អ៊ូច ធារិទ្ធ ធ្វើឲ្យកក្រើកកម្មវិធីថ្មី វើកសង្វៀនគុនខ្មែរ របស់បាយ័នយប់មិញ

2019-06-02 07:18:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់វ័យក្មេង អ៊ូច ធារិទ្ធ ធ្វើឲ្យអ្នកគាំទ្រពេញចិត្តខ្លាំង និងហើបគូថពីកៅអីអង្គុយតែម្ដង ស្រែកហ៊ោទៅតាមចង្វាក់ប្ដូរទៅប្ដូរមក យប់មិញនេះក្នុងថ្ងៃបើកឆាកសង្វៀនថ្មី វើក របស់ស្ថានីយទូរទស្សន៍បាយ័ន។

អ៊ូច ធារិទ្ធ

ធារិទ្ធ ប្រើពេលត្រឹម៣ទឹកប៉ុណ្ណោះក្នុងការផ្ដួលដៃគូដែលជាជនជាតិមីយ៉ាន់ម៉ា ក្នុងជំនួបមិត្តភាពអន្តរជាតិសង្វៀនវើក។ កីឡាករ Phadam ក៏ដូចជា អ៊ូច ធារិទ្ធ គឺមិនបាច់ស្ទាបស្ទង់គ្នាច្រើននោះឡើយ គឺបើកឆាកប្រយុទ្ធខ្លាំងៗតែម្ដង កណ្ដាប់ដៃទៅមក និងទាត់ក្រោមផង លើផងមិនញញើតគ្នាបន្តិច។ កូនសិស្សលោក ធី ណារិទ្ធ ខាងលើនេះ ហាក់ធន់និងស្នៀតរបស់ដៃគូជាង ត្រូវច្រើននៅតែដើរបុកចូល ហើយទាត់កីឡាករមីយ៉ាន់ម៉ាឲ្យឈឺជើង អាជ្ញាកណ្ដាលរាប់នៅចុងទឹកទី២ម្ដង។ ឈានដល់ទឹកទី៣ ធារិទ្ធ បន្តទាត់ជើងអ្នកប្រដាល់ Phadam រហូតអាជ្ញាកណ្ដាលរាប់ពាក់កណ្ដាលទឹកទី៣ម្ដងទៀត ក្រោយមកទៀតក៏សម្រេចបញ្ឈប់ការប្រកួតត្រឹមទឹកនេះតែម្ដងទៅ ព្រោះឃើញកីឡាករមីយ៉ាន់ម៉ា ឈឺខ្លាំងមិនអាចប្រកួតបានទៀតទេ។

អ៊ូច ធារិទ្ធ ឈ្នះម្សិលមិញ

ចំណែកលោក នាង ស៊ីវុត្ថា អ្នកគ្រប់គ្រងប្រដាល់នៅសង្វៀនបាយ័ន បានឲ្យដឹងក្នុងសន្និសីទសារព័ត៌មានបើកកម្មវិធីនោះថា លោកអរគុណដល់ម្ចាស់ឧបត្ថម្ភវើក ដែលមកចូលរួមក៏ដូចជាសហការជាមួយស្ថានីយទូរទស្សន៍បាយ័នជាថ្មី ដើម្បីរួមចំណែកលើកស្ទួយវិស័យប្រដាល់ឲ្យកាន់តែរីកចម្រើន។ ការសហការបង្កើតសង្វៀននេះឡើយ វាបានជួយដល់ជីវភាពកីឡាករ និងជាផ្នែកមួយជួយអភិវឌ្ឍន៍ធនធានដើម្បីត្រៀមនៅពេលកម្ពុជាធ្វើម្ចាស់ផ្ទះកីឡាស៊ីហ្គេមឆ្នាំ២០២៣ ផងដែរ។

លោក នាង ស៊ីវុត្ថា

អ្នករៀបចំកម្មវិធីប្រដាល់របស់បាយ័ន ខាងលើនេះបន្ថែមទៀតថា ខាងស្ថានីយ រួមទាំងសហព័ន្ធ នឹងខំប្រឹងប្រែងរៀបចំការប្រកួតឲ្យបានល្អ និងជក់ចិត្តបំផុត។ ឯកឧត្ដម តែម ម៉ឺន ក៏បានបញ្ជាក់ដល់មន្រ្តីសហព័ន្ធនានាផងដែរថា ត្រូវធ្វើការប្រកបដោយវិជ្ជាជីវៈរបស់ខ្លួន ហើយសហការជាមួយខាងស្ថានីយរួម និងម្ចាស់ឧបត្ថម្ភកម្មវិធីឲ្យបានល្អផងដែរ។

សន្និសីទសារព័ត៌មានម្សិលមិញ

រំលឹកដែរថា កម្មវិធីប្រដាល់វើកសង្វៀនគុនខ្មែរ របស់ស្ថានីយទូរទស្សន៍បាយ័ននេះ បើកឆាកសប្ដាហ៍ទី១របស់ខ្លួនហើយ នាល្ងាចម៉ោង៦ម្សិលមិញនេះនៅស្ទឹងមានជ័យ។ សង្វៀនថ្មីនេះប្រកួតរៀងរាល់ល្ងាចថ្ងៃសៅរ៍នៅស្ទឹងមានជ័យ។ អ៊ូច ធារិទ្ធ ឈ្នះមីយ៉ាន់ម៉ា ទឹកទី៣ ឡុង សុភី ចាញ់ពិន្ទុថៃ ខណៈ ជ័រ ពៅ ឈ្នះ សូត្រ ខេវិន ទឹកទី៣៕

វីដេអូប្រកួត៖

អត្ថបទ៖ នួន ស៊ីណា