ទិញម៉ូតូតគ្នាអត់បានកាត់ឈ្មោះប្រឈមបញ្ហាអ្វីខ្លះ?
- 2015-03-18 14:43:13
- ចំនួនមតិ 0 | ចំនួនចែករំលែក 0
ទិញម៉ូតូតគ្នាអត់បានកាត់ឈ្មោះប្រឈមបញ្ហាអ្វីខ្លះ?
ចន្លោះមិនឃើញ
ប្រភពពីអ្នកគួកជេរម៉ូតូមួយចំនួនបានប្រាប់ Sabay ថា ករណី ទិញលក់ម៉ូតូតគ្នាបច្ចុប្បន្ន មិនសូវមានការកាត់ឈ្មោះត្រឹមត្រូវតាមច្បាប់នោះទេ។ អ្នកទិញបានប្រើកិច្ចសន្យាជំនួសឱ្យការផ្ទេរឈ្មោះ ដែលតម្រូវឱ្យធ្វើនៅមន្ទីរសាធារណៈការ និងដឹកជញ្ជូន។ លោក មករា អ្នកគួកជេរម៉ូតូម្នាក់នៅម្តុំវត្តសំពៅមាសបានរៀបរាប់ថា ការកាត់ឈ្មោះនៅមានកម្រិតតិចតួចក្នុងចំណោមអ្នកទិញម៉ូតូតគ្នាជិះ បញ្ហានេះអាចថា ម៉ូតូដែលបានទិញនោះប្តូរម្ចាស់ច្រើននាក់ហើយអត់មានកាត់ឈ្មោះ។ ដូច្នេះអ្នកទទួលទិញចុងក្រោយក៏មានការលំបាកក្នុងការទៅកាត់ឈ្មោះដែរ។ ម្យ៉ាងទៀតទាំងអ្នកទិញ និងអ្នកលក់មិនចង់ចំណាយច្រើនលើការកាត់ឈ្មោះដែលពីមុនត្រូវចំណាយប្រមាណ២០ ដុល្លារ តែបច្ចុប្បន្នបានឡើងថ្លៃជិតពីររយដុល្លារ។ "ធម្មតាខ្ញុំរកស៊ី គាត់ប្តូរម្ចាស់ពីរបីនាក់អត់មានកាត់ឈ្មោះផង យើងទិញចុងក្រោយក៏ទៅតាមហ្នឹងដែរ។ តែសំខាន់យើងមានសាក្សី និងលិខិតទិញលក់បន្តលើកមុន អាចទុកចិត្តបានថាម៉ូតូមិនជាប់ពាក់ព័ន្ធ។ ចំណែកអ្នកទិញខ្លះទៀតគាត់អត់ចង់ចំណាយច្រើនទេ...ពីមុនអស់២០ ដុល្លារ តែបច្ចុប្បន្នឮថាអស់ជិត២០០ដុល្លារព្រោះត្រូវរត់ឯកសារដល់ពន្ធដារឯណោះ”។
លោកបានបន្ថែមថា អ្នកទិញមួយចំនួនដឹង ឯខ្លះទៀតមិនចាប់អារម្មណ៍ទៅនឹងផលលំបាកថ្ងៃក្រោយយ៉ាងម៉េចទេ។ អ្នកទិញខ្លះផ្ដោតសំខាន់តែលើ ម៉ូតូមានពន្ធ និងមានកាតគ្រីត្រឹមត្រូវជាការស្រេច។ ប៉ុន្តែការទិញលក់បែបនេះក៏ធ្លាប់នាំមកនូវមេរៀនមិនល្អផងដែរ។ "ខ្ញុំធ្លាប់ជួបម្តងដែរ គាត់យកម៉ូតូមិត្តភ័ក្ដិម្នាក់ទៀតមកលក់ប្រាប់ថា ម៉ូតូប្អូន មានឯកសារទាំងអស់ ដល់ពេលគេប្តឹង បានមិត្តភ័ក្ដិម្នាក់ជាសាក្សីចេញសង”។ ទាក់ទងបញ្ហានេះលោក អ៊ា ចរិយា អ្នកប្រឹក្សាឯករាជ្យផ្នែកសុវត្ថិភាពចរាចរផ្លូវគោកបានប្រាប់Sabay ថា