អាថ៌កំបាំងតារាៗធ្វើខួបកំណើត ឡើងផ្ទះអស់ពាន់ម៉ឺនដុល្លារ

2015-01-22 12:30:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ឱ្យតែមានខួបកំណើត ឬឡើងផ្ទះ តារាៗតែងប្រាប់ថា ពួកគេចំណាយប្រាក់អស់ពាន់ម៉ឺនដុល្លារពេលធ្វើកម្មវិធីម្ដងៗក៏ប៉ុន្តែអាថ៌កំបាំងមួយបានទម្លាយថា តារាធ្វើកម្មវិធីម្ដងៗអស់ប្រាក់តិចតួចប៉ុណ្ណោះ។ ពេលខ្លះសឹងតែមិនអស់លុយទេ ថែមទាំងបានលុយទៀតផង ពេលមានអ្នក Sponsor ពីក្រោយ។

អាថ៌កំបាំងត្រូវបានទម្លាយដោយតារាសម្ដែងល្បីឈ្មោះម្នាក់ តែងតែមានវត្តមានមិនចេះដាច់ ក្នុងកម្មវិធីខួបកំណើត ឬ ឡើងផ្ទះសិល្បករ សិល្បការិនីម្ដងៗ។

ប្រភពសុំមិនបញ្ចេញអត្តសញ្ញាណប្រាប់ថា៖ "ខ្ញុំគិតថាអាចអស់រាប់ពាន់ម៉ឺនដុល្លារអ៊ីចឹងមែនបង តែមិនមែនលុយហោប៉ៅគាត់ទាំងអស់ឡើយ។ ទីតាំង ភេសជ្ជៈ ស្រាអីជាដើមជួនកាលគេបញ្ចុះតម្លៃ ឬឱ្យ Free តែម្ដង។ មានតារាខ្លះមិនអស់លុយ ហើយថែមទាំងបានលុយទៀត ព្រោះមានអ្នក Sponsor ពីក្រោយ"។

សិល្បករ សិល្បការិនីចូលរួមកម្មវិធីជប់លៀងកាលពីពេលថ្មីៗ

ប្រភពបន្តថា ប្រសិនបើការធ្វើកម្មវិធីម្ដងៗ សិល្បករ សិល្បការិនីចំណាយប្រាក់ផ្ទាល់ខ្លួនអស់រាប់ពាន់ម៉ឺនដុល្លារមែន គឺ ពួកគេមិនធ្វើឡើយ ព្រោះពេលរៀបចំកម្មវិធីឡើងផ្ទះ ដូចជា ខួបកំណើត តារាៗតែងតែរកអ្នក Sponsor ពីក្រោយបានសិនទើបសម្រេចចិត្តធ្វើ។ បើរកមិនបានទេ គឺមិនធ្វើឡើយ ដោយពួកគេម្នាក់ៗមិនងាយនឹងជះលុយរាប់ម៉ឺនដុល្លារទទេឡើយ ខណៈការរកប្រាក់ពីសកម្មភាពសម្ដែង ការថតចម្រៀង ឬខ្សែភាពយន្តជាដើមទទួលចំណូលតិចតួចប៉ុណ្ណោះ។

នៅពេលចោទសួរថាតើអ្វីនៅក្រោយការអះអាងរបស់តារាម្នាក់ៗពេលធ្វើខួបកំណើត ឬឡើងផ្ទះ តែងនិយាយថាអស់ពាន់ម៉ឺនដុល្លារ។ ប្រភពសុំមិនបញ្ចេញឈ្មោះខាងលើប្រាប់ថា ការបង្ហាញតួលេខម៉ឺនៗដុល្លារពីតារានានាទៅកាន់ក្រុមអ្នកកាសែត ឬអ្នកសិល្បៈដូចគ្នាគឺដើម្បីបង្ហាញឱ្យអ្នកដទៃកោតសរសើរ និងចង់បានភាពល្បីល្បាញ។

បន្ថែមពីនេះកញ្ញាលើកឡើងថា ចំណូលទទួលបានពីការចងដៃរបស់ មិត្តសិល្បករ សិល្បការិនីនានាថ្ងៃខួបកំណើត ឬឡើងផ្ទះ តារាខ្លះបានដាក់ក្នុងហោប៉ៅស្រួលដោយមិនមានខាតបង់អ្វីឡើយ ខណៈមានអ្នកឧបត្ថម្ភចេញការចំណាយរួចរាល់ហើយ។ យ៉ាងណាក៏ដោយតារាជាម្ចាស់ខួប មិនដែលប្រាប់ថា មានអ្នកជួយ Sponsor ពីក្រោយទេ គឺជាលុយហោប៉ៅផ្ទាល់ខ្លួនពួកគេ។

ទោះជាបែបនេះក្ដី អេឡិច ច័ន្ទត្រា ក្នុងពិធីខួបកំណើតកាលពីពេលថ្មីៗលោកធ្លាប់ប្រាប់ Sabay ថា កម្មវិធីខួបកំណើតរបស់ខ្លួនចាយប្រាក់អស់ជិត ៧ ពាន់ដុល្លារ។ ការធ្វើខួបនោះលោកអះអាងថា គឺចាយលុយផ្ទាល់ខ្លួន មិនមានអ្នកជួយឧបត្ថម្ភពីក្រោយឡើយ។ លោកថែមទាំងប្រាប់ខួបគម្រប់វ័យ ២៨ឆ្នាំ មិនរំពឹងបានចំណូលមកវិញទេ គឺធ្វើឡើងដើម្បីជួបជុំមិត្តភ័ក្ដិសប្បាយរីករាយតែប៉ុណ្ណោះ។

ដូចគ្នានេះដែរ លោក យ៉ែម សំអូន ធ្វើពិធីឡើងវិឡាថ្មីតម្លៃជិត ២០ ម៉ឺនដុល្លារនាពេលកន្លងទៅក៏បានប្រាប់ថា លោកចំណាយលុយផ្ទាល់ខ្លួនជាង ១ម៉ឺនដុល្លារដើម្បីឡើងវិឡាថ្មីរបស់ខ្លួន។

តារាចម្រៀងរូបនេះក៏អះអាងមិនខុសពី អេឡិច ច័ន្ទត្រា ឡើងគឺធ្វើឡើងមិនរំពឹងបានចំណងដៃមកវិញឡើយ គឺគ្រាន់តែចង់ជួបជុំមិត្តភ័ក្ដិដើម្បីបង្កើតភាពស្និទ្ធស្នាល និងរីករាយតែប៉ុណ្ណោះ។

បើទោះជាបែបនេះកម្មវិធីខួបកំណើត និងឡើងផ្ទះតារាទាំងពីរខាងលើត្រូវគេដឹងមានក្រុមហ៊ុនស្រា និងក្រុមហ៊ុន ភេសជ្ជៈជួយឧបត្ថម្ភពីក្រោយ ធ្វើឱ្យការចំណាយអស់តិចជាងការលើកឡើង។

អានអត្ថបទបន្ត៖ អ្នកសិល្បៈផ្ញើសារ រំលែកទុក្ខមរណភាពកូនប្រុសអធិរាជ

អានអត្ថបទបន្ត៖ គ្រឹះដ៏រឹងមាំ ៦ យ៉ាង ព្រាប សុវត្ថិ នៅតែមានប្រជាប្រិយភាពខ្ពស់ពីមហាជន

អានអត្ថបទបន្ត៖ ផលិតកម្ម បុប្ផា ថត MV ជាង ៨០ បទ ត្រៀមលក់រដូវចូលឆ្នាំ

អត្ថបទ៖ អ៊ីង សុឡា