ចឹងតើបានតារាខ្មែរចង់សម្ដែងក្រៅប្រទេសណាស់ រហូតតារាខ្លះហ៊ានទិញសំបុត្រយន្តហោះផ្ទាល់ខ្លួនគឺ...?

2014-09-26 00:00:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងដ៏រសើបបំផុតក្នុងសង្គមសិល្បៈខ្មែរ ដែលតារាស្ទើរតែទាំងអស់និយមចូលចិត្តទៅសម្ដែងនៅក្រៅប្រទេស រហូតដល់តារាមួយចំនួនហ៊ានចំណាយប្រាក់ផ្ទាល់ខ្លួន ដើម្បីទិញសំបុត្រយន្តហោះ គឺនៅឯនាយសមុទ្រអាចរកប្រាក់បានច្រើនតាមរយៈការកាន់ផ្តិល ឬថង់ដើរសុំលុយភ្ញៀវក្រោយពីច្រៀងចប់។

អានអត្ថបទ៖ ឧស្សាហកម្មភាពយន្តខ្មែរចាប់ផ្ដើមជ្រួលច្របល់ ចំពោះការមកដល់ជាថ្មីនៃភាពយន្តថៃ

ប្រភពច្បាស់ការដែលជាអ្នកនាំតារាខ្មែរទៅច្រៀងនៅក្រៅប្រទេសខាងលើអះអាងថា ទង្វើបែបនេះរបស់តារាខ្មែរមិនមែនទើបកើតឡើងនោះឡើយ ពោលគឺកើតឡើងជាយូរមកហើយ។ ប្រភពសុំមិនបញ្ចេញឈ្មោះខាងលើនិយាយថា សិល្បករ សិល្បការិនីខ្មែរ មួយចំនួនបានប្រព្រឹត្តិទង្វើដូច្នេះមែន។

រូបតំណាង

អាកប្បកិរិយាបែបនេះ ពីសំណាក់តារាខ្មែរ ត្រូវបានប្រភពរូបនេះអះអាងថា ធ្វើឱ្យប៉ះពាល់ជាខ្លាំងដល់តារាដទៃទៀតមានក្រមសីលធម៌ល្អ។

ប្រធានសមាគមសិល្បករខ្មែរ លោក សុះ ម៉ាច ធ្លាប់បាននិយាយប្រាប់គេហទំព័រ Sabay ថា ករណីតារាខ្មែរដើរកាន់ផ្តិល ឬថង់សុំលុយភ្ញៀវតាមតុនៅពេលចេញទៅសម្ដែងនៅក្រៅប្រទេស គឺមានមែន ប៉ុន្ដែ មួយចំនួនប៉ុណ្ណោះ។

អានអត្ថបទ៖ មើលទាំងអស់គ្នា តារាណាខ្លះ បញ្ចប់បរិញ្ញាបត្រ ត្រូវនឹងជំនាញសិល្បៈ?

លោក សុះ ម៉ាច បានលើកឡើងដូចទៅនឹងប្រភពខាងលើដែរ គឺមានតារាខ្មែរមួយចំនួនបានធ្វើទង្វើមិនគប្បីដូច្នេះ ខណៈភ្ញៀវដែលអញ្ជើញមកទស្សនាបានទិញសំបុត្រចូលទស្សនារួចទៅហើយ។

ប្រធានសមាគមរូបនេះ បញ្ជាក់ដូច្នេះ៖ "ខ្ញុំទទួលស្គាល់រឿងតារាខ្មែរយើងដើរកាន់ផ្តិល ឬថង់ដើរសុំលុយភ្ញៀវតាមតុពេលពួកគេទៅសម្ដែងនៅក្រៅប្រទេស។ ខ្ញុំមិនដឹងថា ពួកគាត់ធ្វើដូច្នេះមានន័យដូចម្ដេចនោះទេ"។

លោកបន្តថា លើកលែងតែតារាល្បីៗខ្លាំង មានប្រាក់ខែ និង លុយកាក់គ្រប់គ្រាន់មួយចំនួនតូចតែប៉ុណ្ណោះ មិនធ្វើទង្វើដូចខាងលើ។

អានអត្ថបទ៖ កុំហួសចិត្តអី ៧០ លានដុល្លារថតរឿង “មហាអាណាចក្រខ្មែរ” បាត់ស្រមោលពីកម្ពុជាហើយ!

