ចាន់ រតនា ធ្លាប់យំសោកស្តាយពានរង្វាន់មានប្រាក់ជិត៥ពាន់ដុល្លារនៅសង្វៀន ONE
- 2019-03-29 03:35:46
- ចំនួនមតិ 0 | ចំនួនចែករំលែក 0
ចាន់ រតនា ធ្លាប់យំសោកស្តាយពានរង្វាន់មានប្រាក់ជិត៥ពាន់ដុល្លារនៅសង្វៀន ONE
ចន្លោះមិនឃើញ
«រឿងខ្ញុំមិនអាចបំភ្លេចបានគឺ ពេលអាជ្ញាកណ្ដាលឲ្យខ្ញុំចាញ់ សំអាង ឌុន ដោយគិតថាខ្ញុំវ៉ៃខុសបច្ចេកទេសឃាត់មិនទាន់។ ខ្ញុំយំ ខ្ញុំតូចចិត្តយូរដែរ ចំពោះលទ្ធផល ដែលខ្ញុំត្រូវឈ្នះពានរង្វាន់មានតម្លៃជិត៥ពាន់ដុល្លារកាលឆ្នាំ២០១៤»។ នេះជាការរំលឹករបស់ ចាន់ រតនា ក្នុងអាជីពប្រកួតគុនចម្រុះនៅសង្វៀន One។
គ្រូបង្វឹកក្លឹបប្រដាល់សិល្បៈ រំលឹកថា កាលនោះស្ថាប័នកម្រិតពិភពលោក One Championship មករៀបចំប្រកួតលើកដំបូងនៅកម្ពុជានៅឆ្នាំ ២០១៤ ដោយតម្រូវឲ្យមានកីឡាករខ្មែរ២គូប្រកួត ហើយ អ្នកឈ្នះឡើងទៅជួបអ្នកឈ្នះដើម្បីពានរង្វាន់។ រូបគេបានវ៉ៃឲ្យ ប្រាក់ ចាន់ស៊ីន លើកទង់ជ័យសនាទឹកទី១ប្រកួតដំបូង ខណៈ សំអាង ឌុន ឈ្នះ ជិន ហេង ទឹកទី១ដូចគ្នា។ ដូច្នេះរូបគេត្រូវប៉ះ ឌុន សំអាង នៅវគ្គផ្តាច់ព្រ័ត្រ។ ការប្រកួតផ្តាច់ព្រ័ត្រ រូបគេបាន វ៉ៃខុសបច្ចេកទេសនៅទឹកទី១ ទើបធ្វើឲ្យពានរង្វាន់លើកដំបូងរបស់ One ធ្លាក់ទៅលើ សំអាង ឌុន ឆ្នាំ ២០១៤។
អ្នកប្រយុទ្ធក្បាច់គុនយុទ្ធក្រមខម បានបញ្ជាក់ទៀតថា ៖«កាលហ្នឹង ខ្ញុំគ្មានចេតនា ខ្ញុំដួលអស់ជំហរក៏ត្រូវ សំអាង ឌុន បន្ទាប់ឌុន គេលែងវ៉ៃ ហើយ អាជ្ញាកណ្ដាលកាត់ក្ដីឲ្យគេឈ្នះខ្ញុំតែម្ដង។ ខ្ញុំតូចចិត្តខ្លាំងណាស់ ខ្ញុំយំលំបាកចិត្តខ្លាំងក្រោយពេលប្រកួតចប់»។ យ៉ាងណាក៏ដោយ អ្នកទាំងពីរត្រូវគណៈកម្មការផ្គូផ្គងឲ្យប្រកួតជាថ្មីក្នុងនាមជាគូសងសឹក នៅខែធ្នូ ឆ្នាំ ២០១៥។ ទីបំផុត ជើងខ្លាំង ចាន់ រតនា សងសឹកបានសម្រេចដោយប្រើពេលត្រឹមទឹកទី១ វ៉ៃឲ្យ ឌុន សំអាង ចុះចាញ់ដោយអស់ចិត្ត។
ក្រៅពីរឿងសោកស្តាយខាងលើ ចាន់ រតនា មានរឿងបន្ទាប់បន្សំមួយទៀតដែលដក់ជាប់ក្នុងចិត្តនៅសង្វៀនលំដាប់ពិភពលោកគឺ ពេលអាជ្ញាកណ្ដាលប្រកាសឲ្យចាញ់កីឡាករចិន Haobin Ma កាលឆ្នាំ ២០១៦ ដែលរៀបចំនៅម៉ាកាវ។ អ្នកលេងគុនខ្មែររូបនេះសង្កត់ធ្ងន់ថា ៖«មិនគួរណា Haobin Ma ឈ្នះខ្ញុំទេ ព្រោះគេស៊ីខ្ញុំបានត្រឹម ទឹកទី១ តែទឹកទី២ មិនប៉ុន្មានដែរ ហើយទឹកទី៣ ខ្ញុំដេញវ៉ៃរហូត បែរជាចាញ់ទៅវិញ។ ខ្ញុំបានមើលវីដេអូឡើងវិញទៀតផង។ បើថ្ងៃក្រោយគេដាក់ឲ្យសងសឹក ខ្ញុំនឹងអាចឈ្នះ Haobin Ma ជាមិនខានទេ»។
គិតត្រឹមពេលនេះ ចាន់ រតនា ឡើងសង្វៀន ប្រកួតគុនចម្រុះបាន៨ ដង ដោយឈ្នះ៥ និង ចាញ់៣ ដង។ រូបគេប្រកួតលើកដំបូងជាអន្តរជាតិ នៅសង្វៀន One តែម្ដងពេលរៀបចំនៅព្រះរាជាណាចក្រកម្ពុជាកាលឆ្នាំ ២០១៤ ពេល អាជ្ញាកណ្ដាលផ្ដល់ ឲ្យ ឌុន សំអាង ឈ្នះដែលគេគិតថា រតនា ប្រកួតខុសបច្ចេកទេស។ ចំណែកប្រកួតចុងក្រោយរូបគេធ្វើឲ្យខ្ពស់មុខមាត់ និង ទទួលបានការចាប់អារម្មណ៍ជាសាកលដោយវ៉ៃកីឡាករគុនចម្រុះ ABRO Fernandez របស់ឥណ្ឌូណេស៊ី ឲ្យចុះចាញ់ត្រឹមទឹកទី២ កាល ខែ ធ្នូ ឆ្នាំ ២០១៨ កន្លងទៅនៅប្រទេសម៉ាឡេស៊ី៕