ជីជី ថា រកស៊ីបានតែជិតៗ

2015-04-18 11:48:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ជីជី ប្រាប់ថា មិនអាចទៅថតរឿងឆ្ងាយពីផ្ទះដូចមុននោះទេ ហើយត្រូវបដិសេធចំពោះសំណើ ពីផលិតកម្មមួយចំនួនមួយរយៈចុងក្រោយនេះ ទាំងសោកស្ដាយ។ ជីជី ប្រាប់ Sabay បែបនេះ នៅក្នុងឱកាសសម្ពោធភោជនីយដ្ឋានមួយ ដែលមានចំណែកហ៊ុនរបស់ដៃគូ សាយ រតនៈ កន្លងទៅ។

ពិធីការិនីរូបនេះនិយាយថា៖ "ពិបាកពេក អត់មាននរណាជួនទៅជួនមកពេលទៅសម្ដែងតាមខេត្ត អញ្ចឹងមានតែផ្អាកសិនទៅ ស្ដាយសឹងអីហើយ"។ នាងបន្តទៀតថា មានកុនភាគរឿងមួយចំនួនតម្រូវឱ្យថតច្រើនថ្ងៃជាប់គ្នានៅតាមបណ្ដាខេត្ត ដែលជាហេតុធ្វើឱ្យប៉ះពាល់ដល់ការងារស្នូលនៅ CTN ក្នុងនាមជាពិធីការិនី ហើយនាងត្រូវតែសម្រេចចិត្តដូច្នេះ។

តារាស្រីរូបនេះបានឱ្យដឹងទៀតថា ក្រៅពីការងារនៅស្ថានីយទូរទស្សន៍ខាងលើ នាងត្រូវរវល់ក្នុងមុខជំនួញខ្លះដែរ ដោយសហការជាមួយបងស្រី ដែលកំពុងដំណើរការទៅមុខបណ្ដើរៗហើយ។ ទោះបីជាយ៉ាងណា ពិធីការិនីកម្មវិធី "រាត្រីកម្សាន្ត" រូបនេះ បានឱ្យដឹងទៀតថា នាងនៅតែទទួលធម្មតារាល់ការសម្ដែងនៅភ្នំពេញ ឬតំបន់ក្បែរនេះដោយមិនពិបាករកអ្នកជួនទៅមកនោះទេ។

ចំពោះការផ្អាករហូតដល់ពេលណានោះ តារាស្រីរាងតូចច្រឡឹងខាងលើមិនបានបញ្ជាក់នោះទេ។ ប៉ុន្តែ ជីជី អះអាងថា អាស្រ័យលើការចរចាគ្នាជាមួយភាគីផលិតកម្មសុំការយោគយល់ តើមានរឿងណា ដែលមិនចាំបាច់ថតជាប់គ្នាយូរថ្ងៃ ឬយ៉ាងណា ព្រោះសុទ្ធសឹងតែជាការងារនៅក្នុងចង្កោមសិល្បៈ ដែលស្រលាញ់ និងមានសារសំខាន់ដូចគ្នា៕