ប្រជាពលរដ្ឋ និង អ្នកជំនួញខ្លះ បារម្ភរឿងសន្តិសុខសង្គម

2014-12-08 17:54:40
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីការបាញ់ប្រហារពីរករណីធំៗ ស្ទើរកក្រើកក្នុងរាជធានីភ្នំពេញ នោះគឺការបាញ់សម្លាប់ឧកញ៉ា អ៊ឹង ម៉េងជឺ ករណីបាញ់រះសម្លាប់មនុស្ស នៅម្ដុំផ្សារប៉េសេ កាលពីយប់មិញ ធ្វើឲ្យប្រជាពលរដ្ឋ និង អ្នករកស៊ីមួយចំនួននៅក្នុងរាជធានីភ្នំពេញសម្ដែងការព្រួយបារម្ភពីសន្តិសុខ សុវត្ថិភាព។

ឧកញ៉ា អ៊ឹង ម៉េងជឺ ពេលត្រូវឃាតករបាញ់សម្លាប់ (ប្រភពរូប៖ គេហទំព័រ អគ្គស្នងការនគរបាលជាតិ)

យុវជន ហែម មករា អាយុ ២៥ ឆ្នាំ ជានិស្សិតច្បាប់ឆ្នាំទី ៤ នៃសាកលវិទ្យាល័យចំរើនពហុបច្ចេកវិទ្យា បញ្ចេញទស្សនៈផ្ទាល់ខ្លួនថា៖ "មួយរយៈចុងក្រោយនេះ ខ្ញុំមានអារម្មណ៍ថា បញ្ហាសន្តិសុខសង្គមក្នុងក្រុងភ្នំពេញយើង ដូចជាច្របូកច្របល់ដល់ហើយ ខ្ញុំដូចជា ខ្លាចរអាមែនទែន។ ពីមួយថ្ងៃទៅមួយថ្ងៃ សន្តិសុខ សុវត្ថិភាពសង្គម កាន់តែធ្លាក់ចុះ មើលទៅគួរឲ្យព្រួយបារម្ភខ្លាំងណាស់"។

ទាក់ទងនឹងបញ្ហានេះដែរ លោកឧកញ៉ា ចេង ខេង ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា និង ជាអគ្គនាយកក្រុមហ៊ុនអចលនទ្រព្យ CPL Cambodia Properties Limited លើកឡើងថា ឃាតកម្មរន្ធត់ៗ ដូចជាលើឧកញ៉ាមានទ្រព្យសម្បត្តិកាលពីពេលកន្លងមក នៅតែស្ថិតក្នុងការតាមដានលទ្ធផលពីមហាជន ជាការគំរាមស្រស់ៗលើសុវត្ថិភាព សម្រាប់អ្នកវិនិយោគទុនទាំងក្រៅប្រទេស និងក្នុងប្រទេស។ "ខ្ញុំថា សន្តិសុខនៅតែគំរាមកំហែងនោះនឹងគ្មានផលដល់ការទាញយកវិនិយោគទុនឡើយ"។

បន្ថែមលើនេះ អ្នកស្រី ជា សុខលាង អគ្គនាយកក្រុមហ៊ុន LYS Sovannaphum Group Co., Ltd និង ជាប្រធានបណ្ដាញសភាយុវពាណិជ្ជករអន្តរជាតិកម្ពុជា (JCI Cambodia ) សាខាចតុមុខ យល់ឃើញថា ចំណាត់ការលឿនៗនិងមានប្រសិទ្ធភាពរបស់សមត្ថកិច្ច ដើម្បីវែកមុខរកឃាតកចូលសំណាញ់ច្បាប់ ជាអ្វីដែលអាចធានាសុវត្ថិភាព មិនឲ្យសហគ្រិនក៏ ដូចជាពលរដ្ឋភិតភ័យ។ «ប៉ុន្តែក្ដីបារម្ភគឺប្រសិនបើសមត្ថកិច្ចមិនចំណាត់ការ ព្រោះថាជនអាក្រក់មានគ្រប់កន្លែង»។

ទោះជាយ៉ាងណាក៏ដោយ លោក គឹម ហៀង អគ្គនាយកក្រុមហ៊ុនអចលនទ្រព្យ ខ្មែររៀលអ៊ីសស្តេត ថាករណីបាញ់ប្រហារនៅ ភ្នំពេញថ្មីៗ ពុំបង្កក្ដីបារម្ភធំធេងក្នុងវិស័យពាណិជ្ជកម្មលោកទេ។ លោកយល់ថា ឧក្រិដ្ឋកម្មបាញ់សម្លាប់ធំៗមួយរយៈមកនេះ ភាគច្រើនជារឿងបុគ្គល។ «ដើរយប់យូរៗ គង់នឹងជួបខ្មោច។ ឲ្យតែយើងធ្វើអាក្រក់ គង់នឹងប៉ះអាក្រក់។ ដើរទៅណាមកណា មើលមុខក្រោយៗរហូត»។

