១០សំណួរក្ដៅ ស្រាយចម្ងល់ការប្រឡងបាក់ឌុបឆ្នាំនេះ

2015-07-22 22:40:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានទាក់ទងពីច្បាប់វិន័យការប្រលងបាក់ឌុប នៅតែមានចំណុចមួយចំនួនជាមន្ទិល។ ដើម្បីស្រាយចម្ងល់ ក្រសួងអប់រំ យុវជននិងកីឡា បានដាក់ជាសំណួររួមទាំងចម្លើយដែលត្រូវបានសួរញឹកញាប់សម្រាប់ការប្រឡងសញ្ញាបត្រមធ្យមសិក្សាទុតិយភូមិ ឆ្នាំនេះនៅលើទំព័រ Facebook របស់ខ្លួន។

១/ ដើម្បីមានសិទ្ធចូលប្រឡង តើបេក្ខជនត្រូវមានអ្វីខ្លះ?

បេក្ខជនត្រូវយកមកនូវប័ណ្ណសម្គាល់ខ្លួន សម្រាប់បេក្ខជនចំណេះទូទៅ និងបំពេញវិជ្ជា និងសលាកបត្រឯកត្តជនសម្រាប់បេក្ខជនស្វៃរិនចំណេះទូទៅ និងបំពេញវិជ្ជា។

២/ តើត្រូវធ្វើដូចម្ដេច ប្រសិនបើបេក្ខជនបាត់ប័ណ្ណសំគាល់ខ្លួនឬសាលាកបត្រឯកត្តជន?

មុនកាលបរិច្ឆេទប្រឡង៖ បេក្ខជនចំណេះទូទៅ និងបំពេញវិជ្ជា ត្រូវទាក់ទងជាមួយគណៈគ្រប់គ្រងសាលា រីឯបេក្ខជនស្វៃរិន ត្រូវទាក់ទងជាមួយមន្ទីរអប់រំ យុវជន និងកីឡា ឲ្យបានឆាប់បំផុតដើម្បីស្នើសុំប័ណ្ណសម្គាល់ខ្លួន សលាកបត្រឯកត្តជនថ្មី ឬលិខិតបញ្ជាក់

ក្នុងពេលដំណើរការសំណេរ៖ បេក្ខជនត្រូវទាក់ទងប្រធានមណ្ឌលដើម្បីស្នើសុំលិខិតអនុញ្ញាតឲ្យចូលប្រឡង។

៣/ តើពិន្ទុប៉ុន្មានត្រូវបានកំណត់ឲ្យជាប់ សម្រាប់ការប្រលងសញ្ញាបត្រមធ្យមសិក្សាទុតិយភូមិ?

របបពិន្ទុប្រឡងអតិបរមា ៥០០ពិន្ទុ ប៉ុន្តែដោយមុខវិជ្ជាភាសាបរទេសជាវិញ្ញាសាតាមស្ម័គ្រ ដូច្នេះពិន្ទុប្រឡងជាប់គឺ ៥០០ ដក ២៥ រួចចែកនឹង ២ ស្មើនឹង ២៣៧,៥ពិន្ទុ យកត្រឹម ២៣៧ពិន្ទុ ជាប់។

៤/ តើបញ្ជីឈ្មោះបេក្ខជន លេខតុ លេខបន្ទប់ និងបទបញ្ញត្តិផ្សេងៗទាក់ទងនឹងការប្រលងនឹងបិទផ្សព្វផ្សាយតាមមណ្ឌលប្រលងនៅថ្ងៃណា?

បញ្ជីឈ្មោះបេក្ខជន លេខតុ លេខបន្ទប់ និងបទបញ្ញត្តិផ្សេងៗទាក់ទងនឹងការប្រឡង នឹងបិទផ្សព្វផ្សាយ តាមមណ្ឌលប្រឡង ចាប់ពីម៉ោង ៩ ព្រឹក ថ្ងៃទី២៣ ខែសីហា ឆ្នាំ២០១៥ ។

៥/ តើក្រសួងមានវិធានការយ៉ាងណាចំពោះការប្រឡងជំនួស?

