មាន សូនីតា មិនចាប់អារម្មណ៍ធ្វើខួបកំណើតធំដុំដូចតារាផ្សេង

2015-02-10 17:46:26
ចំនួនមតិ 0 | ចំនួនចែករំលែក 0

ចន្លោះមិនឃើញ

មាន សូនីតា និយាយថា នាងមិនចាប់អារម្មណ៍ធ្វើខួបកំណើតធំដុំ ហ៊ឹកហ៊ាក់ដូចតារាដទៃទេ ព្រោះមិនសូវចូលចិត្ត ហើយខ្លាចគេអន់ចិត្តនៅពេលទទួលមិនបានដិតដល់។ នាងលើកឡើងបែបនេះ គឺស្របពេលដែលថ្ងៃទី ១០ កុម្ភៈនេះ គឺជា គម្រប់ខួបវ័យ ២៥ ឆ្នាំ របស់នាង។

កញ្ញាប្រាប់ Sabay ថា៖ "ដូចបងដឹងស្រាប់ហើយតាំងពីដើមមកខ្ញុំធ្លាប់ធ្វើខួបកំណើតធំដូចគេ គឺអត់ទេ មកពីខ្ញុំមិនសូវចូលចិត្តកម្មវិធីធំដុំអ៊ីចឹងទេ។ មួយទៀតខ្ជិលណាស់បងព្រោះបើយើងទទួលគេមិនល្អច្បាស់ណាស់គេនិយាយដើមយើងពេញហ្នឹងឥឡូវហើយ"។

មាន សូនីតា ចូលរួមកម្មវិធីសិល្បៈកាលពីពេលថ្មីៗកន្លងទៅ

តារាសម្ដែងរូបនេះបន្តថា មិនមែនមកពីខ្វះថវិកាទេ នាំឱ្យនាងមិនធ្វើខួបកំណើតធំៗដូចជាតារាមួយចំនួន។ កត្តាចំណងនាងមិនចង់ខ្ជះខ្ជាយពេលវេលា និង ថវិកាឥតប្រយោជន៍ ធ្វើខួបឱ្យមហាជនកោតសរសើរ ឬក៏ចាប់អារម្មណ៍។

ទោះជាយ៉ាងណាក៏ដោយ មាន សូនីតា អះអាងថា នៅថ្ងៃនេះ កញ្ញា នឹងធ្វើខួបជាលក្ខណៈតូចល្មមមួយ ជាមួយក្មេងកំព្រាក្នុងអង្គការ លើកស្ទួយប្រជាពលរដ្ឋ ស្ថិតនៅម្ដុំគំនរសំរាម ស្ទឹងមានជ័យ ដែលនាងធ្លាប់ធ្វើជាអ្នកស្ម័គ្រចិត្តក្នុងអង្គការនេះ កាលពីពេលថ្មីៗកន្លងទៅ។

តារាម៉ូដែល និងជាតារាសម្ដែងគម្រប់វ័យ ២៥ឆ្នាំខាងលើ ចាត់ទុកការធ្វើខួបកំណើតជាលក្ខណៈទ្រង់ទ្រាយតូចតាចជាមួយក្មេងកំព្រា ដោយមានអំណោយមួយចំនួនយកជូនក្មេងៗមិនមានឪពុកម្ដាយ គឺជារឿងមួយប្រសើរជាង យកលុយទាំងដុលៗធ្វើខួបធំគ្មានអនុស្សាវរីយ៍ជាប់ខ្លួន។

“ធ្វើខួបតូចតាចជាមួយក្មេងៗកំព្រាស្ងប់ស្ងាត់ មិនសប្បាយដូចតារាដទៃទៀតគេធ្វើខួបធំដុំក៏ពិតមែន ប៉ុន្តែខ្ញុំសប្បាយចិត្ត ហើយមានអនុស្សាវរីយ៍មួយជីវិតជាមួយពួកគាត់"។ មាន សូនីតា បន្ថែម។

កញ្ញា មាន សូនីតា គឺជាអតីត Freshie Girl លេខ៤ ឆ្នាំ២០០៩។ នាងមានឈ្មោះបោះសំឡេងខ្លាំងអំឡុងពេលអ្នកស្រី ពាន់ ភួងបុប្ផា នៅជាអ្នកដឹកនាំរឿងស្ថានីយទូរទស្សន៍ CTN។ ស្រីស្អាតរូបនេះ តែងឆក់ឱកាសក្លាយជាតួឯកញឹកញាប់ដូចជាក្នុងរឿង “នាយឡប់ ជំពប់ស្នេហ៍” រឿង “អង្គរក្សបេះដូង” និង រឿង “អ្នកមានគុណ” ជាដើម។ ក៏ប៉ុន្តែនាពេលបច្ចុប្បន្នឱកាសក្ដោបទីផ្សារភាពយន្តរបស់នាងហាក់ធ្លាក់ចុះ មិនលេចធ្លោយដូចមុនទេ៕

អានអត្ថបទបន្ត៖ អតីតបេក្ខភាព “ស្ដាប់ចម្រៀងរបស់ខ្ញុំ” បញ្ចេញOriginal

អានអត្ថបទបន្ត៖ ស្រីស្អាត សំបូរ ជានិច្ច លាសិល្បៈមែនទែនហើយ!

អានអត្ថបទបន្ត៖ វ៉ាង ស្រីណូ៖ ដើមទ្រូងខ្ញុំឡើងចុះតាមគីឡូ