ស្ថាបនិក RED បន្ទោសក្រុមហ៊ុនចិន រឿងកាមេរ៉ាទូរសព្ទគុណភាពអន់

2019-07-25 02:30:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាតហ្វូនដំបូងរបស់ក្រុមហ៊ុនផលិតកាមេរ៉ា RED ម៉ូដែល Hydrogen One មិនទទួលបានជោគជ័យនោះទេ។ វាត្រូវបានពន្យារពេលចេញលក់ ហើយពេលចេញលក់វាមានលក្ខណៈសម្បត្តិមិនសូវខ្លាំង និងតម្លៃថ្លៃថែមទៀត។ កាន់តែអាក្រក់នោះ សមត្ថភាពកាមេរ៉ារបស់វាដែលជាចំណុចសំខាន់មួយនោះ មិនមានគុណភាពខ្លាំង ទទួលបានការរិះគន់យ៉ាងចាស់ដៃ ពីអ្នកប្រើដំបូងៗ។

ពេលនេះលោក Jim Jannard ដែលជាស្ថាបនិកក្រុមហ៊ុន RED បានបញ្ចេញសេចក្ដីថ្លែងការណ៍មួយ ដែលលោកបានបញ្ជាក់ថា បញ្ហាទាក់ទងនឹងកាមេរ៉ា គឺមកពីក្រុមហ៊ុនចិនមួយ។ ក្រុមហ៊ុនចិននោះទទួលខុសត្រូវលើការដំឡើងគ្រឿង និងបញ្ចូល Software ជាមួយបន្ទះឈីប Snapdragon 835។ លោក Jim បាននិយាយថា ចង់ឲ្យក្រុមហ៊ុនចិននោះសម្រេចកិច្ចការលើ Hydrogen One គឺពិតជាពិបាកមែនទែន។

ប៉ុន្តែពេលនេះក្រុមហ៊ុន RED បានសហការជាមួយក្រុមហ៊ុនថ្មី ដែលមានសមត្ថភាពគ្រប់គ្រាន់លើការផលិត និងអាចបំពេញតាមការចង់បានរបស់ RED។ លោក Jim ឲ្យតម្រុយថាដង្គុំកាមេរ៉ាសម្រាប់ភ្ជាប់ជាមួយ Hydrogen One ដែលក្រុមហ៊ុនប្រកាសថាចេញកន្លងមក នឹងត្រូវបញ្ចេញឆាប់ៗ ហើយអាចនឹងប្រកាសចេញដំណាលគ្នាជាមួយ Hydrogen Two ផងដែរ៕

ចុចអាន៖

ប្រភព៖ GSMarena ប្រែសម្រួល៖ សុខហេង