“ភូមិត្នោត” រមណីយដ្ឋានធម្មជាតិបែបស្រែមិនឆ្ងាយដីក្រុង

2015-01-03 16:27:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិដ្ឋភាពអ្នកឡើងត្នោត រម្ងាស់យកស្ករ ម៉ូដផ្ទះបែបខ្មែរ រទេះគោ ខ្ចុសឫស្សី ប្រក់ស្លឹកត្នោត សាងសង់នៅជាប់ៗគ្នា សម្រាប់ភ្ញៀវអង្គុយកម្សាន្ត និងទទួលទានមុខម្ហូបខ្មែរជាច្រើនមុខ ក្នុងបរិយាកាសបរិសុទ្ធ នៃខ្យល់ជំនោរ ស្រុកស្រែ។ ពិតជាធ្វើឲ្យអារម្មណ៍ស្រស់ថ្លា នាថ្ងៃចុងសប្តាហ៍ ជាពិសេសរសជាតិមុខម្ហូបខ្មែរមាន សម្លម្ជូរ កកូរ ត្រីអាំង មាន់ដុត ខ្ចងចំហុយ និងក្ដាមបំពង ជាដើម។

ទាំងនេះ គឺជាទិដ្ឋភាព នៃរមណីយដ្ឋានភូមិត្នោតស្ថិតនៅក្នុង ភូមិរាយដប ឃុំសៀមរាប ស្រុក កណ្តាលស្ទឹង ខេត្ត កណ្តាល ចម្ងាយពីរាជធានីភ្នំពេញ ប្រមាណ ២៥ គីឡូម៉ែត តាមផ្លូវជាតិលេខ ២ ជាទីសម្បូរ ដោយដើមត្នោត ផ្ដល់ទេសភាពបៃតង គ្រប់រដូវកាល។ មិនត្រឹមប៉ុណ្ណឹងទេ រមណីយដ្ឋានភូមិត្នោត ក៏មានអាងហែលទឹក និងកន្លែងកម្សាន្តជាច្រើនប្រភេទសម្រាប់កុមារតូចៗលេងសប្បាយផង ដែរ។

លោក អ្នកនឹងទៅដល់រមណីយដ្ឋាន ភូមិត្នោត តាមផ្លូវ ចេញពីក្រុងតាខ្មៅ បត់មកផ្លូវជាតិលេខ ២ ក៏បាន ឬធ្វើដំណើរកាត់ស្ពានស្ទឹងមានជ័យ បត់តាមផ្លូវទៅសារមន្ទីរជើងឯក (ផ្លូវ២១៧) ឆ្ពោះមកផ្លូវជាតិលេខ ២ ប្រមាណ ៣០នាទី នឹងមកដល់ទឹកដីឃុំសៀមរាប រួចក្រឡេកមើលខាងឆ្វេងដៃ នឹងឃើញស្លាកសរសេរថា ភូមិត្នោត ភូមិឋានសុខសាន្ត រួចបត់ចូលទៅតាមខ្លោងទ្វារ វត្តវិហារកំបោរចម្ងាយជាងពីរគីឡូម៉ែត្រនឹងបានឃើញស្លាកមួយទៀត ដែល គេសរសេរថា ភូមិត្នោត។