ចំណាប់ខ្មាំងមួយចំនួនត្រូវពលី ខណៈជនសង្ស័យត្រូវបាញ់សម្លាប់នៅប៉ារីស

2015-01-10 16:12:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនសង្ស័យពីរនាក់បងប្អូន ដែលជាអ្នកនៅពីក្រោយការបាញ់រះសម្លាប់រង្គាលនាការិយាល័យកណ្ដាលទស្សនាវដ្ដី Charlie Hebdo និងខ្មាន់កាំភ្លើងម្នាក់ទៀត ត្រូវប៉ូលិសបាញ់សម្លាប់កាលពីម្សិលមិញ ប៉ុន្តែជាអកុសលចំណាប់ខ្មាំងបួននាក់ក៏បានបាត់បង់ជីវិតក្នុងហេតុការណ៍នោះដែរ។

ការបង្ក្រាបក្នុងទីតាំងដែលមានការចាប់ចំណាប់ខ្មាំងពីរផ្សេងគ្នា នៅភាគខាងកើតក្រុងប៉ារីស កម្លាំងបង្ក្រាបភេរវកម្ម បានបាញ់សម្លាប់ខ្មាន់កាំភ្លើងបីនាក់។ នៅទីតាំងទីមួយ ខ្មាន់កាំភ្លើងពីរនាក់បងប្អូនដែលមានចំណាប់ខ្មាំងម្នាក់ក្នុងដៃ បានចេញមកក្រៅអគារ រួចបើកការវាយប្រហារទៅលើប៉ូលិស។ បន្ទាប់មកកម្លាំងប៉ូលិសក៏បាញ់តបតវិញរហូតដល់ផ្ដាច់ជីវិតជនល្មើសទាំងពីរនាក់នៅឃ្លាំងទំនិញមួយ ខណៈប៉ូលិសពីរនាក់ក៏រងរបួសនៅក្នុងហេតុការណ៍ប៉ះទង្គិចគ្នានោះដែរ។ ចំណែកឯចំណាប់ខ្មាំង ត្រូវរំដោះឲ្យរួចខ្លួនដោយសុវត្ថិភាព។

ទីតាំងទីពីរ នៅផ្សារទំនើប Kosher ខ្មាន់កាំភ្លើងម្នាក់ដែលមានចំណាប់ខ្មាំងមួយចំនួនក្នុងដៃ ត្រូវប៉ូលិសបាញ់ស្លាប់ ខណៈចំណាប់ ៤នាក់ក៏ត្រូវបាត់បង់ជីវិតដូចគ្នា។ មន្ត្រីប៉ូលិសជឿជាក់ថា ចំណាប់ខ្មាំងត្រូវបានជនល្មើសបាញ់សម្លាប់តាំងពីមុនការបាញ់ប្រហារគ្នាម្ល៉េះ។ ការស៊ើបអង្កេតទៅលើការស្លាប់របស់ចំណាប់ខ្មាំង កំពុងធ្វើឡើង។ ចំណាប់ខ្មាំង ៤នាក់ផ្សេងទៀត រងរបួសធ្ងន់ធ្ងរ ១៥នាក់ត្រូវគេជួយសង្គ្រោះ ហើយប៉ូលិសពីរនាក់ក៏រងរបួសផងដែរ។

ប្រតិបត្តិការនេះបានចាប់ផ្ដើម ក្រោយការឡោមព័ទ្ធដ៏តានតឹងនៅឃុំ Dammartin-en-Goele ៣៥គីឡូម៉ែត្រភាគខាងជើងក្រុងប៉ារីសបានបញ្ចប់។ សរុបជារួម ជនសង្ស័យបីនាក់ ត្រូវបាញ់សម្លាប់ ដែលក្នុងនោះ មានពីរនាក់ជាបងប្អូនបង្កើត ឈ្មោះ Said Kouachi និង Cherif Kouachi អាយុខ្ទង់ជាង ៣០ឆ្នាំ ហើយម្នាក់ទៀតឈ្មោះ Amedy Coulbaly។ ចំណែកឯចំណាប់ខ្មាំង បានបាត់បង់ជីវិត ៤នាក់ និងរងរបួសមួយចំនួន៕