៦ សំណួរជាមួយ Demi Lovato ពីការប្រគំតន្ត្រីនៅកម្ពុជា

2015-05-30 14:29:45
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប៉ុបអាមេរិក Demi Lovato បានមកប្រគំតន្ត្រីនៅកោះពេជ្រកាលពីយប់ថ្ងៃទី៥ ខែឧសភាកន្លងទៅ។ ការប្រគំតន្ត្រីទេសចរណ៍ពិភពលោកឆ្នាំ២០១៥ របស់ Demi នៅតំបន់អាស៊ី និងជាលើកដំបូងនៅកម្ពុជាបានទាក់ទាញអ្នកទស្សនាជាង ២ ម៉ឺននាក់ចូលរួមហ៊ោកញ្ជ្រៀវយ៉ាងកងរំពង។ ម្ចាស់បទ "Let It Go" បានបញ្ជាក់ពីចំណាប់អារម្មណ៍ និងបទពិសោធន៍ស្នាក់នៅកម្ពុជាក្នុងសម្ភាសជាមួយ Sabay ដូចតទៅ។

Sabay៖ នាយកប្រតិបត្តិរបស់ក្រុមហ៊ុន Smart លោក Thomas Hundt ធ្លាប់និយាយថា នឹងរៀបចំការប្រគំតន្ត្រីនេះជាការប្រគំតន្ត្រីដ៏អស្ចារ្យបំផុតនៅកម្ពុជា។ តើកញ្ញាមានអារម្មណ៍យ៉ាងណាបើប្រៀបធៀបនឹងបណ្ដាប្រទេសផ្សេងទៀតដែលកញ្ញាធ្លាប់ទៅសម្ដែង?

Demi៖ សម្រាប់ខ្ញុំ គ្រប់ការប្រគំតន្ត្រីសុទ្ធតែមានលក្ខណៈពិសេសផ្សេងៗគ្នា។ ការប្រគំតន្ត្រីនីមួយៗរបស់ខ្ញុំតែមានចំណុចពិសេសរៀងៗខ្លួន ហើយខ្ញុំមានអារម្មណ៍ថា ខ្ញុំតែងបង្កើតអនុស្សាវរីយ៍ដ៏អស្ចារ្យរាល់ពេលដែលខ្ញុំឡើងសម្ដែង។ ចំណែកនៅកម្ពុជាក៏ដូចគ្នាដែរ។

Sabay៖ តើកញ្ញាយល់យ៉ាងណាចំពោះការប្រគំតន្ត្រីទេសចរណ៍អន្តរជាតិពិភពលោកលើកទី ១ ក្នុងប្រទេសកម្ពុជាមុខទស្សនិកជនជាង២ ម៉ឺននាក់? តើកញ្ញាមានអារម្មណ៍យ៉ាងណាដែរ?

Demi៖ បទពិសោធន៍តាំងពីដើមរហូតដល់ចប់ (នៅកម្ពុជា) គឺពិតជាអស្ចារ្យខ្លាំងណាស់។ ម្ចាស់ឧបត្ថម្ភបានយកចិត្តទុកដាក់ និងសម្ដែងគារវកិច្ចមកលើខ្ញុំ និងក្រុមការងារយ៉ាងកក់ក្ដៅ។

Sabay៖ តើពេលវេលាណាខ្លះដែលគួរឲ្យចងចាំបំផុតសម្រាប់ការសម្ដែងរបស់កញ្ញានៅទីនេះ?

Demi៖ ខ្ញុំពិតជាភ្ញាក់ផ្អើលជាខ្លាំងពេលឃើញក្រុមអ្នកគាំទ្រដ៏ច្រើនស្រែកច្រៀងតាមបទចម្រៀងរបស់ខ្ញុំ។ ខ្ញុំពិតជាមិនជឿសោះថា ខ្ញុំមានអ្នកគាំទ្រច្រើនបែបនេះនៅកម្ពុជា។ ពេលដែលខ្ញុំធ្វើដំណើរទៅកាន់ឆាកប្រគំតន្ត្រី និងឮសំឡេងហ៊ោកញ្ជ្រៀវរបស់ Fan ខ្ញុំពិតជារំភើបមិនគួរឲ្យជឿ។ ចំនួន Fan បន្តចូលទៅកាន់កន្លែងប្រគំតន្ត្រីច្រើនឡើងៗ ដែលធ្វើឲ្យខ្ញុំមិនអាចរង់ចាំសម្ដែងបាន។

Sabay៖ តើអ្វីដែលកញ្ញាចាប់អារម្មណ៍ខ្លាំងបំផុតអំពីកម្ពុជា និងការប្រគំតន្ត្រីនេះ?

Demi៖ ខ្ញុំមិនធ្លាប់មកកម្ពុជាពីមុនមកទេ ដូច្នេះអ្វីៗទាំងអស់គឺពិតជាថ្មីសម្រាប់ខ្ញុំ។ ខ្ញុំពិតជារំភើបចំពោះមនុស្សគ្រប់រូបនៅទីនេះរាប់តាំងពីបុគ្គលិកសណ្ឋាគារ អ្នកគាំទ្រឡើង។ និយាយឲ្យចំមនុស្សគ្រប់គ្នាគឺពិតជារួសរាយ រាក់ទាក់ និងស្វាគមន៍ជាខ្លាំង។

Sabay៖ ពេលនោះ តើកញ្ញាស្នាក់នៅកម្ពុជាប៉ុន្មានថ្ងៃ ហើយមានបានទៅកន្លែងកម្សាន្តណាឬអត់?

Demi៖ ខ្ញុំមានការសោកស្ដាយជាខ្លាំង។ ដោយសារកាលវិភាគមមាញឹកពេក ខ្ញុំនៅបានតែពីរបីថ្ងៃប៉ុណ្ណោះ និងមិនបានទៅណាទេ។ ខ្ញុំសង្ឃឹមថា អាចត្រឡប់ទៅ (កម្ពុជា) ម្ដងទៀត និងចំណាយពេលដើម្បីស្គាល់កម្ពុជាឲ្យកាន់តែច្រើន។

Sabay៖ គ្មាននរណាម្នាក់ជឿថា កញ្ញានឹងមកសម្ដែងនៅកម្ពុជាទេពីមុនមក។ ចុះកញ្ញាមានគម្រោងនឹងត្រឡប់មកកម្ពុជាជាថ្មីដើម្បីធ្វើការ ឬសម្រាកលំហែកាយទេ? តើប្រិយមិត្តអាចធ្វើអ្វីខ្លះដើម្បីអាចជួបកញ្ញាម្ដងទៀត?

Demi៖ អរគុណ! ខ្ញុំសង្ឃឹមថា អាចមកធ្វើការ ឬសម្រាកលំហែនៅទីនោះម្ដងទៀតឆាប់ៗ។ ខ្ញុំមានការមមាញឹកច្រើន ដូច្នេះវាពិតជាពិបាកក្នុងការរៀបចំពេលវេលាឲ្យបានសមស្របក្នុងការធ្វើដំណើរលំហែ។ តែខ្ញុំពិតជាស្រឡាញ់កម្ពុជាខ្លាំងណាស់។ ខ្ញុំនឹងព្យាយាមតាមដែលធ្វើបានដើម្បីឆ្លៀតពេលមកទីនេះម្ដងទៀត។

អាន៖ Demi Lovato ប្រឈមជំងឺផ្នែកស្មារតីជាច្រើនឆ្នាំ

អត្ថបទ៖ សីហា