ភាពយន្តភាគកូរ៉េទាំង ១០នេះចាត់ជារឿងចំណាយទុនផលិតច្រើនជាងគេបង្អស់ជាប្រវត្តិសាស្ត្រ
- 2018-09-20 04:58:02
- ចំនួនមតិ 0 | ចំនួនចែករំលែក 0
ភាពយន្តភាគកូរ៉េទាំង ១០នេះចាត់ជារឿងចំណាយទុនផលិតច្រើនជាងគេបង្អស់ជាប្រវត្តិសាស្ត្រ
ចន្លោះមិនឃើញ
ទម្រាំក្លាយជារឿងទទួលបានការគាំទ្រច្រើនពីសំណាក់អ្នកទស្សនាទូទាំងពិភពលោក ក្រុមការងារត្រូវចំណាយអស់ដើមទុនជាច្រើន ដើម្បីសម្រិតសម្រាំងធ្វើយ៉ាងណាឲ្យកុនរបស់ខ្លួនពិសេស មិនចេះសាបរលាប។
ប្រិយមិត្តច្បាស់ជាចង់ជ្រាប ថាតើភាពយន្តកូរ៉េល្បីណាខ្លះ បានចំណាយលុយផលិតអស់ច្រើនបំផុតប្រចាំប្រវត្តិសាស្ត្រនោះ សូមមកដឹងដូចតទៅ៖
១. រឿង "Mr. Sunshine” ចំណាយអស់ ២៧,៨លានដុល្លារ
ជារឿងភាគថ្មីរបស់ទូរទស្សន៍ SBS បង្ហាញពីបុរសម្នាក់ដែលបានហោះហើរទៅសហរដ្ឋអាមេរិក អំឡុងឆ្នាំ ១៨៧១ ហើយក្រោយមកក៏បានត្រឡប់មកកាន់ទឹកដីកំណើតវិញ ក្នុងនាមជាទាហានអាមេរិក និងបានធ្លាក់ក្នុងអន្លង់ស្នេហ៍កូនស្រីមកពីគ្រួសារអភិជនម្នាក់។ រឿងនេះសម្ដែងដោយ កំពូលតារាសម្ដែង Lee Byung Hun, Kim Tae Ri និង Yoo Yeon Seok។
២. រឿង "Vagabond” ចំណាយអស់ ២៣,២លានដុល្លារ
ស្នាដៃសម្ដែងរបស់ Lee Seung Gi និង Suzy នេះនិយាយពីបុរសសាមញ្ញម្នាក់ដែល ជាប់ពាក់ព័ន្ធនឹងរឿងរ៉ាវធ្លាក់យន្តហោះ និងអំពើពុករលួយ។ រឿងនេះត្រៀមខ្លួនចាក់បញ្ចាំង ឆ្នាំ ២០១៩។
៣. រឿង "Saimdang, Memoir of Colors” ចំណាយអស់ ១៩,៨លានដុល្លារ
ខ្សែភាពយន្តសម្ដែងដោយ Lee Young Ae និង Song Seung Hun នេះទទួលបានការគាំទ្រច្រើនពីទស្សនិកជននៅអាស៊ី។ រឿងភាគបុរាណនេះ ផ្ដើមនិយាយដំបូងពីសាស្ត្រាចារ្យប្រវត្តិសាស្ត្រកូរ៉េម្នាក់បានរកឃើញកំណត់ត្រា ដែលកប់អស់រយៈពេលជាយូរ ទាក់ទងនឹងប្រវត្តិសាស្ត្រកាលពីសម័យ Joseon។ រឿងនេះបានឆ្លុះបញ្ចាំងពីជីវិតរស់នៅ ២សម័យពោល នៅពេលបច្ចុប្បន្ន និងអតីតកាលសតវត្សរ៍ទី ១៦។
៤. រឿង "Kingdom” ចំណាយអស់ ១៨,៥លានដុល្លារ
និយាយពីដំណើរជីវិតរបស់ព្រះអង្គម្ចាស់គ្រងរាជ្យមួយអង្គក្នុងសម័យ Joseon ដែលបង្កប់រឿងរ៉ាវអាថ៌កំបាំងយ៉ាងច្រើនស្មានមិនដល់។ រឿងនេះសម្ដែងដោយ តារាសម្ដែង Joo Ji Hoon,Ryu Seung Ryong និង Bae Doo Na។
៥. រឿង "Iris 2” ចំណាយអស់ ១៨,៥លានដុល្លារ
ជាភាគបន្តពីរឿង "Iris” ឆ្នាំ ២០០៩ ដែលនិយាយពីក្រុមសន្តិសុខជាតិ ដែលប្រឆាំងក្រុមបះបោលមួយក្រុម។ ជំនាន់ថ្មី ឆ្នាំ ២០១៣នេះ សម្ដែងដោយ Jang Hyuk, Lee Da Hae និង Oh Yun Soo។
