ជក់លេង Facebook ខ្លាំងពេក អាចឱ្យអ្នកកើតចិត្តច្រណែន និងមានជំងឺផ្លូវចិត្តធ្ងន់ធ្ងរ

2015-02-06 16:46:13
ចំនួនមតិ 0 | ចំនួនចែករំលែក 0

ចន្លោះមិនឃើញ

យកចិត្តទុកដាក់ខ្លាំងពេកទៅលើអ្វីដែលមិត្តភ័ក្តិបានបង្ហោះលើ Facebook អាចនឹងធ្វើឱ្យប៉ះពាល់ដល់សុខភាពផ្លូវចិត្តរបស់អ្នក។ នេះបើតាមការស្រាវជ្រាវថ្មីមួយ។

អ្នកស្រាវជ្រាវបានរកឃើញថាការជក់លេង Facebook ហួសហេតុពេក ជាពិសេសគឺការឧស្សាហ៍អានឬមើល Status ផ្សេងៗរបស់មិត្តភ័ក្តិ ធ្វើឱ្យមនុស្សមួយចំនួនមានអារម្មណ៍ច្រណែន ហើយយូរៗទៅធ្វើឱ្យបាក់ទឹកចិត្តទៅវិញ។

លោកស្រី Margaret Duffy ដែលជាសាស្ត្រាចារ្យផ្នែកសារព័ត៌មាននៅសកលវិទ្យាល័យ Missouri សហរដ្ឋអាមេរិកបាននិយាយថា "យើងបានរកឃើញថា ប្រសិនបើអ្នកលេង Facebook ប្រឈមនឹងការច្រណែនទៅលើសកម្មភាពផ្សេងៗ ដែលមិត្តភ័ក្តិរបស់គេបានបង្ហោះ ពួកគេនឹងអាចជួបវិបត្តិផ្លូវចិត្តមួយគឺ ការបាក់ទឹកចិត្ត”។

លោកស្រីបានបន្ថែមថា Facebook អាចនឹងផ្តល់ផលវិជ្ជមានចំពោះមនុស្សមួយចំនួន តែបើសិនជាវាត្រូវបានប្រើដើម្បីបង្ហាញសមិទ្ធផល ឬភាពជោគជ័យផ្សេងៗរបស់បុគ្គលខ្លះ ដើម្បីបង្អួតអ្នកដទៃ នោះវានឹងនាំឱ្យមានផលអវិជ្ជមានទៅវិញ។

ការសិក្សាបានពិសោធសិស្សក្នុងមហាវិទ្យាល័យ Missouri ចំនួន ៧៣៦នាក់ ដែលបានប្រើ Facebook ជាមធ្យមពីរម៉ោងក្នុងមួយថ្ងៃ។ សិស្សទាំងអស់ត្រូវបានសួរសំនួរមួយចំនួន (នៅក្នុងក្រដាសស្ទង់មតិ) ដើម្បីឱ្យដឹងថាតើពួកគេយល់ស្របប៉ុណ្ណា និងមានប្រតិកម្មយ៉ាងម៉េចខ្លះ ស្រដៀងគ្នាទៅនឹងប្រយោគបង្ហាញពីអារម្មណ៍ច្រណែន ដូចជា "ខ្ញុំមានអារម្មណ៍ហាក់ដូចជាអន់ជាងអ្នកដទៃ" ឬ "វាហាក់បីដូចជាមិនយុត្តិធម៌ទេ ដែលមនុស្សមួយចំនួនហាក់ដូចជាមានភាពរីករាយគ្រប់ពេលវេលានោះ"។

អាន៖ ផលអាក្រក់ចំពោះសុខភាពទាំង៦ដោយសារវិទ្យុសកម្ម WiFi និង 4G/LTE

បន្ទាប់មកសិស្សទាំងនោះបានឆ្លើយតបនឹងប្រយោគខាងលើ ជាមួយនឹងប្រយោគបាក់ទឹកចិត្តដូច្នេះថា "ខ្ញុំត្រូវបានរំខានដោយរឿងមួយចំនួន ដែលធម្មតាវាមិនដែលរំខានខ្ញុំទាល់តែសោះ" និងប្រយោគ "ខ្ញុំនិយាយតិចជាងរាល់ដង"។ អ្នកស្រាវជ្រាវបានរកឃើញថា ខណៈពួកគេមានអារម្មណ៍ច្រណែន ហើយនាំឱ្យមានការបាក់ទឹកចិត្តដូច្នេះ គឺដោយសារតែពួកគេបានប្រៀបធៀបជីវិតរបស់ខ្លួនទៅនឹងរូបថតរីករាយ ឬភាពហ៊ឺហារបស់មិត្តភ័ក្តិក្នុង Facebook ។

យ៉ាងណាក៏ដោយលោកស្រី Duffy បានប្រាប់ទៅសារព័ត៌មាន Huffington Post ថា លទ្ធផលនៃការសិក្សានេះមិនមែនបានន័យថាអ្នកលេង Facebook នឹងជួបបញ្ហាផ្លូវចិត្តតែទាំងអស់នោះទេ។ អ្នកលេងបណ្តាញសង្គមទាំងអស់អាចនឹងចៀសផុតពីបញ្ហាផ្លូវចិត្តមួយនេះ ប្រសិនបើពួកគេមានការគិតពិចារណាត្រឹមត្រូវ អំពីព័ត៌មានដែលពួកគេទទួលបានលើ Facebook។

សាស្ត្រាចារ្យមួយរូបទៀតឈ្មោះ Edson Tandoc និយាយជាចុងក្រោយថា "អ្នកប្រើប្រាស់ទាំងអស់គួរយល់ថា ការបង្ហាញពីខ្លួនឯងក្នុងផ្លូវវិជ្ជមាន គឺជាការលើកទឹកចិត្តដ៏សំខាន់ ក្នុងការប្រើប្រាស់បណ្តាញសង្គម"។ លោកបានបន្តទៀតថា ការយល់ពីខ្លួនឯង និងមានក្តីសង្ឃឹមកាន់តែច្រើន អាចនឹងធ្វើឱ្យចិត្តលុបបំបាត់ចិត្តច្រណែនមិនខាន៕

អាន៖ ផលប៉ះពាល់នៃវិទ្យុសកម្ម មិនអាចមើលរំលង ការពារដោយរបៀបណា?

ប្រែសម្រួល៖ ប៉ែត ផាន់និត

ប្រភព៖ huffingtonpost