រឿងរ៉ាវស្នេហារំជួលចិត្ត លោកយាយចាំប្ដី៧៧ឆ្នាំ ទីបំផុតបានជួបត្រឹម...
- 2014-12-18 18:15:02
- ចំនួនមតិ 0 | ចំនួនចែករំលែក 0
រឿងរ៉ាវស្នេហារំជួលចិត្ត លោកយាយចាំប្ដី៧៧ឆ្នាំ ទីបំផុតបានជួបត្រឹម...
ចន្លោះមិនឃើញ
រឿងរ៉ាវស្នេហារបស់លោកយាយវ័យ៩៣ឆ្នាំម្នាក់ បានធ្វើឲ្យលេងបណ្ដាញសង្គមនៅចិនរំជួលចិត្តយ៉ាងខ្លាំង។ លោកយាយបានជួបស្វាមីដែលស្លាប់ក្នុងសមរភូមិកាលពីឆ្នាំ៧៧ឆ្នាំមុន ប៉ុន្តែបានជួបត្រឹមឈ្មោះដែលគេចារទុកប៉ុណ្ណោះ ក្រោយរង់ចាំអស់រយៈពេល៧៧ឆ្នាំ។
លោកយាយ Zhang Shuying បានស្គាល់ស្វាមីរបស់ខ្លួន គឺលោក Zhong Chongxin ដែលជាកងទ័ពនៅទីក្រុងFuzhou កាលពី៧៩ឆ្នាំមុន ដែលពេលនោះលោកយាយមានអាយុត្រឹម១៤ឆ្នាំប៉ុណ្ណោះ។ គូស្នេហ៍វ័យក្មេង បានធ្លាក់ក្នុងអន្លង់ស្នេហ៍ និងបានរៀបការភ្លាមៗនាពេលនោះ។
រៀបការបានត្រឹម២ឆ្នាំ ពោលគឺនៅឆ្នាំ១៩៣៧ កងទ័ពជប៉ុនបានចូលឈ្លានពានប្រទេសចិន ហើយស្វាមីលោកយាយ បានចាកចេញពីសៀងហៃដើម្បីបំពេញតួនាទីជាទាហានម្នាក់។ លោកយាយ Zhang បាននិយាយប្រាប់អ្នកយកព័ត៌មានថា៖ "គាត់ស្រាប់តែឱបខ្ញុំពីក្រោយ ហើយនិយាយពីថាលា។ គាត់បានយំ ហើយសន្យាថាវិលត្រឡប់មកវិញដើម្បីខ្ញុំ"។ បន្ទាប់ពីនោះមក ប្ដីរបស់លោកយាយបានរៀបចំឥវ៉ាន់ រួចចាកចេញទៅតំបន់ Chongqing ដែលជាការទៅមិនត្រលប់ ហើយចាប់ពីពេលនោះហើយ ដែលលើកយាយត្រូវរង់ចាំទន្ទឹងមើលផ្លូវទាំងអន្ទះសារាល់ថ្ងៃ។
ពេលទៅដល់សមរភូមិ ប្ដីលោកយាយធ្លាប់ទាក់ទងតាមទូរសព្ទមកម្ដងដែរ ហើយបន្ទាប់មកក៏បាត់ដំណឹងសូន្យឈឹងតែម្ដង។ អស់រយៈពេល៧ឆ្នាំ លោកយាយនៅតែរង់ចាំ ប៉ុន្តែមិនឃើញស្រមោលស្វាមីលោកយាយត្រឡប់មកវិញទេ។ ក្នុងឆ្នាំ១៩៤៤ លោកយាយបានជួបជាមួយទាហានម្នាក់ ហើយបានប្រាប់ថាស្វាមីរបស់លោកយាយបានស្លាប់នៅក្នុងសង្គ្រាមបាត់ហើយ។
នៅឆ្នាំ១៩៤៩ ទោះបីលោកយាយ Zhang បានរៀបការជាមួយបុរសម្នាក់ផ្សេងទៀត និងមានកូនបីនាក់ក៏ដោយ ក៏លោកយាយនៅតែចងចាំ និងនៅតែគិតពីគូស្នេហ៍ដំបូងរបស់លោកយាយជានិច្ច។ ដោយសារតែស្រលាញ់ ការនឹករលឹកនៅតែមានមិនឈប់ នៅឆ្នាំ១៩៨៨ លោកយាយបានសម្រេចចិត្តប្រាប់កូនៗអំពីរឿងរ៉ាវទាំងអស់។
ដោយរំជួលចិត្តនឹងរឿងស្នេហាដ៏កម្សត់របស់ម្ដាយ កូនៗទាំងអស់បានស្វែងរកកន្លែងដែលគេកប់សាកសពទាហាន។ បន្ទាប់ពីការខិតខំប្រឹងប្រែងស្វែងរករាប់ឆ្នាំ នៅទីបំផុតពួកគេអាចរកឃើញឈ្មោះរបស់លោក Zhong ដែលស្ថិតនៅទីក្រុងតៃប៉ិ កោះតៃវ៉ាន់។ ថ្ងៃ២២ វិច្ឆិកាថ្មីៗកន្លងទៅ លោកយាយបានទៅដល់តៃប៉ិ ដើម្បីបានជួបគូស្នេហ៍ដែលលោកយាយចាំមិនភ្លេច ជាលើកចុងក្រោយ។ លោកយាយបានទៅកន្លែងកប់សាកសពនោះដល់ទៅ៣ដង មុនពេលចាកចេញ។
លោកយាយបានប្រាប់អ្នកសារព័ត៌មានថា៖ "ខ្ញុំយំតែ៣ដងគត់ក្នុងមួយជីវិតនេះ។ ខ្ញុំប្រហែលជាបានស្គាល់គាត់តាំងពីជាតិមុនមកម្ល៉េះ ព្រោះរាល់ពេលដែលខ្ញុំយំនោះគឺសុទ្ធតែដើម្បីគាត់"។ ការយំទាំង៣ដងរបស់លោកយាយ គឺលើកទី១ នៅពេលទទួលដំណឹងពីការស្លាប់របស់លោកតា Zhong ឯទី២ គឺនៅពេលទទួលបានរូបថតលោកតា Zhong និងលើកទី៣ គឺនៅពេលទៅដល់ផ្នូររបស់លោកតា Zhong នៅតៃប៉ិនេះតែម្ដង៕
ចុចអាន៖ លោកយាយវ័យ ៨១ឆ្នាំ ហ៊ានលោតឆត្រយោង ក្មេងសុំខ្មាស ប្រែសម្រួល៖ ទ្រី រ៉ាវី
ប្រភព៖ shanghaiist