ការពិតវីដេអូ ស៊ន សៀវម៉ី វាយគ្នានឹងតុក្កតា ជាស្នាដៃកូនខ្មែរបង្កើតឡើងទាំងលំបាក
- 2015-03-02 18:14:28
- ចំនួនមតិ 0 | ចំនួនចែករំលែក 0
ការពិតវីដេអូ ស៊ន សៀវម៉ី វាយគ្នានឹងតុក្កតា ជាស្នាដៃកូនខ្មែរបង្កើតឡើងទាំងលំបាក
ចន្លោះមិនឃើញ
លោក ជួ ប៊ុនសេង ជាអ្នកដឹកនាំរឿង និងផលិតករ ហើយក៏ជា CEO នៃក្រុមហ៊ុន Slekrith Film Co.,ltd បានដឹកនាំក្រុមរបស់ខ្លួនផលិតវីដេអូឃ្លិបពាណិជ្ជកម្មសែលកាត ស៊ន សៀវម៉ី វាយជាមួយតុក្កតាទាំងលំបាកលំបិនដើម្បីសម្រេចវីដេអូដ៏រស់រវើកមួយនេះ។
លោក ជួ ប៊ុនសេង បានឲ្យដឹងថា ខ្សែវីដេអូនេះក្រុមបានធ្វើឡើងទាំងយកចិត្តទុកដាក់ មិនបានសម្រាកពេលថ្ងៃត្រង់ សូម្បីតែថ្ងៃចុងសប្ដាហ៍ក៏មិនបានសម្រាក ដើម្បីធ្វើឲ្យរួចក្នុងរយៈពេល ១ ខែ។
លោកបន្តថា វីដេអូនេះរៀបចំតាមដំណាក់កាល ហើយតួអង្គសំខាន់គឺ ស៊ន សៀវម៉ី ដែលត្រូវថត និងរៀបប្លង់កាយវិការតែម្នាក់ឯងជាមុនសិន បន្ទាប់មកត្រូវផលិតនូវកាយវិការរបស់តួអង្គផ្សេងៗដែលត្រូវវាយជាមួយ ស៊ន សៀវម៉ី ជាតុក្កតា។
ប៊ុនសេងថា មានសមាជិក ៦ នាក់ជាអ្នក Design និងបង្កើតចលនារបស់តួអង្គនីមួយៗ ហើយ ១៦ នាក់ផ្សេងទៀតជំនួយក្នុងការផលិតវីដេអូទាំងមូល។ ក្រុមលោកបានរកគំនិតច្នៃប្រឌិតថ្មីៗ ដែលពឹងផ្អែកលើបច្ចេកវិទ្យាថ្មីមានលើកាមេរ៉ាទំនើបចុងក្រោយក្នុងការថត ចំណែក Software យើងត្រូវការកម្មវិធីស្តង់ដាធំៗក្នុងការរចនារូប 3D និង ចលនា ជាដើម។
ហើយសម្រាប់ ការផលិតខែ្សភាពយន្ត ឬ វីដេអូឃ្លិបបាន លុះត្រាតែធ្វើតាមដំណាក់កាល ៣ ធំៗគឺ Pre Production , Production និង Post Production។ ដោយ Pre Production គឺជាការចាប់ផ្ដើមរកនូវសាច់រឿង រកតួអង្គ កន្លែង ស្ទូឌីយ៉ូ សម្ភារៈផ្សេងៗដែលក្នុងសាច់រឿងត្រូវការដើម្បីឆ្ពោះទៅកាន់ Production ដែលជាដំណាក់កាលទី ២។ ចំណែក Production គឺគេចាប់ផ្ដើមថតវីដេអូតែម្ដង បន្ទាប់មកឈានចូល Post Production ដែលជាដំណាក់កាលទី ៣ នោះគឺ ត្រូវយកវីដេអូដែលថតរួចហើយទៅកាត់ត ឬ បន្ថែម Effect បន្ថែមចលនា កែពណ៌ ធ្វើឲ្យស្អាតដើម្បីសម្រេចជាវីដេអូចុងក្រោយ។
អ្នកដឹកនាំរូបនេះបន្ថែមថា មនុស្សទូទៅគិតថាការធ្វើ 3D ថតជាផ្ទាំងពណ៌បៃតងហ្នឹងគឺ ងាយស្រូលជាងការចេញទៅថតនៅខាងក្រៅ ប៉ុន្តែការពិតគឺពិបាកខ្លាំងណាស់នៅពេល Post Production កាត់ត រចនានៅក្នុងកុំព្យូទ័រ។ ចំណែកអ្នកធ្វើការក្នុង Post Production ត្រូវអង្គុយមុខកុំព្យូទ័រពី ១៥ ទៅ ២០ ម៉ោងដើម្បីកែវីដេអូហ្នឹងឲ្យដូចមែនទែន។
ជាចុងក្រោយលោកថា ក្រុមហ៊ុនស្លឹករឹត ពិតជាត្រូវការមនុស្សដែលមានទេពកោសល្យដែលជាកូនខ្មែរបន្ថែម ក្នុងវិស័យផលិតភាពយន្ត ហើយការផលិតផលនេះមើលទៅសប្បាយតែតាមពិតក្រុមលោកធ្វើការសឹងតែមិនបានគេង។ ជាងនេះទៅទៀតស្លឹករឹតនឹងបន្តជំរុញនូវវិស័យនេះបន្ថែមលើមួយកម្រិតទៀត ហើយសង្ឃឹមថា លោកនឹងនាំយកមកនូវអ្វីដែលថ្មី ក្នុងការផលិតវីដេអូឃ្លីបប្លែកៗជូនដល់ប្រជាជនកម្ពុជា។
អសយដ្ឋានក្រុមហ៊ុនស្លឹករឹត៖ អគារលេខ 41 ផ្លូវលេខ 576 សង្កាត់បឹងកក់ 2 ខណ្ឌទួលគោក ឬ លេខទូរសព្ទ 017 555 252
http://youtu.be/uoSNtkNbXZI
អត្ថបទ៖ ដារ៉ាឆានី