កាដូបួនប្រភេទប្រផ្នូលមិនល្អជូនសង្សារក្នុងថ្ងៃបុណ្យណូអែល

2014-12-15 18:07:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងថ្ងៃបុណ្យណូអែល គូសង្សារតែងមានអំណោយជូនគ្នាទៅវិញទៅមកដើម្បីបង្កើនចំណងស្នេហា ប៉ុន្តែកាដូខ្លះ តំណាងនូវសេចក្តីទុក្ខសោកព្រាត់ប្រាស់ ដែលយុវវ័យមួយចំនួនមានជំនឿ និង ខ្លាចរអា ហើយខ្លះក៏បានបែកបាក់គ្នាព្រោះតែកាដូទាំងអស់នោះ។

កន្សែង កញ្ញា ពុង ស៊ីវលាង អាយុ ២៥ ឆ្នាំ រៀនជំនាញអក្សរសាស្ត្រអង់គ្លេស និស្សិតសាកលវិទ្យាល័យភ្នំពេញអន្តរជាតិ ប្រាប់ថា កន្សែងតំណាងឲ្យការព្រាត់ប្រាសគ្នា បង្ហូរទឹកភ្នែក ដូច្នេះកន្សែងគឺតំណាងទុកជូតទឹកភ្នែក។ កញ្ញា បញ្ជាក់ថា៖ "មិត្តប្រុសធ្លាប់ឲ្យកន្សែង មិត្តខ្ញុំថាកុំយកប្រយ័ត្នបែកគ្នាប៉ុន្តែខ្ញុំអត់ជឿ ដល់ហើយមានអី មិនយូរប៉ុន្មានបែកគ្នាមែនណាបង អត់មានឈ្លោះគ្នាអីទេ តែសុខៗគេដូចសោះអង្គើយនឹងខ្ញុំ"។

ស្បែកជើង

អំណោយនេះ តំណាងឲ្យការដើរចេញពីគ្នា មិនអាចបន្តទំនាក់ទំនងគ្នាបានយូរតទៀត។ នេះបើតាមការអះអាងរបស់ លោក សុ ចិត្រា អាយុ ២៤ឆ្នាំ បុគ្គលិកនៅហាងលក់វ៉ែនតា អុបទិក។ លោកថា រឿងនេះ លោកលឺតាមមិត្តភ័ក្ដិតំណាលប្រាប់តាំងពីរៀននៅវិទ្យាល័យ ដំបូងមិនសូវជឿ គិតថា រឿងអត់ប្រយោជន៍ តែសង្កេតយូរទៅៗ ត្រូវខ្លះដែរ។ ដូចជាមិត្តភ័ក្ដិលោក បានទិញស្បែកជើងជូនមិត្តស្រី តែក្រោយប្រហែលពីរបីខែមក ក៏ឈ្លោះគ្នាបែកបាក់ទៅ។ ហើយមិត្តភ័ក្ដិដែលលោកស្គាល់ពីរបីនាក់ផ្សេងទៀត ដែលធ្លាប់ជូនស្បែកជើងដល់សង្សារក៏បែកគ្នាខ្លះៗដែរ។

សូមអាន៖ ជំនឿផ្សេងៗទាក់ទងបុណ្យគ្រិស្តម៉ាស

ទឹកអប់

អ្នកមានជំនឿម្នាក់ទៀត លើរឿងជូនកាដូប្រភេទខ្លះអាចឲ្យស្នេហាប្រេះស្រ៊ាំ កញ្ញា តន់ សុដាលីន អាយុ១៨ឆ្នាំ សិស្សសាលាប៊ែលធី និយាយថា ទឹកអប់ គេតំណាងស្នេហាបានត្រឹមមួយឆាវ វាមិនស្ថិតស្ថេរ ព្រោះក្លិនទឹកអប់ក្រអូបបានតែមួយរយៈទេ គេប្រដូចវានឹងឥទ្ធិពលស្នេហាដែរ អាចឆាប់បែកចិត្ត ស្រលាញ់គ្នាមិនបានយូរ។

នាឡិកា

អតីតនិស្សិតសាកលវិទ្យាល័យភូមិន្ទភ្នំពេញ កញ្ញា ឡុង បូណា អាយុ ២៣ ឆ្នាំ ប្រាប់ថា រឿងនាឡិកានេះ ថាពិតជាដើមហេតុធ្វើឲ្យគូស្នេហ៍ឈប់ស្រលាញ់គ្នាមែននោះ មិនច្បាស់ឡើយតែគ្រាន់ជឿតាមគេខ្លះ បូកផ្សំការសង្កេតផង។ ម្យ៉ាងរឿងទិញកាដូជានាឡិកានេះ លឺគេនិយាយប្រាប់តៗគ្នាមកយូរហើយថាមិនល្អ សូម្បីក្នុងរឿងសឹង្ហបុរីក៏និយាយដែរ។

បូណាបន្ថែមថា នាឡិកាតំណាងស្នេហាមានព្រំដែនវេលាមិនអាចបន្តបានរហូត ព្រោះម៉ោងវាមានលេខក្រិតៗកំណត់វេលា ដូច្នេះបើសង្សារជូននាឡិកាឲ្យគ្នា មិនខុសពីកំណត់ថេរវេលាស្រលាញ់គ្នានោះទេ។

កាដូទាំងនេះ គេចៀសវាងសម្រាប់ការទិញជូនអ្នកដទៃតែបើទិញសម្រាប់ប្រើខ្លួនឯង មិនមានអ្វីអាក្រក់នោះទេ។ ប្រភេទកាដូទាំងនេះ គ្រាន់ជាជំនឿរបស់យុវវ័យដែលយល់ថា អាចមានប្រផ្នូលមិនសូវល្អសម្រាប់សម្ព័ន្ធស្នេហាដែលគួរតែចៀសវាង តែវាជាដើមហេតុពិតប្រាកដធ្វើឲ្យស្នេហាបាក់បែកឬយ៉ាងណា Sabay មិនទាន់ហ៊ានអះអាងឡើយ៕

សូមអាន៖ មិនធ្លាប់ដឹងសោះថា ពិធីបុណ្យណូអែលនៅកូរ៉េ ខុសគេយ៉ាងនេះ!

មិត្តយុវវ័យយល់យ៉ាងណាដែរ ចំពោះអត្ថន័យនៃកាដូទាំងបួនខាងលើ?

អត្ថបទ៖ សុនា

រូបថត៖ បរទេស