Laura ចាប់ដៃ Brown និងGong Cha បរិច្ចាគថវិកាពីការលក់CD Album «ខ្ញុំមិនសុខចិត្តទេ» ទាំងអស់ទៅគន្ធបុប្ផា

2014-12-13 14:04:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អាល់ប៊ុមថ្មី In Search of Heroes មាន១០បទ រាប់ទាំង «ខ្ញុំមិនសុខចិត្តទេ» ដែលមានស្ទីលសម្ដែងឡូយយ៉ាងល្បីកក្រើក ទើបចេញ MV ប៉ុន្មានថ្ងៃមុនរបស់កូនកាត់ខ្មែរអាមេរិក Laura Mam នឹងចាប់ផ្ដើមចេញលក់នៅសប្ដាហ៍ក្រោយ ហើយចំណូលទាំងអស់ពីការចរាចរណ៍ឌីសនឹងបរិច្ចាគទៅ មន្ទីរពេទ្យគន្ធបុប្ផា។

ឌីសចម្រៀងថ្មីរបស់ Laura ដែលមានបទ អង់គ្លេស៥បទ និង ខ្មែរ៥បទ នឹងដាក់លក់នៅតាមសាខាហាង កាហ្វេ Brown និង Gong Cha។ តារាវ័យ២៨ឆ្នាំ Laura Mam ថាការសហការរវាងខ្លួន Brown និង Gong Cha សម្រេចចិត្តបញ្ចេញ CD ស្នាដៃថ្មីខ្លួន ដើម្បីប្រមូលប្រាក់ឲ្យមន្ទីរពេទ្យគន្ធបុប្ផា ព្រោះថាមន្ទីរពេទ្យមួយនេះដើរតួយ៉ាងសំខាន់ជួយដល់ប្រជាជនក្រីក្រខ្មែរ។ «យើងចង់ធ្វើជាឧទាហរណ៍ គឺអ្នកសិល្បៈជាផ្នែកមួយជួយដល់សង្គម»។ តារាស្រីខ្មែរអាមេរិក ដែលអាចសន្ទនាខ្មែរយ៉ាងច្បាស់តែជាញឹកញាប់លាយពាក្យអង់គ្លេសមួយៗ រៀបរាប់យ៉ាងដូច្នេះ។

Brown និង Gong Cha សហការទិញ CD ពី Laura Mam ក្នុងតម្លៃពិសេសចំនួន ៥០០បន្ទះ មកដាក់លក់នៅសាខារបស់ខ្លួន។ ហើយ Brown, Gong Cha និង Laura Mam នឹងយក ប្រាក់ពីការលក់ CD ទាំងអស់ទៅបរិច្ចាគដល់ មន្ទីរពេទ្យ គន្ធបុប្ផា។

អាល់ប៊ុល១០បទនេះ ចំណាយអស់ជាង២ម៉ឺនដុល្លារដើម្បីផលិតឡើង។ ប្រាក់ទាំងនេះមួយផ្នែកធំបានពីការរៃអង្គាសពី Fan ដែលចូលចិត្តស្នាដៃថ្មីៗរបស់ Laura។ នាងថ្លែងប្រាប់ថា៖ «ភាគច្រើនគឺយុវវ័យនៅខ្មែរ ហើយក៏មានខ្លះជាបរទេស គឺបរទេសខ្លះគេស្រលាញ់ខ្មែរយើង ហើយការចង់ឃើញអ្វីថ្មីគឺជាឥរិយាបថរបស់អាគាំងស្រាប់»។

ចំណោម១០បទ បទខ្មែរ៥បទ សុទ្ធតែជាបទថ្មី លើកលែងតែបទទាញការចាប់អារម្មណ៍បំផុត «ខ្ញុំមិសុខចិត្តទេ» ដែលមាន MV ស្ទីលប្លែកទាក់ភ្នែក គឺបានធ្វើ Cover ថ្មីលើបទទសវត្សរ៍ឆ្នាំ៦០ របស់អ្នកស្រី ប៉ែន រ៉ន។ «ខ្ញុំមិនសុខចិត្តទេ» សាច់ភ្លេង និងការប្រើតុងសំឡេងស្រែកបន្លឺឡើងស្ដាប់ទៅស្រស់ស្រាយ និងកន្ត្រាក់អារម្មណ៍។ ប៉ុន្តែ Laura និយាយថាបទដទៃបានផ្ដោតលើរបត់ថ្មីយុវវ័យខ្មែរ។

