លេងតុងទីនដូចយក ក ទៅលអន្ទាក់ ដេកតឹងទ្រូង?
- 2014-12-03 15:56:28
- ចំនួនមតិ 0 | ចំនួនចែករំលែក 0
លេងតុងទីនដូចយក ក ទៅលអន្ទាក់ ដេកតឹងទ្រូង?
ចន្លោះមិនឃើញ
តុងទីន ជាប្រព័ន្ធហិរញ្ញវត្ថុមួយប្រភេទដែលកំពុងពេញនិយម និងកំពុងប្រើប្រាស់ដើម្បីបង្វិលឬ សន្សំប្រាក់ក្នុងសង្គមកម្ពុជា ជាពិសេសអ្នកលក់ដូរនៅតាមទីផ្សារ ឬបុគ្គលិកតាមបណ្ដាស្ថាប័នរដ្ឋ ឯកជនមួយចំនួន ប៉ុន្តែប្រព័ន្ធហិរញ្ញវត្ថុមួយនេះត្រូវបានគេប្រដូចទៅល្បែង ព្រោះដោយសារមានបោកប្រាស់គ្នា។ យ៉ាងណាមិញយោងតាមអ្នកជំនាញ តុងទីន មានប្រយោជន៍កាលណាយើងចេះប្រើឲ្យបានត្រឹមត្រូវ។
ខាងក្រោមនេះជាបទសម្ភាសន៍កន្លងមករវាង Sabayជាមួយលោក ច័ន្ទ សុផល ប្រធានសមាគមសេដ្ឋកិច្ចកម្ពុជា ពាក់ព័ន្ធនឹងតុងទីន៖
Sabay ៖ ជម្រាបសួរ! លោក សុផល តើអ្វីទៅជាតុងទីន?
លោក ច័ន្ទ សុផល៖ តុងទីនមិនមែនជាល្បែងលេងយកចាញ់ឈ្នះទេ តែវាជាប្រព័ន្ធហិរញ្ញវត្ថុមួយប្រភេទដ៏ល្អ ដើម្បីសន្សំប្រាក់។
Sabay ៖ តើលោកអាច ជម្រាបបន្តិចបានទេ ពីរបៀបលេងតុងទីន?
លោក ច័ន្ទ សុផល៖ តុងទីន ជាការសហការដាក់ប្រាក់រួមគ្នា ហើយអ្នកណាត្រូវការប្រាក់មុនយកទៅប្រើប្រាស់មុន ដោយគ្មានការបង្ខិតបង្ខំ។ ប៉ុន្តែអ្វីដែលជាបញ្ហាដោយសារតែ អ្នកចង់បានប្រាក់មានចំនួនច្រើនក្នុងពេលតែមួយ ដូច្នេះហើយទើបបង្កើតឲ្យមានការដេញថ្លៃ ហើយអ្នកហ៊ានដាក់ការប្រាក់ខ្ពស់ជាអ្នកទទួលបានប្រាក់ ដោយអ្នកដែលមិនទាន់ដេញបានទទួលកម្រៃពីរបស់ខ្លួន។
Sabay ៖ តើអ្វីទៅជាហានិភ័យរបស់តុងទីន?
លោក ច័ន្ទ សុផល៖ ហានិភ័យ របស់តុងទីនគឺការមិនស្ថិតនៅក្រោមច្បាប់គ្រប់គ្រងច្បាស់លាស់ ព្រោះជាការលេងក្រៅផ្លូវការ ដែលមិនមានការធានាតាមផ្លូវច្បាប់ ឬជាកត្តាបង្កឲ្យ ការក្បត់ទំនុកចិត្តគ្នាដោយងាយ ។
លោក ច័ន្ទ សុផល៖ មិន មែនថ្មីៗនេះទេ មានច្រើនហើយតាំងពីមុនមកក៏មានរឿងបែបនេះដែរ។ ទាំងនេះមានមូលហេតុពីរយ៉ាង។ ទី១ ការរកប្រាក់បង្វិលមិនទាន់ ហើយបំណុលចេះតែកើនឡើង រហូតរត់មិនរួច ដូច្នេះគាត់មានតែសម្រេចចិត្តរត់ចោលស្រុកតែម្ដង។ ទី២ មនុស្សខូចតែម្ដង ពេលប្រមូលបានប្រាក់ហើយ មិនចង់សងគេវិញ ទើបសម្រេចគេចខ្លួន។ ជម្រើសទាំងនេះកើតឡើងដោយសារតែ ការអនុវត្តន៍ច្បាប់នៅមានកម្រិត ជាកត្តានាំឲ្យពួកគាត់សម្រេចចិត្តយកតម្រាប់តាមគ្នា ដោយគិតថារត់ចោលស្រុកគឺចប់បញ្ហា ។
Sabay ៖ តើអ្នកលេងតុងទីន ភាគច្រើនលេងដើម្បីទាញផលប្រយោជន៍ពីវា ឬ ជាការលេងតាមគ្នាដោយងងឹតងងល់ ទើបចេះតែមានបញ្ហាកើតឡើងបែបនេះ?