៦. រឿង "Criminal Minds” ចំណាយអស់ ១៨,៥លានដុល្លារ
នេះជារឿងភាគឆ្នាំ ២០១៧ ដែលចំណាយទុនផលិតអស់ច្រើនគួរសម និងដកស្រង់សាច់រឿងចេញពីរឿងភាគអាមេរិក មានចំណងជើង "Criminal Minds” ដូចគ្នា។ សម្ដែងដោយតារាសម្ដែង Lee Joon Ki, Son Hyun Joo និង Moon Chae Won
៧. រឿង "Moon Lovers: Scarlet Heart Ryeo” ចំណាយអស់ ១៣,៦លានដុល្លារ
នៅប្រទេសកូរ៉េ រឿងភាគ ឆ្នាំ ២០១៦នេះមានអ្នកគាំទ្រមធ្យម ប៉ុន្តែល្បីភ្លូកទឹកភ្លូកដី នៅបរទេស។ ខ្សែភាពយន្តភាគបុរាណនេះ មានការចូលរួមសម្ដែងដោយតារាប្រុសស្រីល្បីៗឈ្មោះជាច្រើនដូចជា Lee Jong Ki, IU, Kang Ha Neul, Hong Jong Hyun, Baekhyun សមាជិកក្រុម EXO, Nam Joo Hyuk, Ji Soo និងតារាក្មេងៗជាច្រើនទៀត។
៨. រឿង "Goblin” ចំណាយអស់ ១៣,២លានដុល្លារ
ខ្សែភាពយន្តចាក់បញ្ចាំងដំបូងនៅចុងឆ្នាំ ២០១៦ និងបញ្ចប់ដើមឆ្នាំ ២០១៧នេះ បានទាក់ចិត្តអ្នកមើលមិនធម្មតា ហើយបានក្លាយជារឿងភាគល្បីអស្ចារ្យចាប្រវត្តិសាស្ត្ររបស់ទូរទស្សន៍ tvN ។ រឿងនេះនិយាយពីបុរសម្នាក់ដែលមានអាយុរាប់រយឆ្នាំ ព្យាយាមស្វែងរកនារីដែលព្រហ្មលិខិតចារឲ្យមកជាកូនក្រមុំ ដើម្បីមកទាញដាវចេញពីខ្លួន ក្រោយត្រូវបណ្ដាសារ និងរងទុក្ខអស់រយៈពេលជាយូរ។ សម្ដែងដោយ Gong Yoo, Kim Go Eun, Lee Dong Wook, Yoo In Na និង Yook Sung Jae។
៩. រឿង "Descendants of the Sun” ចំណាយអស់ ១០,៨លានដុល្លារ
ជាខ្សែភាពយន្តដែលល្បីរន្ទឺ ស្ទើរពាសពេញពិភពលោក ក្រោយសម្រិតសម្រាំងក្នុងការផលិតអស់រយៈពេលជាយូរ និងចំណាយលុយអស់ជាង ១០,៨លានដុល្លារ។ "Descendants of the Sun” ឬ "ម្ចាស់ព្រះអាទិត្យ” និយាយពីជីវិតតស៊ូ និងអំណត់របស់ទាហាន និងគ្រូពេទ្យ ដែលព្យាយាមជួយមនុស្សពីគ្រោះថ្នាក់ផ្សេងៗ ពិសេសក៏បង្ហាញពីរឿងរ៉ាវស្នេហារបស់តួស្រីដែលជាគ្រូពេទ្យ និងទាហានទ័ពពិសេសអង់អាចដែរ។ រឿងភាគឆ្នាំ ២០១៦នេះ សម្ដែងជាតួឯកដោយប្ដីប្រពន្ធតារាសម្ដែង Song Joong Ki និង Song Hye Kyo។ ១០. រឿង "Are You Human Too?” ចំណាយអស់ ៩,២៣លានដុល្លារ
រឿងនេះបានចំណាយពេលផលិតអស់រយៈពេលដល់ទៅ ២ឆ្នាំឯណោះ ហើយវាជាភាពយន្តដែលនិយាយពីមនុស្សយន្ត មួយបន្លំធ្វើជាកូនរបស់គ្រួសារអ្នកមាន នៅពេលកូនប្រុសឈ្មោះ Nam Shin នោះសន្លប់បាត់ស្មារតី។ រឿងភាគឆ្នាំ ២០១៨ នេះសម្ដែងដោយ Seo Kang Joon និង Gong Seung Yeon៕