លី ច័ន្ទសីហា ជិតចូលរោងការជាមួយមន្ត្រីយោធា
- 2015-03-26 21:58:15
- ចំនួនមតិ 0 | ចំនួនចែករំលែក 0
លី ច័ន្ទសីហា ជិតចូលរោងការជាមួយមន្ត្រីយោធា
ចន្លោះមិនឃើញ
“ពួកយើងត្រៀមនឹងភ្ជាប់ពាក្យក្នុងពេលឆាប់ៗ ហើយរឿងរៀបការ អាចដើមឆ្នាំ ២០១៦ ឬក៏ឆ្នាំ ២០១៧ ខាងមុខ"។ នេះជាការបញ្ជាក់ពីតារាសម្ដែង លី ច័ន្ទសីហា ក្នុងពិធីក្រុងពាលីរឿង "ខ្មោចថតកុនព្រឹកមិញរបស់ផលិតកម្ម មហាហង្ស។
អតីតតារាទឹកភ្នែក និយាយថា ការត្រៀមនឹងភ្ជាប់ពាក្យឆាប់ៗ និង ត្រៀមចូលរោងជ័យនោះ គឺក្រោយពីនាង និង គូស្នេហ៍ស្គាល់ចិត្តស្គាល់ថ្លើមគ្នាអស់ហើយ។ ដោយឡែកខាងគ្រួសារទាំងសងខាងក៏ត្រូវរ៉ូវគ្នាអស់ហើយដែរ គឺរង់ចាំតែថ្ងៃមកដល់ប៉ុណ្ណោះ។
លី ច័ន្ទសីហា ក្នុងពិធីក្រុងពាលីរឿង ខ្មោចថតកុន ព្រឹកមិញ
ទន្ទឹមនឹងគ្នានេះ លី ច័ន្ទសីហា ប្រាប់បង្ហើបថា ពេលនេះគូស្នេហ៍របស់ខ្លួនជាមន្ត្រីយោធា កំពុងសិក្សានៅក្រៅប្រទេស ហើយត្រៀមនឹងវិលមក កម្ពុជាឆាប់ៗ ដើម្បីរៀបចំពិធីភ្ជាប់ពាក្យ។
តារាសម្ដែងធ្លាប់សាងឈ្មោះល្បីរូបនេះ បានប្រាប់ពីដំណើរដើមទងនាំឱ្យអ្នកទាំងពីរស្គាល់គ្នារហូតក្លាយជាគូស្នេហ៍ថា៖ "ខ្ញុំស្គាល់គាត់តាមរយៈមិត្តភ័ក្ដិណែនាំក្នុងកម្មវិធីសិល្បៈមួយ។ ដំបូងពួកយើងមិនទាន់ស្គាល់ចិត្តគ្នា ហើយក៏មិនទាន់សារភាពរៀងខ្លួនដែរ តែក្រោយស្វែងយល់គ្នារួចសារភាពថាស្រលាញ់គ្នាទៅវិញទៅមក"។
ទន្ទឹមនឹងវិថីស្នេហាឈានទៅរកភាពជោគជ័យ ងាកទៅផ្នែកវិស័យភាពយន្តវិញ ម្ចាស់សម្អាងការ លី ច័ន្ទសីហា ហាក់មិនមានទីផ្សារខ្ពស់ដូចកាលមុនៗទេ។ សីហា បានទទួលស្គាល់ថា ជារឿងពិត ក៏ប៉ុន្តែតារាសម្ដែងរូបនេះអះអាងថា ទោះជាស្ងាត់ផ្នែកភាពយន្ត តែទីផ្សារច្រៀងតាមប៉ុស្តិ៍ ក៏ដូចជាសម្ដែងតាមកម្មវិធីផ្សេងៗនៅតែមានជាប់រហូត ជាពិសេសការចេញសម្ដែងនៅក្រៅប្រទេស។
លី ច័ន្ទសីហា ជាតារាសម្ដែងធ្លាប់សាងឈ្មោះល្បីម្នាក់កាលពីពេលកន្លងទៅ ដោយទស្សនិកជនធ្លាប់ដាក់រហ័សនាមដល់នាងថា ជាតារាទឹកភ្នែកថែមទៀតផង។ ក៏ប៉ុន្តែមួយរយៈចុងក្រោយទីផ្សារសម្ដែង សីហា ហាក់ធ្លាក់ចុះជាបន្តបន្ទាប់។ ក្រៅតែពីរតារាសម្ដែងនាងក៏មានអាជីវកម្មផ្ទាល់ខ្លួនមួយដែរ គឺសម្អាងការ លី ច័ន្ទសីហា៕
អានអត្ថបទបន្ត៖Harry ស្រក់ទឹកភ្នែកលើឆាក ពេល Louis ឱបស្រមោល Malik
អានអត្ថបទបន្ត៖តារាចម្រៀង The Voice Cambodia ចេញមុខដំបូងថតកម្មវិធីចូលឆ្នាំខ្មែរ
អានអត្ថបទបន្ត៖ ប៉ែន ចំរុង ជ្រើសរើសយកតែ ១ ក្នុងចំណោម ៥
លី ច័ន្ទសីហា និង គូស្នេហ៍ជាមន្ត្រីយោធា រូបថត៖ Facebook
អត្ថបទ៖ អ៊ីង សុឡា