កត្តានាំតារាខ្មែរស្ទើរតែទាំងអស់ចូលចិត្តដើរសុំលុយភ្ញៀវតាមតុពេលចេញទៅសម្ដែងនៅក្រៅប្រទេស ត្រូវបានតារាចម្រៀង និង ជាប្រធានសមាគមសិល្បករខ្មែរខាងលើនិយាយថា បណ្ដាលមកពីកត្តាជីវភាព ព្រោះសិល្បករ សិល្បការិនីខ្មែរភាគច្រើនមិនមានប្រាក់ខែទេ។ ដូច្នេះហើយឱ្យតែមានឱកាសចេញសម្ដែងនៅក្រៅស្រុកពួកគេច្រើនតែរកលុយក្រៅបន្ថែម ដើម្បីត្រឡប់មកស្រុកវិញសល់លុយកាក់ខ្លះ។

លោក សុះ ម៉ាច សង្កត់ធ្ងន់ថា មានសិល្បករ សិល្បការិនីខ្មែរខ្លះ សុខចិត្តចេញថ្លៃសំបុត្រយន្តហោះផ្ទាល់ខ្លួនឱ្យតែបានចេញទៅច្រៀងនៅឯនាយសមុទ្រ ក៏ព្រោះតែរឿងដើរសុំលុយភ្ញៀវនេះឯង។

បើទោះជាប្រភពច្បាស់ការ រួមទាំងប្រធានសមាគមសិល្បករខ្មែរលើកឡើងដូច្នេះក្ដី តារាចម្រៀងល្បីឈ្មោះរបស់ផលិតកម្ម សាន់ដេលោក ឆាយ វីរៈយុទ្ធ អះអាងថា មិនបានដឹងពីបញ្ហាអស់ទាំងនេះទេ។ លោកថាពេលលោកសម្ដែងនៅក្រៅប្រទេសមិនដែលមានរឿងដើរសុំលុយកាក់ភ្ញៀវឡើយ។

អានអត្ថបទ៖ ឆាយ វីរៈយុទ្ធ រំលឹករឿងដែលលោកចងចាំ កើតឡើងនារដូវភ្ជុំកាលនៅស្រុកកំណើត

តារាចម្រៀងល្បីឈ្មោះមានប្រភពមកពីខេត្ត កំពង់ចាមរូបនេះ មិនហ៊ានធ្វើអត្ថាធិប្បាយច្រើនឡើយ ដោយលោកខ្លាចប៉ះពាល់ដល់កេរ្តិ៍ឈ្មោះតារាផ្សេងទៀត ដោយលោកបង្វែរសំនួរឱ្យសួរតារាដទៃទៀត។

លោក ឆាយ វីរៈយុទ្ធ និយាយដោយខ្លីថា៖"ខ្ញុំអត់ដែលដឹងរឿងនេះទេ បងសួរអ្នកផ្សេងទៅមើល ខ្ញុំអត់ហ៊ាននិយាយទេរឿងនេះព្រោះខ្លាចប៉ះពាល់ដល់អ្នកដទៃ"។

តាមការឱ្យដឹងពីប្រភពអ្នកនាំតារាទៅច្រៀងនៅក្រៅប្រទេសខាងលើ ក្រៅតែពីដើរសុំលុយភ្ញៀវតាមតុ ថ្លៃសំបុត្រចូលទស្សនារបស់តារាខ្មែរនៅក្រៅស្រុកបានធ្លាក់ចុះយ៉ាងគំហុក។ កត្តានេះបណ្ដាលមកពីតារាខ្មែរនាំគ្នាសម្រុកទៅសម្ដែងច្រើននៅឯបរទេស៕

អត្ថបទ៖ អ៊ីង សុឡា