ខ្សែអាត់សំឡេងបង្ហាញថាគ្រោះថ្នាក់ 4U9525 កើតឡើងដោយការធ្វើអត្តឃាត

2015-03-27 16:13:15
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រោះថ្នាក់លើជើងហោះហើរ 4U9525 របស់ក្រុមហ៊ុនអាកាសចរណ៍អាល្លឺម៉ង់ Germanwings ដែលសម្លាប់ជីវិតមនុស្សអស់ ១៥០នាក់ បានបន្សល់ទុកនូវចម្ងល់ធំៗពីរគួរឲ្យសង្ស័យ។ ទីមួយ អំឡុងពេលយន្តហោះប្រភេទ Airbus A320 ជួបគ្រោះថ្នាក់ ៨នាទី ហេតុអ្វីមិនមានការផ្ដល់សញ្ញាអាសន្ន? ទីពីរ ហេតុអ្វីអាកាសយានិកជាប់ទ្វារនៅក្រៅបន្ទប់បញ្ជាការហោះហើរ មិនមានការឆ្លើយតបពីសហសេវិក បើទោះខំប្រឹងទម្លាយចូលទៅខាងក្នុងវិញ?

ទិដ្ឋភាពកន្លែងធ្លាក់យន្តហោះ

យ៉ាងណាក្ដី ទិន្នន័យខ្សែអាត់សំឡេងចុងក្រោយ ដែលទាញបានពីឧបករណ៍ថតសំឡេងក្នុងបន្ទប់បញ្ជាការហោះហើរ (ប្រអប់ខ្មៅ) បានបង្ហាញថា ជំនួយការអាកាសយានិក (co-pilot) គឺជាអ្នកបញ្ជាយន្តហោះឲ្យជួបវិនាសកម្មនៅតំបន់ជួរភ្នំ Alps ដោយចេតនា និងមានបំណងធ្វើអត្តឃាតជាមួយមនុស្ស ១៤៩នាក់ផ្សេងទៀតលើយន្តហោះ។ សេចក្ដីរៀបរាប់លម្អិត ស្ដីពីអាត់សំឡេងដែលស្រង់បានពីប្រអប់ខ្មៅ ត្រូវបង្ហាញនៅក្នុងសន្និសីទសារព័ត៌មានមួយ ដោយលោក Brice Robin ដែលជារដ្ឋអាជ្ញាប្រចាំទីក្រុង Marseille ប្រទេសបារាំង។

ជំនួយការអាកាសយានិក

លោក Robin បាននិយាយថា ជំនួយការអាកាសយានិក ដែលជាជនជាតិអាល្លឺម៉ង់ ហាក់ដូចជាមានបំណងចង់កម្ទេចយន្តហោះ។ មុនពេល បន្ទប់បញ្ជាការហោះហើរបិទជាប់ កិច្ចសន្ទនារវាងភីឡុតទាំងពីរនាក់ក្នុងរយៈពេល ២០នាទីនៃការហោះហើរចេញពីទីក្រុងបាសេឡូណា បានប្រព្រឹត្តទៅគ្មានអាក់។

យ៉ាងណាមិញ ការឆ្លើយតបរបស់ជំនួយការអាកាសយានិក បានប្រែជាសោះកក្រោះខ្លីៗនៅពេលហោះបានពាក់កណ្ដាលផ្លូវ។ ក្រោយមក គេបានឮសំឡេងអាកាសយានិក ប្រាប់ជំនួយការឲ្យគ្រប់គ្រងការហោះហើរជំនួសខ្លួន បន្ទាប់មកមានសំឡេងរុញកៅអីមកក្រោយ ហើយទ្វារបន្ទប់ក៏បានបិទ។

ជំនួយការអាកាសយានិក បានបញ្ឈប់ការបញ្ជាយន្តហោះ និងចាប់ផ្ដើមប្រើប្រព័ន្ធគ្រប់គ្រងការហោះហើរ ដើម្បីធ្វើឲ្យយន្តហោះជួបគ្រោះថ្នាក់។ ជំនួយការដែលមានតែម្នាក់ឯងក្នុងយន្តហោះ មិនបាននិយាយអ្វីទាំងអស់ ពេលអាកាសយានិកចាកចេញពីបន្ទប់បញ្ជាការហោះហើរ។

លោក Robin បានបញ្ជាក់ថា ជំនួយការអ្នកបើកយន្តហោះនោះ បានដកដង្ហើមធម្មតា ហើយវាមិនមែនជាចង្វាក់ដង្ហើមនៃមនុស្សកំពុងជ្រួលច្របល់នោះទេ។ ចំណែកឯនៅខាងក្រៅវិញ មានសំឡេងភីឡុតកំពុងស្រែកសុំចូលទៅក្នុង និងសម្រែកអ្នកដំណើរ។ យ៉ាងណាក្ដី គេនៅមិនទាន់មានសញ្ញាណណាមួយបញ្ជាក់ថា គ្រោះថ្នាក់យន្តហោះអាចនេះជាអំពើភេរវកម្មនៅឡើយទេ ដោយរង់ចាំការស្រាវជ្រាវបន្ត៕