អ្នកមមើមិនអីឡើយ តែអ្នកបន្ថែមល្បោយ ធ្វើឱ្យគេផ្អើលពេញភូមិ!

2014-11-21 01:55:24
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន ជិន ពិសី អ្នកខេត្តកំពង់ចាម បានស្រែកឱ្យអ្នកជិតខាងផ្អើលឈូឆរ ក្រោយលោកឮសំឡេងអាសន្នឡើងគ្រលួចមួយ ទាំងកណ្ដាលយប់ជ្រៅ។

ដំណើរដើមទងនៃរឿងគឺបែបនេះ។ ក្រោយពេលជីតាស្លាប់ ពិសី បានទៅគេងកំដរយាយ ព្រោះឪពុកមារបស់លោក មកធ្វើការនៅភ្នំពេញអស់ហើយ។ ពិសីគេងកំដររហូតបានមួយឆ្នាំ ហើយយប់មួយប្រហែលម៉ោងជិត១ លោកយាយរបស់លោក សម្រាន្តមមើឃើញចោរគាស់ទ្វារបន្ទប់ រួចស្រែក "ចោរ...! ចោរ...! ចោរ...!" ឡើងគ្រលួច។

“ខ្ញុំឮសំឡេងស្រែក ចោរ! ចោរ! ចោរ! ស្រួយស្រែស តែស្រែកលក្ខណៈបែបអួលដើមករ ស្រែកអត់ចង់ចេញ។ ខ្ញុំភ័យណាស់បង! ខ្ញុំស្មានមានចោរមែន រួចក៏ស្រែកបន្ទរ ចោរ! ចោរ! ពីរបីដងខ្លាំងៗតែម្ដង"។ យុវជនវ័យ២៣ឆ្នាំរូបនេះបញ្ជាក់ថា ពេលនោះពូម្នាក់ផ្ទះនៅក្បែរ បានបើកភ្លើងអំពូលម៉ែត្រ និងស្រែក ចោរ! ចោរ! បន្ត។ ចំណែកអ៊ំនៅខាងត្បូងផ្ទះវិញ ខំប្រឹងកាន់ផ្គាក់ចាំច្រកទ្វាររបង ក្រែងចោររត់តាមនោះ។

ភ្លាមៗនឹង ស្រាប់តែមានបងប្អូនមកសួរនាំឈូឆរ ចំណែកលោកយាយឯណោះ ប្រឹងងើបធេងធោងចេញពីគ្រែ។ ក្រោយមកទើបដឹងថា លោកយាយដេកមមើ។

"យាយខ្ញុំគាត់ប្រាប់ថា គាត់ដេកមមើតើបង! ចំណែកខ្ញុំដេកអាលាវៗដែរ ចេះតែពួយទាំងមិនបានសួរគាត់។ អ្នកស្រុកគេហួសចិត្តសើចគ្រប់គ្នា"។ ពិសី និយាយបន្ថែម។

ពិសី បញ្ជាក់ទាំងអស់សំណើចថា លោកខ្មាសគេណាស់ ព្រោះត្រូវគេបង្អាប់ ស្ទើរងើបមុខមិនរួច៖ " ល្បីតាំងពីដើមដល់ចុងភូមិ...អ្នកស្រុកបង្អាប់ខ្ញុំ ឱ្យតែជួបមុខខ្ញុំ គេហៅខ្ញុំថា ចោរ! ចោរ! ហាស់ហា! ម្យ៉ាងដែរបង សូម្បីខ្ញុំក៏អស់សំណើចខ្លួនឯងដែរ"។

កាលពីមុន ក្នុងភូមិរបស់លោក សំបូរចោរចូលលួច គោ ក្របី និងម៉ូតូណាស់ ជាពិសេសផ្ទះយាយរបស់លោកតែម្ដង ហេតុនេះហើយ ទើបលោកគិតថាមានចោរមែន។ ពិសី បានបន្ថែម៕