Falcao ថាចង់បន្តនៅ Man Utd ខ្លាំងណាស់
- 2014-12-18 23:09:25
- ចំនួនមតិ 0 | ចំនួនចែករំលែក 0
Falcao ថាចង់បន្តនៅ Man Utd ខ្លាំងណាស់
ចន្លោះមិនឃើញ
ខ្សែប្រយុទ្ធ Radamel Falcao បានអះអាងថារូបគេពិតជាចង់លេងនៅក្លិបបិសាចក្រហម Manchester United ខ្លាំងណាស់ ហើយត្រៀមខ្លួនរួចហើយក្នុងការចូលលេងនៅក្នុងជម្រើសដំបូង។
ក្នុងបទសម្ភាសន៍កាលពីពេលថ្មីៗនេះ ខ្សែប្រយុទ្ធជម្រើសជាតិកូឡុំប៊ីរូបនេះ បាននិយាយពីគោលបំណងរបស់គេថា៖ “ខ្ញុំពិតជាសប្បាយចិត្តនឹងនៅទីក្រុងនេះណាស់ រួមទាំងការបានលេងនៅ Manchester United ផងដែរ។ ខ្ញុំពិតជាមិនចង់ទៅណាទៀតនោះទេ។ របួសរបស់ខ្ញុំគឺពិតណាស់ថានឹងអាចផ្ដល់ផលប៉ះពាល់ដល់ការចុះកុងត្រានាពេលខាងមុខ ប៉ុន្តែពេលនេះខ្ញុំជាសះស្បើយ១០០%ហើយ រង់ចាំតែការកោះហៅឱ្យចូលលេងប៉ុណ្ណោះ។ គ្មានកីឡាករណាម្នាក់ដែលសប្បាយចិត្តនឹងការអង្គុយនៅកៅអីបម្រុងទេ”។
លោក Van Gaal ខ្ចីជើង Falcao ពី Monaco មួយរដូវកាលនេះ ក្នុងតម្លៃខ្លួន៦លានផោន និងផ្ដល់ប្រាក់ប្រចាំសប្ដាហ៍រហូតដល់ទៅ២៦៥០០០ផោនក្នុងមួយសប្ដាហ៍។ ពេលមកដល់ទឹកដី Old Trafford ភ្លាម ក៏មានដំណឹងលេចឮថាអ្នកចាត់ការសញ្ជាតិហុល្លង់ នឹងទិញខ្សែប្រយុទ្ធវ័យ២៨ឆ្នាំរូបនេះតែម្ដងពេលផុតកុងត្រាខ្ចីជើង ដោយដាក់តម្លៃខ្លួនប្រមាណជា ៤៣,៥លានផោន។ ប៉ុន្តែចាប់តាំងពីមានព័ត៌មាននោះមក Falcao រងរបួសរហូត ពោលគឺតាំងពីមកលេងនៅ Man Utd មក ទើបបង្ហាញខ្លួនបាន៨ប្រកួតប៉ុណ្ណោះ ហើយរកគ្រាប់បាល់បាន១គ្រាប់គត់។ កាលពីប៉ុន្មានសប្ដាហ៍មុន អតីតគ្រូបង្វឹកជម្រើសជាតិហុល្លង់ខាងលើ ក៏បាននិយាយហើយដែរថា Falcao អាចចូលលេងបានត្រឹមតែ២០នាទីអីប៉ុណ្ណោះ មិនអាចពេញ៩០នាទីនោះទេ ព្រោះរបួសជង្គង់របស់គេនៅមិនទាន់អាចលេងពេញជើងបាន។
ចាំមើលរដូវកាលដោះដូរកីឡាករខាងមុខនេះ តើលោក Van Gaal នឹងទិញកីឡាកររូបនេះ ឬឱ្យទៅ Monaco វិញ?
ចុចអាន ៖ Man Utd ត្រូវដោះស្រាយរឿង៥យ៉ាងនេះ បើចង់ស្ដារមុខមាត់វិញ
ប្រែសម្រួល៖មុន្នី រម្យ ប្រភព៖bbc