គង់ សំបូរ រំភើបស្ទើរនិយាយមិនចេញរឿងបានទៅសង្វៀន ONE
- 2018-12-18 02:32:23
- ចំនួនមតិ 0 | ចំនួនចែករំលែក 0
គង់ សំបូរ រំភើបស្ទើរនិយាយមិនចេញរឿងបានទៅសង្វៀន ONE
ចន្លោះមិនឃើញ
បន្ទាប់ពីត្រូវបានស្ថាប័នប្រដាល់កំពូលប្រចាំតំបន់អាស៊ី One Championship ចុះកុងត្រាដើម្បីបង្ហាញសមត្ថភាពលើឆាកអន្តរជាតិ អ្នកប្រដាល់កម្ពុជា គង់ សំបូរ មានអារម្មណ៍រំភើបរីករាយយ៉ាងខ្លាំងដែលទទួលបានឱកាសដ៏កម្រនេះដែលធ្វើឲ្យរូបគេស្ទើររកពាក្យមករៀបរាប់ឲ្យសមនឹងទំហំរីករាយបានឡើយ។
សំបូរបាននិយាយថា នៅពេលទទួលបានដំណឹងល្អពី ONE ភ្លាម រូបគេពិតជារំភើបខ្លាំងណាស់ ។ សូម្បីតែក្រុមគ្រូបង្វឹក និងគ្រួសារក៏រីករាយដែរ។ «ខ្ញុំសប្បាយចិត្ត ស្ទើរនិយាយមិនចេញ! បើម៉ាក់ខ្ញុំពេលគាត់ឮថា ខ្ញុំបានទៅវ៉ៃនៅស្រុកក្រៅអីចឹង វិញគាត់យំតែម្តង។ ម៉ាក់ប៉ាតែងលើកទឹកចិត្តខ្ញុំរហូត ពេលដែលខ្ញុំប្រកួតម្តងៗ។ ពួកគាត់តែងប្រាប់ឲ្យខ្ញុំប្រឹងហាត់ប្រកួតឲ្យបានល្អ កុំឲ្យចាញ់គេ»។
ទោះជាមានការគាំទ្រច្រើនពីគ្រួសារ បងប្អូនជាហូរហែក៏ដោយ ក៏មិនបានធ្វើឲ្យអ្នកលេងគុនខ្មែរវ័យ២៣ឆ្នាំរូបនេះសប្បាយភ្លេចខ្លួនឡើយ។ ផ្ទុយទៅវិញរូបគេបានប្រមូលអារម្មណ៍ និងហ្វឹកហាត់ជានិច្ចដើម្បីត្រៀមប្រកួតនាពេលខាងមុខ ជាពិសេសចំពោះអ្នកដែលបានមើលងាយរូបគេ។
«ខ្ញុំចង់ឲ្យអ្នកដែលធ្លាប់មើលងាយខ្ញុំពីមុន ទទួលស្គាល់ថាខ្ញុំអាចមានសមត្ថភាពទៅវ៉ៃក្រៅប្រទេសបាន។ គេថាខ្ញុំគ្មានសំណាងបានទៅប្រកួតនៅក្រៅដូចគេទេ ឥឡូវក្តីស្រម៉ៃខ្ញុំក្លាយជាការពិតហើយ មានអីត្រូវនិយាយទៀត?»
«ខ្ញុំទៅប្រកួតនៅក្រៅប្រទេស គឺដើម្បីឲ្យគេទទួលស្គាល់ថាក្បាច់គុនខ្មែរយើងមានឈ្មោះបោះសំឡេងដូចគេដូចឯង។ លោកគ្រូខ្ញុំចង់ឲ្យខ្ញុំឈ្នះ ហើយឲ្យមានឈ្មោះល្បី គាត់ឲ្យខ្ញុំប្រឹងហាត់ ព្យាយាមឲ្យកាន់តែល្អជាងមុន»។
ថ្វីបើពេលនេះកីឡាករដែលប្រើជើងទាត់បានល្អមិនទាន់បានដំណឹងច្បាស់ថា ត្រូវបង្ហាញខ្លួនប្រកួតពេលណា ក៏រូបគេបានហ្វឹកហាត់ត្រៀមកម្លាំងរួចជាស្រេច ដើម្បីរង់ចាំមើលគូប្រកួតដែលគេរៀបចំឲ្យជានិច្ច។ «ខ្ញុំត្រៀមរួចតាំងពីមួយខែមុនម្លេះ! ខ្ញុំត្រៀមរួចហើយ!»។
គង់ សំបូរ ជាកីឡាករមួយក្នុងចំណោមកីឡាករខ្មែរមួយចំនួនដែលត្រៀមបង្ហាញខ្លួនសង្វៀន ONE Super Series នាពេលខាងមុខនេះ។ ចាប់ផ្តើមហាត់ប្រដាល់តាំងពីក្មេង រូបគេពិតជាទទួលឥទ្ធិពលពីអតីតជើងខ្លាំងគុនខ្មែរជាច្រើនដែលធ្វើឲ្យរូបគេយកគន្លងតាម។
សំបូរប្រាប់ថា ៖«កាលពីតូចខ្ញុំស្រលាញ់ប្រដាល់! ពីជំនាន់នោះមានលោកគ្រូ អេ ភូថង និងធន់ សុភា ជាដើម ពួកគាត់ល្បីពេលឡើងវ៉ៃម្តងៗ មានគេចាប់អារម្មណ៍ខ្លាំងណាស់ ពីព្រោះពួកគាត់ពិតជាខ្លាំង ហើយយូរៗទើបមានប្រដាល់អន្តរជាតិម្តង»។
សុខ ធី បានក្លាយជាកីឡាករកម្ពុជាទី១ដែលបានប្រកួតប្រដាល់សេរីនៅសង្វៀន ONE Super Series របស់ ONE បន្ទាប់ពីកីឡាករ កីឡាការិនីជាច្រើនបានប្រកួតជាលក្ខណៈគុនចម្រុះ MMA៕