លោក ច័ន្ទ សុផល៖ មាន ភាគតិចណាស់ដែលពួកគាត់យល់ដឹងពីការលេងតុងទីន ហើយបានប្រើប្រាស់ប្រាក់នោះ ដើម្បីទាញផលចំណេញ និងបង្វិលប្រាក់សងគេវិញ។ ភាគច្រើនជាការលេងតាមៗគ្នា ពួកគាត់ហ៊ានដេញយកការខ្ពស់ ដោយមិនដឹងថា តើប្រាក់ដែលដេញបាននោះ អាចទាញយកការប្រាក់មកសងគេវិញ រួចឬមិនផង។
Sabay ៖ ទោះជាបីជាមាន ការបោកប្រាស់យ៉ាងណាក៏ដោយ ប៉ុន្តែ តុងទីននៅតែពេញនិយម ក្នុងសង្គមខ្មែរ តើលោកស្រាយបញ្ជាក់ចំណុចនេះយ៉ាងណា?
លោក ច័ន្ទ សុផល៖ ព្រោះ តុងទីនជាការលេងដើម្បីសន្សំ ដូច្នេះអ្នកដែលមានលុយហើយ គាត់អាចទាញយកប្រាក់ចំណេញពីតុងទីនបាន ដោយដាក់ការដេញថ្លៃតិចៗ ប៉ុន្តែបានត្រលប់មកវិញជាប្រាក់ដុំ។ ដោយឡែកសម្រាប់អ្នកគ្មានប្រាក់វិញពួកគាត់សង្ឃឹមអាចយកដែលដេញបាន ទៅប្រើប្រាស់ដើម្បីពង្រីកមុខរបរ ឬអាចដើម្បីដោះទាល់ម្ដងៗ ដែលប្រាក់នោះច្រើនលើសពីលទ្ធភាពដែលអាចរកខ្ចីពីបងប្អូន ឬពីចងការប្រាក់ពីធនាគារ។
Sabay ៖ បើប្រៀបធៀបគ្នា រវាងការប្រើប្រាស់ ប្រាក់តុងទីន និងការខ្ចីពីធនាគារ តើមួយណាមានភាពប្រសើរជាង?
លោក ច័ន្ទ សុផល៖ ប្រយោជន៍ផ្សេងៗគ្នា។ ការខ្ចីប្រាក់ពីធនាគារមានការប្រាក់ទាបហើយមិនសូវមានហានិភ័យ ទេ ប៉ុន្តែមានលក្ខខណ្ឌតឹងរ៉ឹងច្រើន ហើយចំណុចសំខាន់មួយទៀត គឺ ការខ្ចីប្រាក់ពីធនាគារនៅកម្ពុជា ចាំបាច់អ្នកខ្ចីត្រូវមានរបស់ដាក់បញ្ចាំ ដូចជាប្លង់ផ្ទះ ប្លង់ដីជាដើម ចំណុចនេះហើយដែលជាឧបសគ្គ ស្មុគស្មាញ សម្រាប់អ្នកត្រូវការប្រាក់។
ចំណែកឯប្រាក់ដែលបានមកពី តុងទីនវិញទោះបីជាមានហានិភ័យខ្ពស់ ការប្រាក់ខ្ពស់ក៏ពិតមែនប៉ុន្តែ មានលក្ខខណ្ឌងាយស្រួលជាង ដូចជាអ្នកចង់ចូលលេង ឲ្យតែស្គាល់គ្នា ហើយទុកចិត្តគ្នាទៅវិញទៅមក និងមានលទ្ធភាពបង់អាចចូលលេងបានហើយ។
Sabay ៖ មានមនុស្សជាច្រើនបានលើកឡើងថា លេងតុងទីនជាការ យកកទៅលអន្ទាក់ កាលណាជាប់ដៃលេង ហើយរើខ្លួនមិនរួចទេ យូរៗទៅជំពាក់គេវ័ណ្ឌក។ តើនេះជាការពិតទេលោក?
