ជម្រុះ World Cup៖ ប្រាក់រង្វាន់ដល់ដៃអ្នកទាត់បាល់ចូលទីម៉ាកាវ ធារី ចន្ថាប៊ីន ព្រឹកមិញ

2015-03-20 17:17:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ថវិការបស់អ្នកគាំទ្របាល់ទាត់ជាតិដែលសន្យាថានឹងផ្ដល់ឱ្យកីឡាករជម្រើសជាតិកម្ពុជា រូបណាអាចរកគ្រាប់បាល់បំប៉ោងសំណាញ់ទីរបស់ក្រុមម៉ាកាវ ក្នុងជំនួបជើងទី២ នៅវគ្គជម្រុះបឋមប្រចាំទ្វីបអាស៊ីនៃពានរង្វាន់ FIFA World Cup 2018 បានដល់ដៃ កីឡាករ ធារី ចន្ថាប៊ីន ហើយនៅព្រឹកថ្ងៃទី ២០ ខែ មីនា នេះ។

ធារី ទទួលទឹកប្រាក់ឧបត្ថម្ភតាមរយៈលោក ជាន ចាន់រ៉ា ប្រធានផ្នែកកីឡារបស់គេហទំព័រ Sabay

លោក លឹម គឹមឡុង អាជីវករនៅក្នុងរាជធានីភ្នំពេញបានផ្ដល់ប្រាក់តាមការសន្យាក្នុងលក្ខខណ្ឌ គ្រាប់បាល់១ គ្រាប់រង្វាន់ ១០០ ដុល្លារ។ ចំណែកលោក Tan Vanneth អ្នកគាំទ្របាល់ទាត់មកពីខេត្តក្រចេះ ក៏បានផ្ដល់ជូនទឹកប្រាក់ ៥០ ដុល្លារដល់ ធានី ចន្ថាប៊ីន ដែរ ព្រោះតែលោកពេញចិត្តគ្រាប់បាល់ហ្វ្រីឃីត របស់កីឡាករខ្មែរ-បារាំង រូបនេះ ទាត់បំប៉ោងសំណាញ់ទីរបស់ក្រុមម៉ាកាវ។ អ្នកទាំង២ បានផ្ញើប្រាក់ឧបត្ថម្ភតាមរយៈ Sabay មានចំនួនសរុប ១៥០ ដុល្លារ។

សម្រាប់ជើងទី២ រវាងកម្ពុជា ជាមួយម៉ាកាវ កីឡាករ ធារី ចន្ថាប៊ីន បានទាត់ហ្វី្រឃីត បើកការនាំមុខក្រុម ម៉ាកាវ នៅនាទី ២៩ នៃការប្រកួត ក្រោមក្រសែភ្នែកទស្សនិកជន ១០០០ នាក់ ប៉ុន្តែក្រុមម្ចាស់ផ្ទះបានតាមស្មើវិញនៅនាទី ៥២ ដោយបាល់ពិន័យ ១១ ម៉ែត្រ របស់កីឡាករ Leong Ka Hang។

ជាថ្នូរនឹងប្រាក់រង្វាន់លើកទឹកចិត្ត ធារី ចន្ថាប៊ីន ខ្សែបម្រើមកពីក្លិបភ្នំពេញក្រោន សូមថ្លែងអំណរគុណដល់អ្នកគាំទ្រដែលបានផ្ដល់ការលើកទឹកចិត្តខ្លួនក៏ដូចជាក្រុមជម្រើសជាតិ រាល់ការប្រកួត ជាពិសេសម្ចាស់ទឹកប្រាក់ផ្ទាល់។ រូបគេសន្យាថានឹងប្រឹងប្រែងហ្វឹកហាត់ បើមានឱកាសនឹងរកជ័យជម្នះជួយក្រុមជម្រើសជាតិលើកក្រោយៗទៀត៕

ទស្សនាគ្រាប់បាល់ហ្វ្រីឃីត របស់ ធារី ចន្ថាប៊ីន សូមចុចទីនេះ...

អត្ថបទ៖ ម៉ឺន រស្មី