Grab និង Mastercard សហការគ្នាចេញគណនីបង់ប្រាក់មុន សម្រាប់ប្រជាជនអាស៊ីអាគ្នេយ៍

2018-10-30 10:06:18
ចំនួនមតិ 0 | ចំនួនចែករំលែក 0

ចន្លោះមិនឃើញ

Grab កម្មវិធីផ្ដល់សេវាកម្មតាមអនឡាញទៅសេវាកម្មដោយផ្ទាល់ (O2O) និងក្រុមហ៊ុន Mastercard បានប្រកាសភាពជាដៃគូ កាលពីថ្ងៃទី២៥ តុលា ដើម្បីដាក់ឲ្យដំណើរការប័ណ្ណបង់ប្រាក់មុន ដោយបង្កើតឡើងសម្រាប់តំបន់អាស៊ីអាគ្នេយ៍ ដែលមានការអភិវឌ្ឍលឿន និងមានប្រជាជនជាង ៦៤០លាននាក់ ភាគច្រើននៅតែប្រើក្រដាសប្រាក់នៅឡើយ។

តាមរយៈភាពជាដៃគូនេះ Grab នឹងចេញប័ណ្ណបង់ប្រាក់មុន ជាប្រភេទប័ណ្ណនិម្មិត និងប័ណ្ណរូបវន្តជាក់ស្ដែង ដោយអ្នកប្រើអាចបញ្ចូលប្រាក់ទៅក្នុងប័ណ្ណរបស់ខ្លួន ដើម្បីចាយវាយនៅតាមទីតាំងអាជីវករ ណាដែលទទួលយកប័ណ្ណ Mastercard ទាំងការចំណាយតាមលើអនឡាញ និងនៅទីតាំងផ្ទាល់ទូទាំងពិភពលោក។

លោក Reuben Lai នាយកគ្រប់គ្រងហិរញ្ញវត្ថុជាន់ខ្ពស់របស់ Grab បាននិយាយថា ភាពជាដៃគូនេះ មិនត្រឹមតែពង្រឹងតួនាទីក្នុងនាមជាក្រុមហ៊ុនឈានមុខផ្នែកបច្ចេកវិទ្យាប៉ុណ្ណោះទេ តែក៏ផ្ដល់លទ្ធភាពដល់ប្រជាជនក្នុងតំបន់ ៤០០លាននាក់ ដែលគ្មានគណនីធនាគារ និងអ្នកដែលទទួលបានសេវាតិចតួច បានទិញទំនិញ និងសេវាកម្មនានាតាមអនឡាញផងដែរ។

អ្នកប្រើប្រាស់នៅក្នុងតំបន់ទាំងអស់ អាចដាក់ពាក្យសុំបើកគណនីបង់ប្រាក់ជាមុនដោយផ្ទាល់ពីកម្មវិធី Grab ហើយទទួលបានប័ណ្ណនិម្មិតមួយនៅក្នុងគណនី GrabPay របស់ខ្លួន។ រីឯការបញ្ចូលប្រាក់ទៅក្នុងប័ណ្ណអាចធ្វើទៅបានជាមួយសហគ្រិនខ្នាតតូចរបស់ Grab ដែលមានជាង ៨លាននាក់។

លោកស្រី Rama Sridhar អនុប្រធានប្រតិបត្តិផ្នែកឌីជីថល និងភាពជាដៃគូ និងលំហូរការទូទាត់ថ្មីរបស់ Mastercard បានលើកឡើងថា សហការជាមួយ Grab ពិតជាបានបង្កើនវិសាលភាពក្នុងតំបន់អាស៊ីអាគ្នេយ៍ ហើយស្របតាមគោលដៅរបស់ក្រុមហ៊ុនក្នុងការពង្រីកសេវាទូទាត់ឌីជីថលដល់អ្នកប្រើប្រាស់ និងពាណិជ្ជករទាំងអស់។

Grab និង Mastercard រំពឹងថានឹងផ្តល់ជូនប័ណ្ណគណនីនេះ នៅឆមាសទីមួយ ឆ្នាំ ២០១៩ ដោយចាប់ផ្ដើមដំបូងក្នុងប្រទេសសិង្ហបុរី និងហ្វីលីពីន ដែលសិង្ហបុរីតំណាងឲ្យប្រទេសដែលមានប្រជាជនប្រើគណនីធនាគារច្រើនជាងគេបំផុត (៩៨%) ហើយហ្វីលីពីនមានប្រជាជនប្រើគណនីធនាគារតិចជាងគេបំផុត (៣៤%) ក្នុងតំបន់អាស៊ីអាគ្នេយ៍។

សម្រាប់ព័ត៌មានបន្ថែម ចូលទៅវិបសាយ www.grab.com៕

អត្ថបទ៖ វិទូ

ពាក្យទាក់ទង