ការលើកឡើងរបស់ប្រជាពលរដ្ឋក៏ដូចជាវិនិយោគិនមួយចំនួនខាងលើនេះ គឺកើតចេញបន្ទាប់ពីបណ្ដាញសារព័ត៌មានបានចុះផ្សាយកាលពីករណីបាញ់សម្លាប់មនុស្សនៅម្ដុំផ្សារប៉េសេ កាលពីយប់មិញនេះ។ សមត្ថកិច្ចបានប្រាប់បណ្ដាញសារព័ត៌មានថា ករណីនេះកើតចេញ ពីទំនាស់ផឹកស៊ី ហើយជនសង្ស័យទាំងពីរនាក់ជាមុខសញ្ញាប្លន់ប្រដាប់អាវុធទើបចេញពីពន្ធនាគារ។ ជនសង្ស័យទី ១ ឈ្មោះ ផន សុផល អាយុ ៣០ ឆ្នាំ និង ទី ២ ចេង រ៉ាវី អាយុ ២៤ ឆ្នាំ ចំណែកអ្នកស្លាប់ឈ្មោះជៀវ វាសនា អាយុ ២៨ ឆ្នាំត្រូវ ៣ គ្រាប់ និង របួសធ្ងន់ម្នាក់ និង ស្រាលម្នាក់។ ទន្ទឹមគ្នានឹងការចាប់បានជនសង្ស័យ សមត្ថកិច្ចក៏ឃាត់បានម៉ូតូ ៣គ្រឿង ក្នុងនោះ AX មួយគ្រៀង វីវ៉ាមួយគ្រឿង សង់សេ ១២៥ មួយគ្រឿង និង កាំភ្លើងខ្លីមួយដើម ខ្មាន់កាំភ្លើង។

ករណីដោយឡែកមួយគឺ កាលពីថ្ងៃទី ២២ ខែ វិច្ឆិកា ឆ្នាំ ២០១៤ លោកឧកញ៉ា អ៊ឹង ម៉េងជឺ ថៅកែស៊ីម៉ង់តិ៍ពេជ្រ និង ជាម្ចាស់ហាងពេជ្រហុងកុង ត្រូវបានឃាតកបាញ់សម្លាប់បណ្ដាលឲ្យស្លាប់ភ្លាមៗនៅពេលលោកចុះទិញផ្លែឈើនៅជិតស្ដាតអូឡាំពិក ក្នុងសង្កាត់ទួលស្វាយព្រៃ២ ខណ្ឌចំការមន។

ជុំវិញការព្រួយបារម្ភរបស់ប្រជាពលរដ្ឋលើបញ្ហាសន្ដិសុខ លោក ខៀវ សុភ័ក្រ អ្នកនាំពាក្យក្រសួងមហាផ្ទៃ បាននិយាយប្រាប់គេហទំព័រ Sabay នៅព្រឹកនេះថា ការព្រួយបារម្ភរបស់ប្រជាពលរដ្ឋ ក៏ដូចជា អ្នកវិនិយោគទុន គឺជា រឿងត្រឹមត្រូវ ព្រោះករណី បាញ់ប្រហារ នៅក្នុងរាជធានីភ្នំពេញបានកើតមានជាបន្តបន្ទាប់។ ប៉ុន្តែ លោកបានបញ្ជាក់ថា ករណីបាញ់ប្រហារកន្លងមកគឺជារឿងដាច់ដោយឡែកពីគ្នា ហើយលោកបានលើកឡើងដែរ ករណីដែលបានកើតឡើង សមត្ថកិច្ចបានវែកមុខរកឃើញជនដៃដល់ភ្លាមៗ។

ទន្ទឹមគ្នានេះ លោក ខៀវ សុភ័ក្រ្ដ បាននិយាយថា សមត្ថកិច្ចបានត្រៀមកម្លាំងការពារសន្តិសុខសុវត្ថិភាពជូនប្រជាពលរដ្ឋ និង វិនិយោគទុន ប៉ុន្តែ សាមីខ្លួនក៏ត្រូវប្រុងប្រយ័ត្នដោយខ្លួនឯងផងដែរ។

ទោះបីយ៉ាងណា លោក ខៀវ សុភ័ក្រ្ដ មិនបានបញ្ជាក់អំពីចំនួនបទល្មើសឆក់ប្លន់ និង មនុស្សឃាតនៅក្នុងអំឡុងឆ្នាំ ២០១៤នេះនៅឡើយទេ ដោយលោកប្រាប់ថា សមត្ថកិច្ចកំពុងបូកសរុបរបាយការណ៍ គឺកំពុងប្រមូលរបាយការណ៍ពីគ្រប់ស្នងការខេត្ត-រាជធានីនៅឡើយ។

“យើងកំពុងធ្វើការរឿងនេះ យើងមិនទាន់អាចបញ្ជាក់អំពីចំនួនថយចុះឬកើនអំពីករណីសន្ដិសុខនៅឡើយ ប៉ុន្ដែ សមត្ថកិច្ចបានយកចិត្តទុកដាក់ខ្លាំងលើបញ្ហាសន្ដិសុខ ដើម្បីរក្សាសុវត្ថិភាពជូនប្រជាពលរដ្ឋ ក៏ដូចជា អ្នកវិនិយោគទុននៅកម្ពុជា"៕

សូមចុចអាន៖ ថោង សារ៉ាត់ នៅបាត់ខ្លួន ឪពុក-ម្តាយបន្ទន់ជំហរ

សូមចុចអាន៖ បញ្ជូនជនជាប់សង្ស័យដល់អយ្យការអមសាលាដំបូង

សូមចុចអាន៖ កក្រើកមួយរាត្រី សមាជិកគ្រួសារជនសង្ស័យ១៤នាក់ត្រូវឃាត់ខ្លួន