ក្រសួងត្រៀមចេញលក់លេខពិសេសផ្ទាល់ខ្លួនសម្រាប់យានយន្ត
- 2019-09-02 06:42:25
- ចំនួនមតិ 0 | ចំនួនចែករំលែក 0
ក្រសួងត្រៀមចេញលក់លេខពិសេសផ្ទាល់ខ្លួនសម្រាប់យានយន្ត
ចន្លោះមិនឃើញ
ក្រសួងសាធារណការឲ្យដឹងថារាជរដ្ឋាភិបាលកម្ពុជាបានអនុញ្ញាតឲ្យមានការចុះបញ្ជីលេខពិសេសផ្ទាល់ខ្លួនដែលមានលេខ ឬ/និងអក្សរឡាតាំងមិនលើសពីប្រាំបីខ្ទង់ ដោយថាដើម្បីបំពេញតម្រូវការម្ចាស់យានជំនិះឲ្យកាន់តែទូលំទូលាយថែមទៀត។
ក្នុងលិខិតជូនដំណឹងមួយស្ដីពីការលក់លេខចុះបញ្ជីពិសេសផ្ទាល់ខ្លួនចុះផ្សាយនៅថ្ងៃទី២ ខែកញ្ញា នេះ ក្រសួងថាខ្លួនបានសិក្សា និងដកស្រង់ពីបទពិសោធន៍ការងារគ្រប់គ្រងការលក់លេខចុះបញ្ជីយានយន្តតាមប្រព័ន្ធបច្ចេកវិទ្យាពីប្រទេសមួយចំនួនដូចជាថៃ សិង្ហបុរី និងទីក្រុងហុងកុង។
តាមរយៈបទពិសោធន៍នេះក្រសួងថាខ្លួនមានជំនឿចិត្តយ៉ាងមុតមាំថាការអនុវត្តការងារលក់លេខចុះបញ្ជីពិសេសផ្ទាល់ខ្លួននាពេលខាងមុខនេះនឹងទទួលបានប្រសិទ្ធភាព និងតម្លាភាពជូនប្រជាពលរដ្ឋ។
ក្រសួងឲ្យដឹងទៀតថាការដាក់ឲ្យដំណើរការប្រព័ន្ធលក់លេខចុះបញ្ជីពិសេសផ្ទាល់ខ្លួននេះអាចនឹងធ្វើឡើងនៅអំឡុងពេលបីខែខាងមុខ ហើយថាខ្លួននឹងជូនដំណឹងមុនយ៉ាងតិចមួយខែដើម្បីធ្វើការផ្សព្វផ្សាយឲ្យបានទូលំទូលាយនៅទូទាំងប្រទេស៕