ក្រៅពី សាសា មានតារាស្រីផ្សេងទៀត បានរងអំពើហិង្សាពីបុរសដែរ

2015-07-31 15:13:29
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតត្រឹម២ឆ្នាំចុងក្រោយនេះ ករណីប្រព្រឹត្តអំពើហិង្សាក្នុងសង្គមសិល្បៈទាំងតូចធំ របួសធ្ងន់ និងស្រាល បានកើតមានចំនួន៣ករណី ដែលក្នុងនោះ អ្នករងគ្រោះសុទ្ធជានារីភេទ ដែលត្រូវភាគីបុរស វាយដំលើរូបរាងកាយ។ ពួកគេទាំងបីនាក់នោះមាន៖

១.សាសា អតីតពិធីការិនីទូរទស្សន៍ CTN៖ ករណីរបស់តារាស្រីមានឈ្មោះដើម ឯក សុជាតា បានធ្វើឲ្យកក្រើកក្នុងសង្គមខ្មែរអស់ពេលជិត១ខែ ក្រោយនាង ត្រូវឧកញ៉ា សុខ ប៊ុន វាយដំលើរូបរាងកាយក្នុងជម្លោះមួយកាលពីរាត្រីថ្ងៃទី២ កក្កដា ២០១៥។ ដើមហេតុនៃអំពើហិង្សានោះ ត្រូវសារព័ត៌មាននានារាយការណ៍ថា ដោយសារតែ នាងព្យាយាមរារាំងឧកញ៉ា សុខ ប៊ុន មិនឲ្យនាំមិត្តនារីជនជាតិជប៉ុនរបស់នាងចេញក្រៅ។

ករណីរបស់នាង រហូតទាល់តែសម្ដេចនាយករដ្ឋមន្ត្រី ហ៊ុន សែន ចេញអន្តរាគមន៍ ទើបឧកញ៉ា សុខ ប៊ុន ដែលរត់គេចខ្លួនក្រោយកើតរឿង ព្រមវិលចូលស្រុកឲ្យប៉ូលិសចាប់ខ្លួន។ យ៉ាងណា មកទល់ថ្ងៃនេះ មិនទាន់មានព័ត៌មានវិវត្តន៍ជុំវិញបណ្ដឹងរបស់ សាសា នៅឡើយ។

២.យ៉ាន លីនដា៖ អាណិកជនខ្មែរ-អូស្ត្រាលីរូបនេះ គឺជាជនរងគ្រោះទី១ក្នុងឆ្នាំ ២០១៥ នេះ ក្រោយត្រូវស្វាមី គឺលោក យ៉ែម សំអូន បានប្រព្រឹត្តហិង្សាលើ កាលពីពាក់កណ្ដាលខែមេសា។ លីនដា មានរបួសជាំលើរាងកាយ និងគ្រេចក ហើយក្រោយកើតរឿង នាងបានវេចបង្វេចឡើងយន្តហោះទៅអូស្ត្រាលីបាត់។ ដើមហេតុនៃជម្លោះរហូតដល់មានការប្រើអំពើហិង្សាខាងលើ លីនដា ចោទស្វាមីរបស់ខ្លួនមានទំនាក់ទំនងស្នេហាភេទដូចគ្នា។ មកទល់សព្វថ្ងៃ ក៏មិនមានព័ត៌មានវិវត្តន៍ដែរ ថាពួកគេលែងគ្នា ឬយ៉ាងណាឡើយ។

(រូបភាព៖FB)

៣.ឌីជេ អាលីយ៉ា៖ តារាស្រីនិយមថតរូបស្លៀកពាក់សិចស៊ីរូបនេះ គឺជាតារាស្រី១ដែលទទួលរងការប្រើអំពើហិង្សាលើរាងកាយគិតត្រឹម២ឆ្នាំចុងក្រោយ។ ហេតុការណ៍នោះ កើតឡើងនៅដើមឆ្នាំ ២០១៤ អាលីយ៉ា ដែលដំបូងឡើយនាងបានបង្ហោះរូបថតឈាមប៉ុន្មានសន្លឹកធ្វើឲ្យអ្នកគាំទ្រភ័យបុកពោះ គ្រប់គ្នា។ បន្ទាប់ពីនោះមក តារាស្រីសម្បុរស្រអែមរូបនេះ ចេញមុខអះអាងថា “រូបភាពឈាមនោះ គឺជាកាដូសម្រាប់មនុស្សម្នាក់ដែលព្យាយាមធ្វើឲ្យខ្ញុំឈឺចាប់…!”។

អាលីយ៉ា(រូបឆ្វេង) និងសាសា(រូបភាព៖FB)

បុរសនោះ គឺអាលីយ៉ា សំដៅលើបុរសខ្មែរ-អាមេរិកាំង ដែលបានប្រព្រឹត្តអំពើហិង្សានៅតាមទីសាធារណៈ ធ្វើឲ្យនាងរបួសយ៉ាងដំណំរហូតសន្លប់នៅលើដងផ្លូវ។ ហេតុការណ៍នោះកើតឡើងចំថ្ងៃនៃសេចក្ដីស្រឡាញ់តែម្ដង។ គ្រានោះ អាលីយ៉ា ស្នើឲ្យបុរសនោះ ចេញមុខមកទទួលខុសត្រូវនូវអ្វីដែលគេបានធ្វើ ពុំនោះទេ នាងនឹងចាត់ការតាមផ្លូវច្បាប់ទៀត។ យ៉ាងណា សាច់រឿងបានស្ងប់ស្ងាត់តាំងពីពេលនោះរហូតមកបច្ចុប្បន្ន ដោយមិត្តភ័ក្ដិជាជនជាតិបរទេសមួយចំនួនរបស់ អាលីយ៉ា ស្នើសុំកុំអាលទាន់ ពួកគេនឹងចូលរួមអន្តរាគមន៍ និងដោះស្រាយ៕

អត្ថបទ៖ ទារិកា