ចំពោះបេក្ខជនដែលឲ្យគេប្រឡងជំនួស ត្រូវបានកំណត់ឲ្យធ្លាក់ និងផ្អាកមិនឲ្យប្រឡងពីរឆ្នាំបន្តបន្ទាប់។ ដោយឡែក បេក្ខជនដែលប្រឡងជំនួសគេ នឹងត្រូវបញ្ជូនទៅស្ថាប័នមានសមត្ថកិច្ច ដើម្បីដោះស្រាយតាមនីតិវិធីច្បាប់ជាធរមាន។

៦/ តើលទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រលង ២៤ សីហា ២០១៥ នឹងប្រកាសនៅពេលណា?

លទ្ធផលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ២៤ សីហា ២០១៥ នឹងប្រកាសជូន នៅរសៀលថ្ងៃទី១៥ ខែកញ្ញា ឆ្នាំ២០១៥ ចំពោះមណ្ឌលប្រឡងក្នុងរាជធានីភ្នំពេញ និងខេត្តកណ្ដាល ដោយឡែកបណ្ដាខេត្តផ្សេងទៀត នឹងប្រកាសជូននៅព្រឹកថ្ងៃទី១៦ ខែកញ្ញា ឆ្នាំ២០១៥ ។

៧/ តើបេក្ខជន មាតាបិតា ឬអ្នកអាណាព្យាបាលមានសិទ្ធិតវ៉ា ចំពោះការមិនពេញចិត្តនឹងលទ្ធផលប្រឡងដែរឬទេ?

បេក្ខជន មាតាបិតា អ្នកអាណាព្យាបាល ឬអ្នកពាក់ព័ន្ធដែលមិនពេញចិត្តនឹងលទ្ធផលនៃការប្រឡង មានសិទ្ធិប្ដឹងតវ៉ាក្នុងរយៈពេល៣០ (សាមសិប) ថ្ងៃ ចាប់ពីថ្ងៃប្រកាសលទ្ធផលប្រឡង។ អ្នកប្ដឹងតវ៉ាត្រូវសរសេរជាលាយលក្ខណ៍អក្សរត្រឹមត្រូវ មានភស្តុតាង មានឈ្មោះ មុខរបរ អាសយដ្ឋានច្បាស់លាស់ និងមានការទទួលខុសត្រូវចំពោះមុខច្បាប់ជាធរមាន។ ក្នុងករណីមានពាក្យបណ្ដឹង ឬពិនិត្យឃើញថា ការប្រឡងមានភាពមិនប្រក្រតីលើកិច្ចការរបស់បេក្ខជន និងលើការអនុវត្តភារកិច្ចរបស់គណៈមេប្រយោគ និងគណៈកម្មការផ្សេងៗ ក្រសួងត្រូវបង្កើត គណៈកម្មការកោសល្យវិច័យ។

៨/ តើវិធីគណនាលំដាប់ពិន្ទុដោយរបៀបណា?

លំដាប់ពិន្ទុត្រូវបានគណនាតាមរូបមន្តដូចខាងក្រោម ៖ PR = [(n – i +1) / n ] x 100

ក្នុងរូបមន្តខាងលើ៖ PR ជាលំដាប់ពិន្ទុ n ជាចំនួនបេក្ខជនដែលបានមកប្រឡងទាំងអស់ i ជាចំណាត់ថ្នាក់របស់បេក្ខជនណាម្នាក់

ឧទាហរណ៍ ៖ នៅឆ្នាំ២០១៥ មានបេក្ខជនដែលបានមកប្រឡង ៨៨ ៤៨៨ នាក់ តើបេក្ខជនម្នាក់ឈ្មោះ សុក ថា ដែលបានចំណាត់ថ្នាក់ទី១១ មានលំដាប់ពិន្ទុប៉ុន្មាន ? ចម្លើយ ៖ លំដាប់ពិន្ទុរបស់បេក្ខជនឈ្មោះ សុក ថា គឺ PR = [(88488 – 11 + 1) / 88488] x 100 = 99.988

៩/ តើមានការកំណត់ទណ្ឌកម្មខាងវិន័យយ៉ាងដូចម្ដេច ចំពោះគណៈមេប្រយោគ គណៈកម្មការ និង អនុគណៈកម្មការទាំងឡាយណាដែលប្រព្រឹត្តកំហុសក្នុងដំណើរការប្រឡង?

