អាំងប៉ាវជូនគ្នាចូលឆ្នាំចិន គួរដាក់លុយប៉ុន្មានមានហុងស៊ុយ?

2016-01-30 13:20:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនជាតិចិន ចាត់ទុកពណ៌ក្រហមជានិមិត្តរូបនៃថាមពល ភាពរីករាយ និងសំណាងល្អ។ ជាទូទៅ ពេលចូលឆ្នាំចិន គេតែងប្រើពណ៌ក្រហមដើម្បីរៀបចំតុបតែងផ្ទះ ហើយក្នុងឱកាសនោះ អ្នកមានគ្រួសារភាគច្រើន ក៏ជូនអាំងប៉ាវទៅញាតិមិត្ត និងមនុស្សជាទីស្រលាញ់ជុំវិញខ្លួនផងដែរ។

គោលបំណងនៃការជូនអាំងប៉ាវក្រហម គឺដើម្បីបញ្ជូនពរនិងសំណាងល្អដល់អ្នកទទួល ហើយក៏ដើម្បីទទួលបានសំណាងនោះមកវិញផងដែរ។ ពេលទទួលបានអាំងប៉ាវ អ្នកពិតជាមានភាពរីករាយ ប៉ុន្តែការបើកអាំងប៉ាវអ៊ុតចំនួនលុយមុខអ្នកឲ្យ គឺជារឿងមិនសមគួរ។

ជាទម្លាប់ បើអ្នកមិនទាន់រៀបអាពាហ៍ពិពាហ៍ទេ មិនចាំបាច់ជូនអាំងប៉ាវទៅអ្នកដទៃឡើយ។ ចំណែកសាច់ញាតិរបស់អ្នក ដូចជាឪពុកម្ដាយ និងកុងម៉ា គួរបន្តផ្ដល់អាំងប៉ាវដល់អ្នក បើទោះអ្នករៀបការរួចក៏ដោយ។ ការធ្វើបែបនេះ ដើម្បីបង្ហាញពីក្ដីស្រលាញ់ និងការជូនពរដល់អ្នក។

នៅក្នុងអាំងប៉ាវនីមួយៗ តែងមានការដាក់លុយខុសៗគ្នាទៅតាមកម្រិតជីវភាពជាក់ស្ដែងរបស់អ្នកឲ្យ។ ជាការពិតណាស់ បើដាក់កាន់តែច្រើនរឹតតែល្អ ប៉ុន្តែអ្វីដែលសំខាន់ គឺអាំងប៉ាវដែលធ្វើពីក្រដាសពណ៌ក្រហម មិនមែនចំនួនលុយតិច ឬច្រើននៅក្នុងនោះទេ។

សម្រាប់អ្នកមាន គេប្រាកដជាដាក់លុយច្រើន ដើម្បីរកស៊ីធូរធារ លុយហូរចូលមកវិញដូចអ្វីដែលដាក់ក្នុងអាំងប៉ាវនោះ។ ចំណែកអ្នកមិនសូវសម្បូរធនធាន អាចមានការស្ទាក់ស្ទើរ មិនដឹងថាគួរដាក់ចំនួនប៉ុន្មានឲ្យស័ក្ដិសម និងមានហុងស៊ុយល្អ។

បើតាមគេហទំព័រ Chinahighlights របស់ចិន បានបញ្ជាក់ពីចំនួនលុយ ដែលគេច្រើនដាក់ក្នុងអាំងប៉ាវក្រហមដើម្បីទទួលបានហុងស៊ុយដូចខាងក្រោម៖

សម្រាប់អ្នកចាស់ជាង(ឪពុកម្ដាយ កុងម៉ា...) គេច្រើនដាក់ពី ៤០០យាន់(៦៤ដុល្លារ) ទៅ ២០០០យាន់(៣២០ដុល្លារ)

សម្រាប់អ្នកក្មេងជាងមិនទាន់មានចំណូល(ជាពិសេសអ្នកនៅរៀន ដូចជាក្មេងៗ សាច់ញាតិ និងមិត្តភ័ក្ដិជិតស្និទ្ធ) គេច្រើនដាក់ពី ៥០យាន់(៨ដុល្លារ) ទៅ ២០០យាន់(៣២ដុល្លារ)

សម្រាប់កូនខ្លួនឯងផ្ទាល់ គេច្រើនដាក់ ១០០យាន់(១៦ដុល្លារ) ឬច្រើនជាងនេះតាមចិត្តចង់

សម្រាប់បុគ្គលិកផ្ទាល់ គេច្រើនដាក់ពី ១០០យាន់(១៦ដុល្លារ) ទៅ ១០០០យាន់(១៦០ដុល្លារ)

សម្រាប់ក្មេងដទៃទៀត ដែលមិនមែនជាសាច់ញាតិ គួររៀបចំអាំងប៉ាវក្រហមតូចៗ ដោយដាក់លុយ ១០យាន់(១,៦ដុល្លារ) ទៅ ២០យាន់(៣,២ដុល្លារ) ក៏អាចនាំសំណាងល្អដល់អ្នកដូចគ្នា៕

ចុចអាន៖ អីចឹងសោះ! បានចូលឆ្នាំចិនងាកទៅណាក៏ឃើញពណ៌ក្រហម!

ដោយ៖ គង់ វិសាល ប្រភព៖ chinahighlights