្គេម Facebook និងការងារផ្សេងទៀតមុនពេលចូលគេង។ ប៉ុន្តែអ្នកធ្លាប់គិតទេថាការធ្វើបែបនេះវាបង្កនូវផលប៉ះពាល់ដល់យើង។ យោងតាមរបាយការណ៍កាលពីប៉ុន្មានឆ្នាំថ្មីៗនេះបានបង្ហាញថាទម្លាប់មើលទូរសព្ទ Smartphone មុនពេលចូលគេងគឺវាបានបង្កនូវផលប៉ះពាល់ដំណេកដូចជាការដេកមិនលក់ ហើយជាពិសេសទៅទៀតនោះគឺវានឹងបង្កផលប៉ះពាល់ធ្ងន់ដល់ភ្នែក។ ជាមួយគ្នានេះដែរគេហទំព័រ Businessinsider ក៏បានធ្វើការរាយការណ៍ផងដែរថា ភ្លើងពណ៌ខៀវដែលចេញពីឧបករណ៍អេឡិចត្រូនិកគឺវាបានបង្កបញ្ហាទៅលើសុខភាពរាងកាយនិងផ្លូវចិត្ត រួមទាំងជំងឺភ្នែកឡើងបាយ ការធ្លាក់ចុះសមត្ថភាពភ្នែក និង មានហានិភ័យខ្ពស់នៃការកើនឡើងនៃជំងឺមហារីក៕

អត្ថបទ៖ ស៊ិន សាវ៉េត