អេបូឡា ជំងឺដែលពិភពលោកមិនទាន់មានវ៉ាក់សាំងការពារ តែក្រសួងសុខាភិបាលកម្ពុជាត្រៀមខ្លួនរួចជាស្រេច

2014-11-26 18:15:56
ចំនួនមតិ 0 | ចំនួនចែករំលែក 0

ចន្លោះមិនឃើញ

រហូតមកដល់ពេលនេះ ជំងឺអេបូឡា ដែលកំពុងតែរាតត្បាត គំរាមកំហែងសន្តិសុខសុខភាពសកលខ្លាំងទៅៗ នៅមិនទាន់មានប្រទេសណាមួយរកឃើញវ៉ាក់សាំងការពារបាននៅឡើយ ខណៈដែលក្រសួងសុខាភិបាលកម្ពុជាសព្វថ្ងៃ ដាក់ការការពារ និងបង្ការជំងឺនេះមុនគ្រប់នាទីមិនភ្លេចខ្លួនឡើយ។

ថ្វីត្បិតតែកម្ពុជា និងប្រទេសជិតខាងមួយចំនួន មិនទាន់មានករណីរោគសញ្ញាឆ្លងណាមួយ នៃជំងឺអេបូឡានេះពិតមែន តែក្រសួងសុខាភិបាលកម្ពុជា កំពុងតែដុតដៃដុតជើងត្រៀមលក្ខណៈរួចជាស្រេច មិនធ្វេសប្រហែសឡើយ។

សកម្មភាពវឹកហាត់ត្រៀមទប់ស្កាត់ របស់មន្ត្រីនាយកដ្ឋានប្រយុទ្ធនឹងជំងឺឆ្លង

ឆ្លើយតបទៅនឹងបញ្ហាជំងឺសកល ដែលកំពុងតែផ្ទុះឡើងនេះ ប្រធាននាយកដ្ឋានប្រយុទ្ធនឹងជំងឺឆ្លង លោកវេជ្ជបណ្ឌិត លី សុវណ្ណ បានថ្លែងក្នុងសិក្ខាសាលា ស្ដីអំពីស្ថានភាពនៃការរាតត្បាតជំងឺអេបូឡា ប្រាប់អ្នកសារព័ត៌មានថា៖ ទោះបីជាប្រទេសកម្ពុជាយើង ស្ថិតនៅឆ្ងាយពីតំបន់ដែលជំងឺអេបូឡាកំពុងរាតត្បាតពិតមែន តែពេលនេះខាងក្រសួងសុខាភិបាលបានត្រៀមខ្លួនជានិច្ច។

សព្វថ្ងៃនេះ ខាងក្រសួង បានរៀបចំក្រុមការងារពិសេស ដែលឆ្លងកាត់ការបណ្ដុះបណ្ដាលវគ្គពិសេស ក្នុងការទប់ស្កាត់ជំងឺអេបូឡានេះ ដែលត្រៀមខ្លួនធ្វើការងារនេះពេញ ២៤ម៉ោង រួចជាស្រេច។ ទន្ទឹមគ្នានេះដែរ យើងក៏មានត្រៀមមន្ទីរពិសោធន៍រួចជាស្រេច ក្នុងករណីមានការសង្ស័យ នៃការឆ្លងរោគសញ្ញាជំងឺនេះ ក្រុមការងារនឹងធ្វើការបញ្ជូនទៅទីនោះភ្លាម។ ដោយឡែក នៅតាមច្រកធ្វើដំណើរចេញចូល ប្រលានយន្តហោះអន្តរជាតិភ្នំពេញ ខាងក្រសួងសុខាភិបាល សហការជាមួយក្រុមហ៊ុនទេសចរ តាមរយៈការបំពេញបែបបទត្រួតពិនិត្យសុខភាពនៅតាមយន្តហោះផងដែរ។ លោកវេជ្ជបណ្ឌិត ថ្លែងបន្ថែមដូច្នេះ។

តាមការចង្អុលបង្ហាញ របស់អង្គការសុខភាពពិភពលោក គិតត្រឹមថ្ងៃទី១៦ ខែវិច្ឆិកា ឆ្នាំ២០១៤នេះ ចំនួនករណីជំងឺអេបូឡាសរុប ទូទាំពិភពលោកមាន ១៥១៤៥ ករណី ក្នុងនោះករណីស្លាប់មាន ៥៤២០ ករណី ដែលជាទិន្នន័យខ្ពស់មួយគួរឲ្យព្រួយបារម្ភ ខណៈពេលដែលប្រទេសជឿនលឿនមួយចំនួនមិនទាន់ស្វែងរកឃើញនូវវ៉ាក់សាំងការពារនៅឡើយ។

ក្រសួងសុខាភិបាលកម្ពុជា ក៏បានជូនដំណឹង ដល់បងប្អូនប្រជាពលរដ្ឋ ជាពិសេសអ្នកធ្វើដំណើរមកពីក្រៅប្រទេស ដែលមានរោគសញ្ញា ដូចជា ក្ដៅខ្លួន ក្អក ដកដង្ហើមផុតៗ ឈឺក្បាល ឡើងកន្ទួលលើស្បែក ក្អួតធ្ងន់ធ្ងរ រាគ អាចទំនាក់ទំនងមកលេខ hotline របស់ក្រសួងសុខាភិបាលជាបន្ទាន់បាន តាមរយៈលេខ ១១៥, ០១២ ៤៨៨ ៩៨១, ០៨៩ ៦៦៩ ៥៦៧ ឬ facebook page នាយកដ្ឋានប្រយុទ្ធនឹងជំងឺឆ្លង៕

អត្ថបទ៖ យិន សំបូរ

រូបថត៖ នាយកដ្ឋានប្រយុទ្ធនឹងជំងឺឆ្លង