Facebook ខាតបង់ចំនួនអ្នកប្រើប្រាស់មិនស្ទើរ ដោយសារគូប្រជែងធំបំផុតទាំង ៥ នេះ

2018-09-27 12:40:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្វីបើកំពុងបម្រើសេវាកម្មជាមួយអ្នកប្រើប្រាស់ជាង ២ ពាន់លានគណនីលើបណ្ដាញសង្គម ក្រុមហ៊ុន Facebook នៅតែបន្តព្យាយាមរុករកអ្វីដែលថ្មី និងដំណោះស្រាយលើបញ្ហាធ្លាប់កើតមាន ជៀសវាងចាញ់ប្រៀបគូប្រជែងរបស់ខ្លួនដែលកំពុងទទួលការគាំទ្រពីសំណាក់អ្នកប្រើប្រាស់។ មានបណ្តាញសង្គម ៥ ផ្សេងទៀត ក៏ផ្ទុះភាពល្បីល្បាញមិនចាញ់ស្ថាប័នគ្រប់គ្រងរបស់លោក Mark Zuckerberg។

១.Instagram:

ថ្វីបើបច្ចុប្បន្នស្ថិតក្រោមការគ្រប់គ្រងរបស់ Facebook ប៉ុន្តែយុវវ័យភាគច្រើនមានទំនោរលើការប្រើប្រាស់បណ្តាញសង្គមដ៏ធំមួយនេះ ពោលជាគូប្រជែងដណ្តើមតួលេខអ្នកប្រើខ្លាំងបំផុត។ ចំណុចពិសេសនៅលើ IG ហាក់ធ្វើឲ្យអ្នកប្រើមានអារម្មណ៍ថាសាមញ្ញជាងនិងផ្តោតលើការចែករំលែករូបភាពជាធំ។

២.Snapchat:

ល្បីខ្លាំងពីសំណាក់អ្នកប្រើនៅទឹកដីសហរដ្ឋអាមេរិក ដោយមានមុខងារអនុញ្ញាតឲ្យអ្នកប្រើចែករំលែកទៅកាន់តែគោលដៅមនុស្សបានកំណត់ និងពុំមែនតែមិត្តភ័ក្ដិជាប់គណនីទាំងស្រុង។ ពិសេសជាងនេះរូបភាពដែលអ្នកបង្ហោះឬផ្ញើចេញ នឹងបង្ហាញឲ្យអ្នកទទួលអាចឃើញត្រឹមមួយរយៈពេលខ្លី ហើយរូបនោះនឹងបាត់ទៅវិញនៅពេលបន្ទាប់ដោយស្វ័យប្រវត្តិ។

៣.LinkedIn:

ជាគេហទំព័របណ្តុំវេទិកាប្រមូលផ្តុំការបង្ហាញជំនាញវិជ្ជាជីវៈរបស់អ្នកប្រើប្រាស់ ដោយក្រុមហ៊ុននានាបានប្រើប្រាស់បណ្តាញសង្គម LinkedIn ដើម្បីស្វែងរកបុគ្គលិក ពោលទៅថ្ងៃមុខគេហទំព័រនេះនឹងជះឥទ្ធិពលកាន់តែខ្លាំងឡើងសម្រាប់វិស័យស្វែងរកការងារនាពេលអនាគត។

៤.Google:

ក្រុមហ៊ុនមេ Alphabet ក៏ធ្លាប់ប៉ុនប៉ងចង់ទិញយកទំហំអ្នកប្រើប្រាស់របស់ Facebook តាមរយៈប្រព័ន្ធផ្សព្វផ្សាយខ្លួន ថ្វីបើតួលេខអ្នកប្រើមានទំហំតិចជាង ប៉ុន្តែការប្រកួតប្រជែងលើការដាក់ផ្ទាំងផ្សព្វផ្សាយពាណិជ្ជកម្មរវាងក្រុមហ៊ុនយក្សអាមេរិកទាំងពីរ មានភាពស្វិតស្វាញខ្លាំងដើម្បីចង់ដណ្តើមចំណែកទីផ្សារ។

៥.Twitter:

តារាល្បីៗភាគច្រើនរមែងប្រើប្រាស់បណ្តាញសង្គម Twitter ដើម្បីភ្ជាប់ទំនាក់ទំនងជាមួយក្រុមអ្នកគាំទ្រ ប៉ុន្តែចំណុចពិសេសរបស់បណ្ដាញសង្គមនេះមិនអាចប្រៀបធៀបនឹងគូប្រជែងកំពូលដទៃទៀតបានឡើយ។