លោក ច័ន្ទ សុផល៖ ពិតជាមានលើកឡើងបែពនេះមែន ប៉ុន្តែមិនមែនសុទ្ធតែវ័ណ្ឌក ទាំងអស់នោះទេ។ វាអាចវ័ណ្ឌកមែនចំពោះអ្នកដែលគិតគូរមិនបានស៊ីជម្រៅពីបញ្ហា ហិរញ្ញវត្ថុ ឬមិនបានថ្លឹងថ្លែងពីលទ្ធភាពដែលខ្លួនអាចសងត្រលប់។
ជា ពិសេសពេលដេញបានមកហើយ ប្រើប្រាស់មិនចំគោលដៅ យកទៅទិញរបស់ដែលមិនចាំបាច់ របស់ដែលមិនអាចបង្កើនចំណូលមកវិញបាន។ នៅពេលគ្មានលទ្ធភាពបង់ពួកគាត់សម្រេចចិត្តលក់របស់សងគេ ឬបង្ខំចិត្តចងការប្រាក់ ឬបង្ខំចិត្តដេញតុងទីនក្បាលថ្មីយកមកសងគេ ដែលជាហេតុនាំឲ្យគាត់ដកខ្លួនមិនរួច ចេះតែលង់ខ្លួនជ្រៅទៅៗ ជំពាក់គេវ័ណ្ឌក ។
Sabay ៖ ដូចដែលបានពិភាក្សាខាងលើមក តើប្រទេសកម្ពុជាគួរតែមានច្បាប់ពីការគ្រប់គ្រងការលេងតុងទីនដែរឬយ៉ាងណាដែរលោក?
លោក ច័ន្ទ សុផល៖ សម្រាប់ខ្លួនខ្ញុំផ្ទាល់គិតថាមិនចាំបាច់នោះទេ ប៉ុន្តែសមត្ថកិច្ចគួរតែពង្រឹងការអនុវត្តន៍ច្បាប់ស៊ីវិលរបស់យើងឲ្យ ខ្លាំងទៅបានហើយ។ ដូច្នេះកាលណាមានការបោកប្រាស់គ្នាហើយការប្ដឹងផ្ដល់ សមត្ថកិច្ចត្រូវចាប់ខ្លួនអ្នកប្រព្រឹត្តយកមកផ្ដន្ទាទោស ឬធ្វើការផាកពិន័យពីស្ថាប័នជំនាញទៅជាការស្រេចហើយ ព្រោះច្បាប់ស៊ីវិល ដូច្នេះច្បាប់កិច្ចសន្យា សុទ្ធតែអាចអនុវត្តបាន។
Sabay ៖ ជាសំនួរចុងក្រោយតើលោកមានអ្វីផ្ដាំផ្ញើដល់ប្រជាជនកម្ពុជាមួយចំនួនដែលមានគម្រោងលេងតុងទីន ?
លោក ច័ន្ទ សុផល៖ ខ្ញុំសូមផ្ដាំផ្ញើថា មុននឹងសម្រេចចិត្តលេងតុងទីន ជំហានទី១ ត្រូវពិនិត្យមើលសមាសភាព មេ និងកូន ក្រុមឲ្យបានច្បាស់លាស់ ជៀសវាងការចាញ់បោក។ ទី២សូមពិចារណាឲ្យបានល្អិតល្អន់ ថាតើត្រូវការយកប្រាក់មកដើម្បីអ្វី ហើយអាចបង្កើតវិញដែរឬទេ ហើយពិនិត្យលទ្ធភាពសងតើអាចទៅរួចឬទេ ទើបជាការប្រសើរ។
មិត្តយុវវ័យណាខ្លះ លេងតុងទីន? យល់យ៉ាងណាចំពោះវិធីសាស្ត្របង្វិល ឬសន្សំសំចៃប្រាក់កាសក្រៅប្រព័ន្ធច្បាប់មួយនេះ?
អត្ថបទ៖ កង ចាន់បញ្ញា