តាមច្បាប់អ្នកលក់ដែលមានឈ្មោះលើប័ណ្ណសម្គាល់យានយន្ត(កាតគ្រី) នឹងប្រឈមមុខបញ្ហាមួយចំនួនពេលសមត្ថកិច្ចធ្វើការស៊ើបអង្កេតរឿងអ្វីមួយតាមរយៈអត្តសញ្ញាណយានយន្តពេលមានបញ្ហា ដូចជាការបើកបុកគេ ហើយរត់គេចខ្លួន ឬការប្រើប្រាស់យានយន្តនោះដើម្បីធ្វើអំពើលួច ឆក់ជាដើម។ លោកថា ម្ចាស់យានយន្តដែលពុំបានធ្វើការផ្ទេរឈ្មោះនោះ នឹងត្រូវសមត្ថកិច្ចកោះហៅទៅសាកសួរ។ ចំណែកអ្នកទិញវិញ ក្នុងករណីបាត់ឯកសារដូចជាប័ណ្ណសម្គាល់យានយន្ត គឺមិនអាចស្មើសុំធ្វើទ្បើងវិញដោយខ្លួនឯងបានឡើយ គឺត្រូវស្វែងរកម្ចាស់ដើម ដែលមានឈ្មោះលើប័ណ្ណសម្គាល់យានយន្តឱ្យមកធ្វើការស្មើសុំធ្វើទ្បើងវិញ។ ដូច្នេះអាចមានបញ្ហាជាច្រើនទៀតកើតឡើងទាក់ទងនឹងប័ណ្ណសម្គាល់យានយន្តនេះ។
ទោះយ៉ាងណា លោក ពៅ ម៉ាលី អគ្គលេខាធិការរង គណៈកម្មាធិការជាតិសុវត្ថិភាពចរាចរណ៍ផ្លូវគោកបានប្រាប់ Sabay ថា ក្នុងច្បាប់ចរាចរណ៍ថ្មីការផ្ទេរឈ្មោះយានយន្តជាទូទៅត្រូវធ្វើ ក្នុងរយៈពេល៩០ថ្ងៃ បើលើសពីនេះនឹងប្រឈមការផាកពិន័យ។ ប៉ុន្តែក្នុងច្បាប់ថ្មីមិនទាន់ចេញអនុក្រឹត្យកំណត់ផាកប៉ុន្មាននៅឡើយទេ។ ដោយមិនអាចជម្រាបពីតម្លៃកាត់ឈ្មោះយានយន្តបាន ព្រោះអាស្រ័យលើទំហំស៊ីឡាំងរបស់យានយន្តនីមួយៗ លោកពៅ ម៉ាលី បានរៀបរាប់ថា តម្លៃកាត់ឈ្មោះត្រូវបានបិទផ្សាយនៅមន្ទីរសាធារណៈ និងដឹកជញ្ជូនតាមខេត្តក្រុង និងអាចទទួលឯកសារចន្លោះពី ១៥ ថ្ងៃទៅ ៣០ ថ្ងៃ។
លោកបានបន្ថែមថា អ្នកមិនអើពើលើការកាត់ឈ្មោះ ក្រៅពីជាប់ពាក់ព័ន្ធ ការកោះហៅពីសមត្ថកិច្ច ក្នុងច្បាប់ចរាចរណ៍ថ្មីក៏តម្រូវឱ្យមានការត្រួតពិនិត្យមើលឯកសារទាំងនោះភ្ជាប់ទៅនឹងប័ណ្ណបើកបរផងដែរ។សមត្ថកិច្ចនឹងត្រូវផាកពិន័យបើម្ចាស់យានយន្តមិនបានកាត់ឈ្មោះត្រឹមត្រូវ។ ប៉ុន្តែជំហានដំបូងយើងត្រូវផ្សព្វផ្សាយច្បាប់ថ្មីនេះឱ្យប្រជាពលរដ្ឋបានយល់។ "ឯកសារនេះមានសារៈសំខាន់ណាស់ គេមិនចង់បានឈ្មោះមួយទៅឈ្មោះមួយ ឬចង់បានលុយប្រថាប់ត្រាអីនោះទេ ចង់ធ្វើយ៉ាងម៉េចសុវត្ថិភាពខ្លួនគាត់ ក៏ដូចឯកសារសំអាងមុខច្បាប់ពេលមានបញ្ហាកើតឡើង។ ឧទាហរណ៍គេយកឡានហ្នឹងទៅប្លន់ ឬមួយទៅបុកអ្នកណាស្លាប់ ដំបូងផុតគេទៅរកគាត់ម្ចាស់ដើមហ្នឹងហើយ”៕
អត្ថបទ៖មៃ សុខលីម