Tao ក្រុម EXO លាអ្នកគាំទ្រទៅរៀនបន្ត និងព្យាបាលរបួសនៅអាមេរិក

2015-05-08 20:59:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈដែលពាក្យចចាមអារ៉ាមពីការចាកចេញពីក្រុម EXO របស់គេមិនទាន់ស្ងប់ស្ងាត់នៅឡើយ សារព័ត៌មានចិនបានចុះផ្សាយថា Tao បានចេញដំណើរទៅសហរដ្ឋអាមេរិកហើយ ដើម្បីបន្តការសិក្សា និងព្យាបាលរបួសជើង។

សារព័ត៌មានចិនជាច្រើនបានចុះផ្សាយថា គេបានឃើញ Tao នៅព្រលានយន្តហោះមួយនៅទីក្រុងប៉េកាំង កាលពីថ្ងៃទី៧ ខែឧសភា នៅពេលដែលតារារូបនេះត្រៀមចេញដំណើរទៅទីក្រុង Los Angeles រដ្ឋ California។ ក្នុងការចេញដំណើរលើកនេះ Tao មានគម្រោងបន្តការសិក្សា និងព្យាបាលរបួសកជើង រួមទាំងជំងឺផ្លូវចិត្តរបស់គេផងដែរ។ យ៉ាងណា គេមិនបានដឹងថាតារាវ័យ ២២ឆ្នាំរូបនេះ នឹងចាកចេញយូរប៉ុណ្ណាទេ។

ចាប់តាំងពីមានពាក្យចចាមអារ៉ាមថារូបគេនឹងចាកចេញពីក្រុម EXO មក Tao បានបង្ហាញមុខជាសាធារណៈតែម្ដងគត់ គឺនៅថ្ងៃខួបកំណើតរបស់គេ ដែលរៀបចំដោយអ្នកគាំទ្ររបស់គេនៅប្រទេសចិន កាលពីថ្ងៃទី២ ខែឧសភា។ ថាតើ Tao នឹងចាកចេញពីក្រុម EXO ពិតមែនដែរឬយ៉ាងណា គឺមិនទាន់ដឹងច្បាស់នៅឡើយ។

ដោយឡែកសមាជិក ៩រូបទៀតរបស់ក្រុម EXO គឺកំពុងបន្តសកម្មភាពផ្សព្វផ្សាយអាល់ប៊ុមទីពីររបស់ពួកគេ គឺអាល់ប៊ុម "EXODUS” ដែលមានបទ "Call Me Baby” ជាបទនាំមុខ។ តាំងពីចេញលក់កាលពីចុងខែមីនា មកដល់ពេលនេះអាល់ប៊ុមនេះ លក់ដាច់អស់ ៧៣០ ០០០បន្ទះជុំវិញពិភពលោក ៕