ចេញគំរូរាង Galaxy Note 20 មានបង្កប់បច្ចេកវិទ្យាពិសេសមួយខុសពី Galaxy S20

2020-02-07 06:07:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Samsung នឹងប្រកាសចេញផ្សាយស្មាតហ្វូន Galaxy S20 នាថ្ងៃទី ១១ កុម្ភៈ ឆ្នាំ ២០២០ នេះ ដោយនៅកម្ពុជាអាចនឹងឈានចូលម៉ោងរំលងអាធ្រាត្រនាថ្ងៃទី ១២ កុម្ភៈ។ រូបរាងបែកធ្លាយជាច្រើនត្រូវបានគេជឿជាក់ថា ៩៩ ភាគរយគឺនឹងដូចទៅជាការពិត ពោលគឺមានសំណុំកាមេរ៉ារាងបញ្ឈរ និងអេក្រង់ចោះរាងរង្វង់មួយនៅកណ្តាល។

ត្បិតមិនទាន់មានការប្រកាស S20 និង S20 Ultra ផងនោះ គេហទំព័រ PhoneArena ក៏ស្រាប់តែបន្តចេញផ្សាយគំរូរាង Galaxy Note 20 ថ្មីមកមួយបន្ថែមទៀត ដែលសំណុំកាមេរ៉ាក្រោយដូចទៅនឹងត្រកូល S មានឡេនសម្រាប់ Zoom កម្រិត 100x។

ប៉ុន្តែចំណុចរសើបគឺត្រង់ផ្នែកអេក្រង់មុខ ដែលវាអាចលែងមានស្នាមឆកទៀតហើយ ពោលគឺប្រើប្រាស់អេក្រង់ផ្ទៃពេញ និងបន្សល់ត្រឹមទីតាំងទុកបង្កប់ Speaker មួយនៅផ្នែកខាងលើបង្អស់តែប៉ុណ្ណោះ។

ចំពោះគ្រាប់កាមេរ៉ាមុខប្រភពជឿថា Samsung នឹងអភិវឌ្ឍដល់បច្ចេកវិទ្យាបង្កប់ Sensor នៅខាងក្រោមអេក្រង់ មិនឲ្យឃើញស្រស់ៗដូចម៉ូឌែលមុនទៀតឡើយ ហើយ Note 20 ក៏នឹងក្លាយជាស្មាតហ្វូនដំបូងក្នុងលោកមានប្រើប្រាស់បច្ចេកវិទ្យានេះដូចគ្នា។

ជុំវិញលក្ខណៈសម្បត្តិគេជឿថា Note 20 នឹងមានប្រើប្រាស់បន្ទះឈីប Qualcomm Snapdragon 865 ឬ Exynos 990 លាយឡំ RAM ទំហំ 12GB និងបង្ហាញខ្លួននៅខែសីហា ឆ្នាំ ២០២០៕

អានអត្ថបទ:

ប្រភព៖ techmoblog ប្រែសម្រួល៖ កៅ រក្សា