វិស្វករផ្នែកសំឡេង និងឧបករណ៍តន្ត្រីអាមេរិក មកចែករំលែកបទពិសោធន៍នៅខ្មែរ

2015-04-06 22:38:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈមជ្ឈមណ្ឌលតន្ត្រីម៉ាឌីហ្សុន វិស្វករផ្នែកសំឡេង និងឧបករណ៍ភ្លេង Kent Morris មកពីសហរដ្ឋអាមេរិកបានចូលរួមចែករំលែកចំណេះដឹងជាច្រើនពាក់ព័ន្ធទៅនឹងបច្ចេកទេសប្រើប្រាស់ ឬបញ្ជារសម្ភារៈភ្លេងនានាឱ្យបានត្រឹមត្រូវនៅហាងតន្ត្រី ធា ហេង។

លោក ពេជ្រ ណារិទ្ធ អ្នកគ្រប់គ្រងទូទៅមណ្ឌលខាងលើបាននិយាយថា សិក្ខាសាលាធ្វើឡើងពេញ១ថ្ងៃនេះ ក្នុងគោលបំណងពង្រឹងសមត្ថភាពដល់អ្នកធ្វើការក្នុងវិស័យបច្ចេកទេសសំឡេង និងតន្ត្រីក្នុងប្រទេសកម្ពុជា ឱ្យបានប្រហាក់ប្រហែលបណ្ដាប្រទេសផ្សេងទៀត។ ម្យ៉ាងទៀតកន្លងមកអ្នកបច្ចេកទេសផ្នែកនេះ ច្រើនចេះតាមគ្នាប៉ុណ្ណោះ មិនបានទទួលការបណ្ដុះបណ្ដាលត្រឹមត្រូវ។

អ្នកគ្រប់គ្រងទូទៅនិយាយថា៖" ចង់ឱ្យអ្នកធ្វើការពាក់ព័ន្ធផ្នែក សំឡេង មានជំនាញពិតប្រាកដ ទើបបង្កើតឱកាសនេះឡើង មិនចង់ឱ្យស្អីក៏បរទេសនោះទេ ខ្មែរក៏អាចធ្វើបាន"។ លោកបន្តថា កន្លងមកតែងមានបញ្ហាជាច្រើនពាក់ព័ន្ធចំណុច ពោលការរៀបចំដំឡើងបច្ចេកទេសសំឡេងតាមឆាកតន្ត្រី ឬកម្មវិធីផ្សេង តែងមានបញ្ហាកើតឡើង។

ជាលទ្ធផលនៅព្រឹកនេះ មានសិក្ខាកាមកំពុងធ្វើការទាក់ទងផ្នែកសំឡេងចូលរួមប្រមាណជាង២០នាក់ចូលរួមទទួលយកចំណេះដឹងពីវិស្វករមកពីអាមេរិក Kent Morris ទាក់ទងទៅនឹងការប្រើប្រាស់ និងដំឡើងឧបករណ៍ភ្លេងម៉ាក Peavey ដែលជាម៉ាកល្បីទូទាំងពិភពលោក ដែលផ្ដាច់មុខនៅប្រទេសកម្ពុជាដោយមជ្ឈមណ្ឌល ម៉ាឌីហ្សុន។

ជាមួយគ្នានោះ លោក ពេជ្រ ណារិទ្ធ សង្ឃឹមថា ក្រោយសិក្ខាសាលា១ថ្ងៃនេះ សិក្ខាកាមអាចទទួលបានបទពិសោធន៍ល្អ ដើម្បីពង្រឹងសមត្ថភាពបន្ថែមសម្រាប់អនាគត។ ប្រធានមជ្ឈមណ្ឌលខាងលើអះអាងថា អ្នកចូលរួមទាំងអស់ នឹងសាកល្បងប្រគំជាមួយគ្នានៅថ្ងៃស្អែកចាប់ពីម៉ោង៥ល្ងាច ក្នុងអាគារ F នៃមជ្ឈមណ្ឌលកោះពេជ្រ និងបើកឱ្យចូលទស្សនាដោយសេរី៕

អានអត្ថបទ៖ ហៃ ដារ៉ូ៖ “កំប្លែងទើបជាសុបិនពិតរបស់ខ្ញុំ”

អានអត្ថបទ៖ ឈីងឈីង ថ្នាក់លើធ្វើខួបឱ្យ អានអត្ថបទ៖ ស្ងាត់ៗ សាយ រតនៈ ចេញមុខសម្ពោធភោជនីយដ្ឋានតម្លៃរាប់ម៉ឺនដុល្លារ