ប្រធាន អនុប្រធាន និងសមាជិកនៃគណៈមេប្រយោគ គណៈកម្មការ និងអនុគណៈកម្មការនានា ដែលប្រព្រឹត្តឲ្យមានកំហុសក្នុងដំណើរការប្រឡងត្រូវទទួលទណ្ឌកម្ម ខាងវិន័យដូចខាងក្រោម៖

ក. ទណ្ឌកម្មខាងវិន័យថ្នាក់ទី១៖

ស្ដីបន្ទោស
ស្ដីបន្ទោសដោយមានចំណារក្នុងសំណុំលិខិតផ្ទាល់ខ្លួន
ផ្លាស់ដោយបង្ខំតាមវិធានការខាងវិន័យ
លុបឈ្មោះចេញពីតារាងឡើងឋានន្តរសក្ដិ ឬថ្នាក់។

ខ. ទណ្ឌកម្មខាងវិន័យថ្នាក់ទី២៖

ស្ដីបន្ទោសជាទម្ងន់ បណ្ដាលឲ្យលុបឈ្មោះចេញពីតារាងឡើងឋានន្តរស័ក្ដិ ឬថ្នាក់ បើសិន ជាមានចុះឈ្មោះហើយ ឬធ្វើឲ្យយឺតក្នុងការដំឡើងឋានន្តរស័ក្ដិ ឬថ្នាក់ក្នុងថេរវេលាមួយ មានកំណត់ តែមិនត្រូវឲ្យលើសពី ២ឆ្នាំក្នុងការដំឡើងឋានន្តរស័ក្ដិ ឬថ្នាក់តាមវេនជ្រើស រើស ឬតាមវេនអតីតភាព
ដាក់ឲ្យនៅទំនេរគ្មានបៀវត្ស មិនឲ្យលើសពីមួយឆ្នាំ
បន្ថយឋានន្តរស័ក្ដិ ឬថ្នាក់មួយថ្នាក់ ឬច្រើនថ្នាក់
ដាក់ឲ្យចូលនិវត្តន៍មុនកំណត់ ឬបញ្ឈប់ពីការងារដោយបង្ខំ
បណ្ដេញចេញពីមុខតំណែងរាជការ។

១០/ តើការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៤-២០១៥ មានលក្ខណៈដូចម្ដេច?

សេចក្ដីប្រកាសព័ត៌មានស្ដីពី គោលការណ៍នៃការរៀបចំប្រឡងសញ្ញាបត្រមធ្យមសិក្សាទុតិយភូមិ សម្រាប់ឆ្នាំសិក្សា ២០១៤-២០១៥ បានចែងថា ក្រសួងនឹងបន្តពង្រឹងការអនុវត្តតាមគោលការណ៍នៃកំណែទម្រង់របស់ខ្លួន ដូចឆ្នាំ២០១៤កន្លងទៅ ដោយគ្រាន់តែធ្វើការកែលម្អចំណុចខ្វះខាតផ្នែកបច្ចេកទេសមួយចំនួន តូច។

សូមអាន ៖ ប្រើម៉ាស៊ីនគិតលេខពេលប្រឡងបាក់ឌុបល្អ ឬមិនល្អ?

សូមអាន៖ លោកគ្រូ ជ័យ ថាវី បង្ហើបគន្លឹះប្រឡងជាប់បាក់ឌុបឆ្នាំនេះ

អត្ថបទ៖ លឹម សុនា