ប្រអប់ខ្មៅ 4U 9525 បង្ហាញថាភីឡុតជាប់ក្រៅបន្ទប់ព្យាយាមបុកទម្លាយទ្វារ

2015-03-26 16:17:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែអាត់សំឡេងដែលស្រង់ចេញពីប្រអប់ខ្មៅនៃជើងហោះហើរ 4U 9525 បង្ហាញថា អាកាសយានិកបានចាកចេញពីបន្ទប់បញ្ជាការហោះហើរ ហើយមិនអាចចូលក្នុងវិញបាន។ អ្នកបើកយន្តហោះ ដែលមានជំនាញជាង ១០ឆ្នាំនោះ បានជាប់ទ្វានៅខាងក្រៅ និងព្យាយាមទម្លាយទ្វាចូលទៅខាងក្នុងវិញ ខណៈពេលសហសេវិករបស់ខ្លួនគ្មានការឆ្លើយតប។

ប្រអប់ខ្មៅនៃជើងហោះហើរ 4U 9525

ប្រអប់ខ្មៅបានបង្ហាញទៀតថា អំឡុងពេលជួបគ្រោះថ្នាក់នោះ មានតែអាកាសយានិកម្នាក់ប៉ុណ្ណោះដែលនៅបញ្ជាយន្តហោះ។ យ៉ាងណាមិញ ប្រភពពីមន្ត្រីមិនបញ្ចេញឈ្មោះម្នាក់ ដែលជិតស្និទ្ធទៅនឹងការស៊ើបអង្កេត បានប្រាប់កាសែតអាមេរិកថា ដំបូងឡើយកិច្ចសន្ទនារវាងភីឡុតទាំងពីរនាក់ បានប្រព្រឹត្តទៅគ្មានអាក់ និងល្អឥតខ្ចោះ ប៉ុន្តែមិនដឹងហេតុអ្វីបានជាភីឡុតម្នាក់ចាកចេញពីបន្ទប់បញ្ជាការហោះហើរ។

ប្រភពបានអះអាងទៀតថា ភីឡុតដែលចាកចេញពីបន្ទប់បញ្ជាការហោះហើរនោះ បានគោះទ្វារខ្លាំងៗ ប៉ុន្តែពុំមានការឆ្លើយតបឡើយ។ បន្ទាប់មក គេបានព្យាយាមបុកទម្លាយទ្វារចូលទៅក្នុងទៀត ក៏នៅតែគ្មានប្រតិកម្មអ្វីពីខាងក្នុង។

ក្រោយពេលជួបគ្រោះថ្នាក់ភ្លាម មន្ត្រីគ្រប់គ្រងចរាចរណ៍ផ្លូវអាកាស បានលើកឡើងជាចម្ងល់ថា ហេតុអ្វីបានជាអំឡុងពេលយន្តហោះជួបគ្រោះថ្នាក់ ៨នាទី មិនមានការផ្ដល់សញ្ញាអាសន្ន។ របាយការណ៍គ្រោះថ្នាក់បានបង្ហាញថា អ្នកគ្រប់គ្រងចរាចរណ៍ផ្លូវអាកាស ព្យាយាមភ្ជាប់ការទាក់ទងទៅអាកាសយានិក ៣ដង មុនជួបគ្រោះថ្នាក់ ប៉ុន្តែបរាជ័យ។

អាត់សំឡេងនេះគឺជាតឹកតាងដំបូងដែលនាំឲ្យគេអាចសន្និដ្ឋានស្វែងរកមូលហេតុពិត ធ្វើឲ្យយន្តហោះរបស់ក្រុមហ៊ុនអាកាសចរណ៍អាល្លឺម៉ង់ Germanwings ធ្លាក់នៅជ្រលងភ្នំក្នុងប្រទេសបារាំង សម្លាប់ជីវិតមនុស្សទាំង ១៥០នាក់៕