ចាប់ផ្ដើមល្បីតាម YouTube តាំងពី២០១១មក Laura Mam ដែលកើតនៅអាមេរិក តែបានបញ្ចប់ការសិក្សាផ្នែកបុរាណវិទ្យា និង អក្សរសាស្ត្រខ្មែរ បានចេញចម្រៀងស្នាដៃខ្លួនជាង២០បទមកហើយ។ បទជាច្រើនគឺលេងជាមួយហ្គីតា ហើយបទដែលធ្វើឲ្យផ្ទុះការចាប់អារម្មណ៍ និង ស្គាល់នាងខ្លាំងបំផុតនោះគឺបទ «ស្វារាំមុនឃីស»។ ឯឥឡូវនេះ «ខ្ញុំមិនសុខចិត្តទេ» ដែលជាបទ Cover បទចាស់ដូច «ស្វារាំមុនឃីស» ដែរ និងទើបចេញ MV កាលថ្ងៃទី១០ធ្នូម្សិលម៉្ងៃ កំពុងទាក់ទាញយុវវ័យមិនតិចទេ តាមរយៈស្តាយ៍ថ្មីទាំងច្រៀង ពិសេសការសម្ដែង។

ឌីសអាល់ប៊ុម In Search of Heroes នឹងដាក់លក់សប្ដាហ៍ក្រោយ។ ប៉ុន្តែឥឡូវនេះ Laura ក៏កំពុងត្រៀមអាប៊ុមឆ្នាំថ្មី២០១៥។ អាល់ប៊ុម ឆ្នាំថ្មីអាចនឹងចាប់ថតនៅខែ៥ឬ៦ឆ្នាំក្រោយ ហើយពេលនេះ Laura បានសម្រេចលាអាមេរិក មករស់នៅកម្ពុជាជាអចិន្ត្រៃយ៍វិញ។ នាងពន្យល់ពីការបោះបង់ជីវិតនៅប្រទេសមហាអំណាចដែលប្រជាជនខ្មែរជាច្រើនប្រាថ្នាទៅនៅ៖ «ខ្ញុំមកនៅខ្មែរដើម្បីបន្តធ្វើភ្លេង និងចម្រៀងរបស់ខ្ញុំ ព្រោះខ្ញុំចូលចិត្តជីវិតឯករាជ្យ»។

មិនទាន់ប្រាកដថា អាល់ប៊ុមបន្តបន្ទាប់ នឹងលក់ដើម្បីប្រមូលមូលនិធិឲ្យមន្ទីរពេទ្យគន្ធបុប្ផាទៀតឬយ៉ាងណាទេ។ ប៉ុន្តែបែបណាក្ដីតារាកូនកាត់សម្បុរសណ្ដែកបាយបង្ហើបថា អាល់ប៊ុលក្រោយៗ អាចនឹងប្រើប្រាស់ដើម្បីស្វែងរកប្រាក់កាក់ទ្រទ្រង់ដល់សកម្មភាពមនុស្សធម៌ដូចពេលនេះ គ្រាន់តែមិនច្បាស់ថាឲ្យទៅគន្ធបុប្ផា ឬ អង្គការស្ថាប័នណានោះទេ៕

ក្រមាបង់កខ្មែរកំពុងឡើងកូដក្លាយជា Fashion ស៊ីវិល័យនៅប៉ារីស

បទ «ខ្ញុំមិនសុខចិត្ត» ក្នុងអាល់ប៊ុម In Search of Heroes របស់ Laura ដែលទទួលការចាប់អារម្មណ៍ច្រើន

http://youtu.be/LFOTyIdp0JU

ខោមិនខោសអាវទេ តែច្រៀងវិញល្បីផ្អើលដល់ អាមេរិក

ស្នេហាថៃក្នុងបទចម្រៀងវៀតណាម ខ្មែរមើលហើយហាមយំ

អត្ថបទ៖ ប៉ែន សុផាន់ណា